2. Eko-Euskadi 2020

EkoEuskadi 2020 da Euskal Autonomia Erkidegorako Garapen Iraunkorraren Estrategia, 2020 urtera begira. Estrategia horrek aurre egingo dio, lehen aldiz, EAEn garapen iraunkorraren arloko helburu estrategikoak zehazteko egitekoari, lehenik, eta iraunkortasunaren zeharkako printzipiotik eratorritako sektore-planak txertatzekoari, bigarrenik. Estrategiaren eginkizuna, funtsean, garapen iraunkorrarekin lotutako ekonomia-, gizarte- eta ingurumen-alderdiak osoki egituratzean datza, Eusko Jaurlaritzaren ekintza politikoa herrialde-proiektu berri batera bideratzeko: ekonomikoki lehiakorra, berritzailea eta ekoeraginkorra, gizarteari dagokionez bateratua eta arduratsua, eta ingurumenari dagokionez EAEko natura-ondarea osatzen duten ondasun eta baliabideen kalitatearekin konprometitutakoa.

EkoEuskadi 2020 Gobernuaren ekintza politikoaren zeharkako erreferentzia puntu berri bat izango da, nahiz eta sektoreko politika eta helburuen zein horiei dagozkien sailen planen adierazpenak sail bakoitzaren berezko kudeaketa-eremuaren barruan jarraituko duen.

Helburuak:

EkoEuskadi 2020 Garapen Iraunkorreko Estrategia diseinatzea, ekonomia-, garapen- eta ingurumen-eredu berri baten inguruan sortutako Herrialde Proiektu baten xede edo helburu orokor baten inguruan, honako asmo hauekin:

• Ikuspegiari dagokionez, Euskal Autonomia Erkidegoa gizarte konprometitu eta arduratsua bilakatzea epe ertainean, “3. industria iraultza” deritzen horren buruan jartzeko gai izango dena (ekoizpen sistemen pixkanakako deskarbonizazioa eta herritarren sentsibilizazioa energia-kontsumoaren jarraibideen gainean), eta gure herrialdeari nazioarteko erreferente izatea ahalbidetuko diona ekonomia eko-eraginkorraren esparruan (zerbitzu eta teknologia iraunkorrak ematea, merkatu berde berriak, eta abar), ikerketarenean, berrikuntzarenean eta ezagutzarenean, edo, beste era batera esanda, Ekonomia Berdearen lider izatera eramango gaituena
• Giza oparotasunari eta denboran mantentzeari dagokienez, ekonomia eta gizarte beharrak asetzea, eta egungo belaunaldiaren baliabide naturalak mantentzea ere bai, etorkizuneko belaunaldien beharrak asetzeko gaitasuna zalantzan jarri gabe.

EkoEuskadi 2020 ekimen berritzailea da, izan ere, lehenengo aldiz sartzen du Euskal Autonomia Erkidegoaren nahiz gainerako autonomia-erkidegoen ibilbidean iraunkortasunari buruzko zeharkako alderdia, Garapen Iraunkorrari buruzko estrategia europarrekin eta espainiarrarekin koherentzia mantenduta, betiere.

Hura definitzerakoan, gaiari buruz dauden plan eta lan ugariak aintzat hartu dira. Edonola ere, 2001eko maiatzaren 15eko EBren Garapen Iraunkorraren Estrategia hartu da oinarrizko erreferentzia gisa, 2006ko ekainean Kontseilu Europarrak onetsitakoa, hausnarketa hau egiteko gida-esparru egokiena dela uste baita.

EkoEuskadi 2020k hauteskunde-programan bildutako konpromisoei nahiz lehendakariak inbestidura-ekitaldian adierazitakoei erantzuten die. Lehendakariak EkoEuskadi aipatu zuen egun hartan etorkizuneko erreferentzia modura eta estrategia eta politikako ibilbide orri modura. Handik gutxira, Gobernu Kontseiluak adierazpen hura berretsi zuen (ekainaren 5ean, Ingurumenaren Mundu Mailako Eguna) Urdaibaiko Adierazpen edo Itunean. Halaber, estrategia Ingurumen, Lurralde Plangintza, Nekazaritza eta Arrantza sailburuak Legebiltzarrean edukitako agerraldian xehatu zen, sailburuak bere sailaren Jarduera Ildoak aurkeztu zituenean.

Hasiera batean, Eusko Jaurlaritzaren sail guztiak egongo lirateke sartuta, Lehendakaritza buru dela.

Urdaibaiko Itunean aurreikusitako Sailen Arteko Batzordearen bitartez, EkoEuskadi 2020k finkatuko ditu iraunkortasunaren alorrean landu beharreko politikak, ildoak eta esparruko helburu estrategikoak. Lehendakaria prozesuaren lider politiko eta Batzordeko presidente izango da. Dagokion eskumen-esparruan, sail bakoitzak edukiko du egokitzat jotako plan eta jarduera sektorialak definitzeko, garatzeko, ezagutarazteko eta haiei balioa emateko ardura, iraunkortasunaren helburu komunerantz adostasunez eta aldi berean abiatzeko garaian.

EkoEuskadi 2020 Garapen Iraunkorreko Estrategiaren inguruan garatu beharreko lanen oinarrian egongo den antolamendu-eskemaren proposamenak “Etorkizuneko Batzorde”  bat sortuko du. Batzorde hori 10-15 aditu independente eta ospetsuk osatuko dute, helburu estrategikoak definitzen laguntzeko. Batzordea erronka berrien aurreko aholkularitza-organo nagusia izango da.

2020ra begirako Euskadirentzako Garapen Iraunkorreko Estrategia honen ezarpen prozesuan, parte-hartzea ahalik eta zabalena izango da. Bertan esku hartzen duten eragile guztiek eta gizarteak, oro har, beren ideiak eta ikuspegiak aurkezteko aukera edukitzea lortu nahi da.