Lehendakariak "Renove 4.0 Programa" berriaren aktibatzioa iragarri du, industria-inguruneetako gailuen eraldaketa digitalean lagunduko duen programa
2019.eko urriak 23
- Fabrikazio Aurreratuari eta Makina-Erremintei buruzko Biltzarraren XXII. edizioaren bidez, industria aurreratuaren erronkak eta joerak aztertu nahi dira
Iñigo Urkullu Lehendakaria, Arantxa Tapia Ekonomiaren Garapeneko eta Azpiegituretako sailburuarekin eta Cristina Uriarte Hezkuntza sailburuarekin batera, 21CMH-Fabrikazio Aurreratuari eta Makina-Erremintei buruzko Biltzarrarenirekiera-ekitaldian izan da, Gipuzkoako Zientzia eta Teknologia Parkean. Foro horretan, Lehendakariak iragarri du Eusko Jaurlaritzak “Renove 4.0 Programa” berria jarriko duela abian; horretarako, 4 milioi euroko deialdia egingo du eta hark industria-inguruneetako gailuen eraldaketa digitalari lagunduko dio.“Jauzi kualitatibo berria egiteko garaia da”, esan du.
Urkullu Lehendakariak fabrikazio aurreratutik industria adimendunerako trantsizioa azpimarratu du. Hori horrela, Lehendakariak nabarmendu du merkatuak, makina edo osagaiez gainera, soluzio osoak ere eskatzen dituela, malgutasun eta zehaztapen handiagoa dakartzaten soluzioak, ekonomia zirkularraren bidez baliabideen erabileran eraginkortasun handiagoa dakartenak, zerbitzu aurreratu berriak emateko digitalizazioa. “Hori da industriaren erronka berria”, esan du.
Iñigo Urkulluk industria-politikaren lau eremu nagusi nabarmendu ditu:garapen teknologikoa eta digitalizazioa; prestakuntza, inbertsioa prestatutako pertsonetan eta talentua; nazioartekotzea, eta aliantzak, elkarlana eta hazkuntza.
Biltzar horren bidez, industria aurreratuaren erronkak eta joerak aztertu nahi dira, ekonomia-egoera globalaren zailtasunak ere jasaten dituen sektore indartsuaren egoera aztertu nahi da. Iazko urtea positiboa izan zen fakturazioaren eta esportazioen aldetik. Joerari maila onean eusten zaio, baina egia da, bestalde, eskarien sarreran eragina izaten ari dela moteltze orokorra eta hark automobilgintzarekin lotura duten fabrikatzaileetan duen eragina.
Lehendakariak aitortu du garai zailagoak bizitzen ari garela, baina esan du, bestalde, ibilbidea badutela egina eta badakitela egoera horiek nola gainditu industria indartsu, sendo eta lehiakorrarekin. Zehazki, automobil-sektorearen zailtasunak direla eta, Lehendakariak laguntza eskaini dio sektore horri, eta ziurtatu du Eusko Jaurlaritza beti egongo dela laguntza emateko, aukeren eta eskumenen barruan.
Fabrikazio Aurreratuari eta Makina-Erremintei buruzko Biltzarraren XXII. edizioan, hitzaldi, aurkezpen, eztabaida eta bestelako formatuen bidez, industria konektatuan irmoki oinarritzen den ikuspegia nabarmenduko da, eta honako hauei buruzko joera nagusietan sakonduko da: digitalizazioaren erronkak, osagai eta prozesuen diseinua, fabrikazio gehigarriaren bidezko industria-garapena, fabrikazio-sistema adimendunak eta moldatzaileak, aeronautikaren etorkizuneko joerak, startupen eta enpresa finkatuen arteko elkarlana edo talentuaren kudeaketa etorkizuneko industrian.
