Eusko Jaurlaritzak diruz lagunduko du Elkargi gehienez 552.000"-ko zenbatekoaz (Gobernu Bilera 2019-12-17)
2019.eko abenduak 17
- Elkargi azarora arte 257 milioi euroko zenbatekoa formalizatu du; zenbateko horretatik, 190 milioi euro finantza-abalei dagozkie eta urtearen itxieran saldo metatua 880 milioi eurotik gorakoa izango da
Gobernu Kontseiluak onartu du Elkargi elkar bermatzeko elkarteari zuzeneko diru-laguntza ematea; diru-laguntza gehienez 552.000€-koa izango da, eta elkartearen hornikuntza teknikoen funtsa indartzera zuzenduko da. Eman beharreko diru-laguntza Elkargi, S.G.R.arekin elkarlanean jarduteko hitzarmen baten bidez bideratuko da.
Eusko Jaurlaritzak, Ogasun eta Ekonomia Sailaren bidez, Euskal Autonomia Erkidegoko enpresa txikien eta ertainen finantzaketa-baldintzak hobetzen laguntzen du, eta, horretarako, hitzarmenak sinatzen ditu zenbait finantza-erakunderekin. Hitzarmen horien artean barnean hartu dira elkar bermatzeko sozietateekin formalizatutakoak.
Horretarako, eta Elkargi, S.G.R.k arlo horretan egindako lan handia aintzat hartuz, erabakiaren helburua da elkarte horren funts propioak indartzea elkartearen hornikuntza teknikoen funtsa gehitzearen bidez. Horri esker, abalak emateko elkartearen ahalmena handituko da eta Euskal Autonomia Erkidegoko enpresa txikien eta ertainen eta banako enpresaburuen eta profesional autonomoen finantzaketa-aukerak areagotuko dira.
Elkargi S.G.R.k, Eusko Jaurlaritzaren babesarekin, urte honetako azarora arte guztira 190 milioi euro eman ditu finantza-abaletan, eta, hartara, antzeko zenbatekoa duten maileguak eta kredituak formalizatu ahal izango dira, Euskal Autonomia Erkidegoko finantzaketa sustatuz. Urte amaieran saldo metatua 880 milioi eurotik gorakoa izango da.
