Askotariko gogoetak generoaren formara ekarri ditu idazleak, eta Koldobika Jauregik ilustrazioekin osatu ditu. Alberdaniak eman du argitalpena, eta asteazkenean erdi prezioan salduko dute formatu digitaleko bertsioa.

Izenburua bera ere izan daiteke aforismo bat: Noiz arte arrazoi. Aforismo bat, erakutsi bezainbat ezkutatzen duelako. Adam Zagajewski poeta irakurtzen ari zela heldu zen horra Juan Kruz Igerabide (Aduna, Gipuzkoa, 1956): "Zagajewskik esaten zuen aforismoak ondo daudela, baina noiz arte, noiz arte izan dezakegun arrazoia. Horrek bidea zabaldu zidan pentsatzeko aforismoaren egitekoetako bat arrazoiaren mugetan ibiltzea dela: ateratzen du hanka bat eta hor amaitzen da arrazoia; eta sartzen du paradoxara, baina hori ere bukatu egiten da, eta berriz sartzen du barrura...". Arrazoia baino gehiago, aforismoak konstatazioak direla dio egileak, eta haren mugetan idatzitako hamaika ale bildu ditu bilduma berrian. Zagajewskiri emandako erantzuna barne: "Noiz arte? Aforismoak idazten hasi aurretixe arte".

Modu birtualean aurkeztu dute liburua, gaur goizean. Alberdaniak argitaratu du lana, eta hango editore Jorge Gimenezek gogora ekarri du Igerabidek aurrez landu duen genero bat dela: Egia hezur (2004, Alberdania)eta Herrenaren arrastoan (1998, Alberdania) lanetan, besteak beste. Igerabidek barruan pentsalari bat eta pentsalariaren barruan idazle bat dituela aipatu du Gimenezek, eta, nork nor elikatzen duen zehaztu ezinda, biek bat egiten dutela haren obran, bereziki aforismoetan. "Juan Kruzen literaturak, destilazio baten bidez, beti-beti, pentsalariaren emaitza ematen du".

Informazio osoa iturriaren webgunean irakurri