Katalogoa Kur galeria donostiarraren laguntzaz argitaratu du eta bertan jarri ditu ikusgai, irailaren 15era bitartean, azken hiru urteotan egindako hainbat obra ere.

«Iñigo Arregi. Eskultura 2008-2018» katalogoa irekitzen duen aldiro, bere lanaren ertz berriak ikusten dituela dio eskultore arrasatearrak. Bere ibilbide eskultorikoa laburbiltzen du Kur galeriaren laguntzaz argitaratu duen katalogoak, eta, hain zuzen ere, areto donostiarrean bertan jarri ditu ikusgai azken hiru urteotan egin dituen hainbat obra, irailaren 15era bitarte. Gainazalekin esperimentazio betean dabilela dio Arrasateko eskultoreak.

«Begira, ikusten duzu mutiko hau?», esan digu Iñigo Arregik, hatz erakuslea bere ibilbideaz diharduen “Eskultura 2005-2018” katalogoa irekitzen duen orrian paratuta. Irudiaren eskuinean ile beltzeko mutiko bat ageri da, baina, argazkiaren fokua erdian, garabiak jasotzen duen eskulturan, dago. «12 urte nituenetik 16 nituenera arte egon nintzen Arantzazun eskolak hartzen. Hau absideko apostoluak jarri zireneko unea da: Oteizaren lan guztia jarraitu nuen bertatik bertara. Handik irten nintzenerako banekien artista izango nintzela, eta, orduz geroztik, ez naiz geratu», ziurtatu du.

Eskulturan hasi bazen ere, berehala jo zuen pinturara, «ez dakit zergatik, kontu praktikoengatik seguru asko. 16 urterekin eta Arrasaten, eskultore modura, esango didazu ze ibilbide izan nezakeen… Orduan, hasi nintzen margotzen, erakusketak egiten nituen urtero, eta esaten zidaten nire pintura oso eskultorikoa zela kontzeptuari eta ordenari zegokienez, eta pasa nintzen berriro eskulturara. Azken hamabost urteotan, eskultura bakarrik egin dut». Dozenaka erakusketatan parte hartzeaz gainera, bere obrak Euskal Herriko txoko askotan ikus daitezke, esate baterako, Elgoibarreko Kolunbarioan edota Gasteizko Posta kalean (aurtengo Aste Santuan jarri dute).

«Liburuan azaltzen da mutikotatik gaur arte egin dudan ibilbidea. Lehenengo zatian ikusten dira oso azkar lehen urteetako lanak, eta gero zentratzen da 2005etik 2018ra arte. Hor ikusten da, lasai, ze eboluzio izan duen nire obrak eta uste dut argitzen dituela galdera asko. Adibidez, urtetan obra oso bertikalak egin ditut eta orain hasi naiz gauza horizontalak egiten; hor aldaketa inportantea dago, beste proposamen batzuetara zabaltzen naiz». Liburuak, Kur galeriaren laguntzaz eta “Iñigo Arregi. Eskultura 2005-2018” izenaz argitaratua, berrehun obratik gora biltzen ditu 260 orrialdetan eta Josemari Velez de Mendizabal, Fernando Golcano, Rafael Castellano, Jean-François Larralde, Mikel Onandia eta Bertrand Courtaigneren testuak ere baditu.

«Nik ez dut egiten ez bozetorik ez ezer», zehaztu digu liburuko orriak behatzen dituela, «zuzenean egiten dut lana: ideia bat dut, garbi, eta lanean hasten naiz. Batzuetan ideia hori esperimentala da guztiz, eta beste batzuetan argumentatua izaten da, enkargua delako edo ideia zehatz bat dudalako. Bi modu oso diferente dira lanerako».