Lide Amilibia´k ikusmen urria zer den ezagutzeko aplikazioak goraipatu ditu
2017.eko abenduak 01
• Gizarte Politiketako sailburuordeak Retinosis Gipuzkoa Begisare Elkartearen “Ikusmen urria dut” kanpainan parte hartu du
• “Hobetu egingo da ikusmen-gaitasun urria dutenen, herritarren % 2ren, bizi-kalitatea”
• “Ikusi sinesteko, partekatu aurrera egiteko, ikusarazi hobetzeko”
DSS 01 12 17
Lide Amilibia Eusko Jaurlaritzako Gizarte Politiketako sailburuordearen iritziz, Retinosis Gipuzkoa Begisare Elkarteak martxan jarri duen “Ikusmen urria dut” kanpainak “hobetu egingo du ikusmen-gaitasun urria dutenen, herritarren % 2ren, bizi-kalitatea”.
Amilibia´k Donostiako Tabakalera kultura-espazioan Begisarek antolatu dituen Ikusmen Urriari buruzko Jardunaldietan parte hartu du, eta zorionak eman dizkie Itziar Gonzálezi eta Amaia Gereñuri, Erretinosi Pigmentarioak Gipuzkoan Eragindakoen Elkartekoei, beren lanagatik eta ekimenagatik.
“Martxan jarri duzuen Ikusmen urria dut kanpaina, dagoeneko, erreferentziazkoa da. Zuon ekimena lortzen ari da gure gizartean positiboki zabaltzea ikusmen urria zer den; herritarren % 2k bizi du. Hori jakinik, bizi dutenekin lankidetza hobetu dezakegu eta erakunde, enpresa, gizarte, garraio eta merkatarien arteko ekintzei ekin, ikusmen-gaitasuna murriztuta dutenen bizi-kalitateko baldintzak hobetzeko”, esan du Amilibiak.
Lide Amilibiak gomendatu du “gure gizarteak bizi duen egoera bakoitza ezagutzeko, bakoitza bestearen lekuan eta egoeran jartzeko. Hori dela eta, bikaina iruditzen zait gaur Donostian aurkezten ari zareten eta, laster, Bizkaian eta Araban aurkeztuko duzuen aplikazioen ideia”.
“Zuon lekukotzak animatu egiten gaitu erakundeok hiri-diseinua, azpiegiturak eta lanlekuak hobetzera, bai eta espazio publikoak, argibideak eta seinaleak ere, edo ikusmen urria dutenentzako arreta”, esan du Gizarte Politiketako sailburuordeak.
Amilibiak esan du “ikusmen urria dutenen ongizatea eta segurtasuna hobea izateko konpromisoa partekatu egin behar dela: gure denda, bulego eta garraiobideetan; horretarako, espazioak egokitu behar dira, sarbide hobea izan dezaten, eta gertakari eta egoera bakoitzaren berri eman behar da, irisgarritasuna hobetzeko. Bakoitzak pixka bat eginez gero, asko lortuko dugu”.
“Hori dela eta, garrantzitsua da ikusteko desgaitasun larria duten pertsona askok eraman ohi duten bereizgarria ezagutzea –“Tengo baja visión-Nik ikusmen gutxi det”–, zeina Euskaditik haratago ere eramaten ari baitzarete. Ekimena bikaina da: gizartea sentsibilizatzen du eta dei egiten dio lankidetzan jardutera eta ikusmen urriaren kolektiboari laguntzera”, esan du Lide Amilibiak.
Gaur eta bihar Donostian egingo diren jardunaldietan, besteak beste, honako gai hauek aztertuko dira: astronomia irisgarria (ikusmen urriko astronomoa, Enrique Pérez Montero jn.); tailerrak: Smartphone irisgarria (ikusmen urriko erabiltzaileak); ginkana ikusmen urriko simulagailuekin: futbola: atezaindegira tiro egitea (Real Sociedadek parte hartuko du); ordenagailuaren erabilera; paseo gidatua; argazkiak ezagutzea simulagailuekin, “Ikusmen urria dut” bereizgarriaren aurkezpena eta ikusmen-hutsen simulagailuarekin (Retinosis Gipuzkoa Begisare); ikusmen urria eragiten duten gaixotasun nagusiak; itsutasun saihesgarria: prebentzioa eta diagnostiko goiztiarra erretinopatia diabetikoan, DMAEn eta miopia magnan (Marta Figueroa dk., Retina Plus presidentea); DMAEko eta makulako beste patologia batzuetako ikerketen inguruko aurrerapenak (Jordi Monés dk., Barcelona Mácula Foundation-eko presidentea); glaukoma, ikusmen urria haurtzaroan (CRI); ikusmen-galeraren alderdi psikologikoak; ikusmen-galeraren diagnostikoa. Eta, orain, zer? (dolu-prozesuetako aditua); egokitzapen psikologikoa ikusmen urrira; ikusmen urria duten pertsona, espezialista eta publikoarentzako jardunaldia; laguntza optikoak (SEEBV presidentea); errehabilitazioa (ASPREH presidentea) Smartphoneak eta irisgarritasuna (itsuen irisgarritasuneko aditua). Proiektuaren web-orrialdea: www.tengobajavision.com. www.begisare.org