Ongizate, Gazteria eta Erronka Demografiko Sailaren egitura organikoa eta funtzionala ezartzen duen urriaren 29ko 320/2024 Dekretuaren 1. artikuluak dioenez, sail horri dagozkio Euskal Autonomia Erkidegoko Administrazio Orokorreko sailak sortu, ezabatu eta aldatzen dituen eta horien egitekoak eta jardun-arloak finkatzen dituen lehendakariaren ekainaren 23ko 18/2024 Dekretuaren 15. artikuluan zehazten diren egitekoak eta jardun-arloak. Dekretu hori lehendakariaren uztailaren 30eko 36/2024 Dekretuaren artikulu bakarraren zazpigarren paragrafoak aldatu zuen.

Ekainaren 23ko 18/2024 Dekretuaren 15. artikuluan, Ongizate, Gazteria eta Erronka Demografikoaren Sailari dagozkion egitekoen eta jardun-arloen artean, erronka demografikoa eta familiaren babesa sartzen dira.

Familiei Laguntzeko abenduaren 12ko 13/2008 Legearen xedea da familia-politika integral baterako esparrua eta oinarriak ezartzea, familien eta familiako kideen ongizatea eta bizi-kalitatea hobetzera bideratuta. Lege horren II. tituluko I. kapituluak seme-alabak dituzten familientzako dirulaguntzak arautzen ditu, eta 8. artikuluan eskubide subjektiboaren izaera ematen die, baldin eta laguntzak jasotzeko baldintzak betetzen badira.

Seme-alabak dituzten familientzako laguntzei buruzko 27/2023 Dekretuak hileko laguntzak jasotzen ditu seme-alabengatik, bai eta ezohiko laguntzak ere erditze anizkoitzagatik, adopzio nazional anizkoitzagatik eta nazioarteko adopzioagatik. Arau horrek indargabetu egiten du laguntza horiek arautzen zituen 30/2015 Dekretua, eta xedapen iragankorretan ezartzen du 30/2015 Dekretuaren arabera izapidetu eta diruz lagunduko direla % 33ko edo gehiagoko desgaitasuna edo seme-alabekiko mendekotasun-egoera aitortzeagatik emandako laguntzen bikoizketari buruzko eskaerak, baldin eta bikoizketa-arrazoi horiek bost urteko epean jakinarazi bazitzaizkion organo kudeatzaileari, jaiotzatik edo, hala badagokio, adopzioa, adopzio aurreko elkarbizitzarako zaintzaren delegazioa edo tutoretza eratu zenetik.

Bi dekretuetan jasotako laguntzen helburua seme-alabak dituzten familia guztiei gutxieneko baliabideak bermatzea eta haur-pobrezia prebenitzea da, eta Ongizate, Gazteria eta Erronka Demografikoaren Sailaren 2025-2028 aldirako Dirulaguntzen Plan Estrategikoan sartuta daude. Plan hori sailburuaren 2025eko otsailaren 21eko Aginduaren bidez onartu zen.

30/2015 Dekretuaren 30.2 artikuluan eta 27/2023 Dekretuaren 12.2 artikuluan xedatutakoa aplikatuz, sailburuaren agindu bidez, familia-politikaren arloan eskumena duen sailak urtero emango du bertan aurreikusitako laguntzak finantzatzeko aurrekontu-zuzkiduraren berri, edo, hala badagokio, zuzkidura hori eguneratzearen ondoriozko zenbatekoaren berri. Ondorioz, agindu hau Euskal Herriko Agintaritzaren Aldizkarian argitaratuko da.

Horrenbestez, Dirulaguntzen Araubidea Erregulatzeko abenduaren 21eko 20/2023 Legean jasotako publikotasun-printzipioarekin eta Seme-alabak dituzten Familientzako Laguntzen otsailaren 21eko 27/2023 Dekretuaren 12.2 artikuluan xedatutakoarekin bat etorriz, honako hau