Arantxa Urretabizkaiak jaso du Gipuzkoako Diputazioak ematen duen Anton Abbadia saria, euskararen normalizazioaren alde egindako ekarpenagatik eta euskal literaturan emakumearen imajinarioaren eraldaketan aitzindari izateagatik. Udane Juaristi artistaren obra bat jaso du sari gisa.

Arantxa Urretabizkaia idazle eta kazetari donostiarrak jaso du 2019ko Anton Abbadia saria. Gipuzkoako Diputazioak ematen du saria eta, aurten, epaimahaiak aho batez erabaki du Urretabizkaiarentzat izan behar zuela, euskararen normalizazioaren alde egin duen ekarpenagatik eta euskal literaturan emakumearen imajinarioaren eraldaketaren alde egin duen lanagatik: «Urretabizkaiak bizitza osoa darama euskararen alde lanean, baita egoerarik zailenetan ere, eta euskara batuaren erabilera normalizatzea lortu zuen eta gure hizkuntza aro modernora ekarri zuen belaunaldiaren ordezkaria da. Gainera, aitzindaria izan da euskal literaturan emakumearen gaineko imajinarioaren aldaketan», azaldu zuen Eider Mendoza aldundiko bozeramaileak sariaren iragarpenean.