"Dido and Aeneas" Henry Purcellen opera eta "Dido, queen of Carthage" Christopher Marloweren lana uztartzen ditu lehenengoz maiatzaren 3an taularatuko duten ikuskizunak

Dido & Aeneas Arriaga antzokiak ekoitzitako lan berriak Henry Purcellen musika eta Christopher Marloweren edertasun poetikoa nahasten ditu ikuskizun berean. Ostiralean, maiatzak 3, estreinatuko dute, eta 4an ere ikusi ahalko da, egun bietan 19:30etik aurrera.

Musikal barroko honek Dido and Aeneas Henry Purcellen opera eta Dido, queen of Carthage Christopher Marloweren antzezlana uztartzen ditu. Operaren konposizioak ingelesez entzungo dira, jatorrizko bertsioan, eta Marloweren antzezlana euskaraz antzeztuko da. Hori dela eta, ikuskizun osoak euskarazko, gaztelaniazko eta ingelesezko gaintituluak izango ditu.

Christopher Marlowe ingelesa Shakespeareren aitzindaritzat hartzen da, eta Ingalaterrako antzerki panorama modernizatzen lagundu zuen.

Barbora Horáková Joly txekiar zuzendari gazteak zuzendu du antzezlana, eta antzezle talde handia izango du bere aginduetara. Bi protagonista nagusiek, Didok eta Eneasek, bina interprete dituzte: Nerea Berraondo (Dido) eta León de la Guardia (Eneas) dira protagonista biei ahotsa jarriko dieten bi bakarlariak, abestu behar dutenean. Antzezpenari dagokionez, Miren Gaztañaga da Dido eta Adrián García de los Ojos Eneas.

Informazio osoa iturriaren webgunean irakurri