San Andres eliza (Elciego)

Eliza dotore hau landutako harriz eraiki zuten XVI. mendean. Eraikin bakarra izanik, estilo artistiko ugari ikus daitezke bertan: gotikoa, errenazentista eta neoklasikoa. Gotikoaren ezaugarriak dituen zatia atzeko bi dorreetatik gertuen dagoena da; puntadun arkuak eta nerbiodun zutabeak ditu.

Kontrako aldea, sakristia ostera, neoklasikoa da. Bi zati horiek lotzen dituen atalean, denborak aurrera egin ahala estiloak aldatu zirela argi ikusten da. Gurutzaduraren aldea, esate baterako, errenazentista da: gurutzeria-ganga eusten duten arkuak puntu erdikoak dira hemen. 

Erretaula nagusi bikaina dauka barnean. Estilo errenazentista eta barrokoa nahasten dira, eta Bibliako hainbat pasarte kontatzen dituzten irudietan.