Zalantzarik gabe, datu ireki publikoen atarien erronketako bat kalitatezko datu-multzoak eskaintzea da, erabilgarriak izan daitezen eta berrerabiltzaileei balioa eman diezaieten.
Helburu hori lortzeko gakoak konplexuak dira, baina gehien errepikatzen den gakoetako bat administrazioen artean datu normalizatuak eskaintzea da, eta modu erabilgarriago eta ergonomikoagoan egitea kolektibo berrerabiltzailearentzat.
Testuinguru horretan, euskal administrazio nagusien (Eusko Jaurlaritza; Arabako, Bizkaiko eta Gipuzkoako foru-aldundiak; eta Bilboko, Donostiako eta Gasteizko udalak) datu irekien ekimenak batera lan egiten ari gara azken urteotan, Gobernu Irekiaren aldeko Aliantzak (OGP Euskadi) hartutako konpromisoen esparruan. Lan honen emaitzetako bat gehien eskatzen diren datu-multzoak identifikatzea eta APIen bidez eskaintzea izan da, berrerabiltzea errazteko.
Datu irekien lau API berri
Artikulu honetan balioetsi nahi dugun emaitza zazpi euskal administrazio nagusien elkarlanaren emaitza da, eta datu irekien lau API Rest berri berrerabiltzaileen eskura jartzean gauzatu da:
- Datu meteorologikoen APIa (Euskalmet): Euskalmeten webgunean herritarrentzat eskuragarri dauden datu meteorologiko guztiak eskaintzen ditu (iragarpenak, estazioen irakurketak, irudiak, etab.).
- Kultura-ekitaldietako APIa (Kulturklik): Euskadin egiten diren kultura-ekitaldiei buruzko datuak eskaintzen ditu. Eusko Jaurlaritzako Kultura eta Hizkuntza Politika Sailak Kulturkliken webgunean argitaratutako ekitaldiak dira, eta aipatutako euskal administrazioek emandako informazioaz elikatzen dira.
- Trafikoko APIa: EAEko administrazioen trafiko gorabeherei, dentsitateari eta kamerei buruzko datuak eskaintzen ditu.
- Administrazio-ekitaldietako APIa: Eusko Jaurlaritzaren kontratu publikoei, laguntza eta diru-laguntzen deialdiei, sari eta lehiaketei eta abarri buruzko iragarkien datuak eskuratzeko aukera ematen du.
Zerbitzu horiek guztiak martxan eta eskuragarri daude Open Data Euskadiren webgunean. Era berean, horiek hobetzeko eta datu gehiago sartzeko lanean jarraitzen dugu.
APIak nola erabili
Lau APIak erabilera librekoak eta doakoak dira, eta Euskalmet zerbitzuaren kasuan baino ez da beharrezkoa aurretiazko doako erregistroa, identifikatzaile bat (API key) ematen duena eskaerak egiteko.
Garatzaileek Open Data Euskadiren webgunean kontsulta dezakete zerbitzu bakoitzaren dokumentazioa:
- Datu meteorologikoen APIaren dokumentazioa
- Kultura-ekitaldietako APIaren dokumentazioa
- Trafikoko APIaren dokumentazioa
- Administrazio-ekitalidetako APIaren dokumentazioa
Edozein API Resten bezala, deiak http eskaera gisa inplementatzen dira, non URLaren egitura dokumentazioan kontsulta daitekeen. Adibidez, kultura-ekitaldien kasuan, Gasteizen egun jakin baterako programatuta dauden ekitaldiei buruzko datuak lortu nahi baditugu (id: 59), honako eskaera hau egin beharko genuke, datuak JSON formatuan itzultzen dizkiguna:
/culture/v1.0/events/byDate/{year}/{month}/{day}/byMunicipality/{province}/{municipality}
https://api.euskadi.eus/culture/events/v1.0/events/byDate/2021/5/6/byMunicipality/1/59
Beste adibide bat, 2021/05/04ko trafiko-gorabeherak lortu nahiko bagenitu, honako eskaera hau egingo genuke:
/traffic/v1.0/incidences/byDate/{year}/{month}/{day}
https://api.euskadi.eus/traffic/v1.0/incidences/byDate/2021/5/4
Kontsulta guztietan paginazioa dago, hau da, kontsultaren lehen 20 emaitzak baino ez ditu itzultzen. Emaitza guztiak berreskuratu ahal izateko, kontsulta "_page=x" parearekin berriro eskatu behar da:
https://api.euskadi.eus/culture/events/v1.0/events/byDate/2021/5/6/byMunicipality/1/59?_page=2
Kontsultako orrialde guztiak jakin ahal izateko, json-en bada atributu bat, "totalPages" izenekoa, eta bertan adierazten da egin beharreko orrialdeen muga.
Ikus daitekeenez, funtzionamendua erraza da, eta APIaren kontsumitzaileari aukera ematen dio datuak modu automatizatuan eta erabilgarriagoan lortzeko.
Garatzaileentzako euskarri teknikoa
Edozein kontsulta edo gorabehera tekniko egiteko, jar zaitez gurekin harremanetan opendata@euskadi.eus helbidearen bidez edo zuzenean web honetako harremanetarako formularioaren bidez.
Zerbitzu horien bizitzako lehen asteetan, erantzuna positiboa izan da, eta nabarmentzekoa da duten erabilera-maila. Horregatik, ziur gaude hori dela etorkizunean mantendu eta garatu beharreko bideetako bat.
