Liburutegi Zerbitzua

2008ko ekainaren 11n, Benito Garachana Orodea jaunak, Atusa Empresarial, S.L.U. enpresaren izenean eta ordezkaritzan, Eusko Jaurlaritzako Ingurumen eta Lurralde Antolamendu Sailari ingurumen-baimen bateratua ematea eskatu zion, kutsaduraren prebentzio eta kontrol integratuari buruzko uztailaren 1eko 16/2006 Legeak xedatutakoaren arabera, Aguraingo udalerrian (Araba) burdinurtuko piezak fabrikatzeko eta eraldatzeko jarduerarako. Eskaerarekin batera, Aguraingo Udalak 2007ko urriaren 3an eman zuen aldeko hirigintza-txostena eta agiri tekniko hauek aurkeztu zituen:

Atusa Empresarial, S.L.U. enpresaren ingurumen-baimen bateratutako oinarrizko proiektua (2008ko ekaina).

Ingurumen-baimen bateraturako oinarrizko proiektua. A. konfidentziala dokumentua (2008ko ekaina).

Substantzia arriskutsuen adierazpena, uztailaren 16ko 1254/1999 Errege Dekretuko erregelamenduzko xedapenekin lotutakoa (Errege Dekretu horren bidez, istripu larrietan gai arriskutsuak tarteko direnean sortzen diren arriskuak kontrolatzeko neurriak onesten dira). B dokumentua (2008ko ekaina).

Ingurumen-baimen bateraturako oinarrizko proiektua. Laburpen ez-teknikoa (2008ko ekaina).

Erreferentziako baimena eskatzeko orduan, Atusa Empresarial, S.L.U. enpresak, besteak beste, 2005ko urriaren 28ko hondakin-ur sanitarioak isurtzeko baimena eta 2006ko abenduaren 26ko Alivio errekako urak biltzeko baimenak zituen, uren alorrean indarrean dagoen araudian xedatutakoari jarraituz.

2008ko uztailaren 18an, Ingurumen Organoak agiri gehigarriak txertatzeko eskatu zion sustatzaileari, eta agiri horiek 2008ko urriaren 8an aurkeztu ziren.

2008ko azaroaren 12an, Ingurumenaren Kalitatearen Zuzendaritzak prozeduran esku-hartzea duten hainbat organori txostenak eskatu zizkion, Ingurumen Organoaren bidez proiektua jendaurrean jartzeko izapidea adosteari dagokionez. Zehazki Aguraingo Udalari eta Eusko Jaurlaritzako Osasun Sailari eskatu zien txostena.

2009ko urtarrilaren 26an, Ingurumen Organoak agiri gehigarriak txertatzeko eskatu zion sustatzaileari, eta agiri horiek 2009ko otsailaren 13an aurkeztu ziren.

Ingurumen sailburuordeak 2009ko martxoaren 12an emandako Ebazpenaren bidez jendaurrean jarri zen, 30 egun baliodunen epean, Atusa Empresarial, S.L.U. enpresak sustatutako proiektua, egoki iritzitako alegazioak aurkezteko. Euskal Herriko Agintaritzaren Aldizkarian nahiz Bizkaiko Aldizkari Ofizialean argitaratu zen, bietan 2009ko apirilaren 15ean. Era berean, Euskal Autonomia Erkidegoko bi egunkaritan iragarkia jarri zen 2009ko apirilaren 12an eta 15ean, hurrenez hurren, eta proiektuak hartuko duen eremuaren ondoko auzokideei jakinarazpena bidali zitzaien.

Jendaurrean jartzeko izapidea amaitu ondoren, alegaziorik ez dagoela egiaztatu da.

Kutsaduraren prebentzioari eta kontrolari buruzko uztailaren 1eko 16/2002 Legearen 17. eta 18. artikuluetan xedatutakoa betez, 2009ko abuztuaren 21ean Ingurumenaren Kalitatearen Zuzendaritzak txostenak eskatu zizkien Aguraingo Udalari eta Eusko Jaurlaritzako Osasun Sailari, espedientean ageri den emaitza jasoz.

Eskaeraren izapidetzearekin jarraitzearren, 2009ko ekainaren 5ean, uztailaren 30ean eta urriaren 19an agiri osagarriak txertatzeko eskatu zitzaion sustatzaileari, eta 2009ko abenduaren 22an osatu ziren agiriak.

2010eko urtarrilaren 8an txostena eskatu zitzaion Ebroko Ur-konfederazioari.

2010eko martxoaren 12an, kutsaduraren prebentzioari eta kontrol integratuari buruzko uztailaren 1eko 16/2002 Legearen 20. artikuluan xedatutakoa betez, espediente osoa Atusa Empresarial, S.L.U. enpresaren esku utzi zen, Ingurumen, Lurralde Plangintza, Nekazaritza eta Arrantza Sailak egindako ebazpen-proposamena gehituz.

2010eko martxoaren 30ean sustatzailearen jakinarazpena jaso zen. Jakinarazpen horretan hainbat ohar egiten ziren ingurumen-baimen bateratuaren ebazpen-proposamenari buruz.

2010eko apirilaren 9an eta 21ean, sustatzaileak dokumentazio gehigarria aurkeztu zuen, espedientean sartzeko.

2010eko ekainaren 18an, txostena eskatu zitzaion Ebroko Ur-konfederazioari, ingurumen-baimen bateratua Atusa Empresarial, S.L.U. enpresak sustatutako jarduera dauden jardueretara egokitzeko. Horretarako, aipatu organismoak txosten loteslea egin zuen 2010eko abuztuaren 3an. Txosten horrek ondorerik gabe uzten zuen 2005eko urriaren 28ko Ebazpena, Jabari Publiko Hidraulikora isurtzeak debekatuz ondore guztietarako.

ZUZENBIDE-OINARRIAK

Uztailaren 1eko 16/2002 Legearen, kutsaduraren prebentzioari eta kontrol integratuari buruzkoaren 1. artikuluan xedatutakoaren arabera, Lege horrek atmosferaren, uraren eta lurzoruaren kutsadura saihestea du helburu, edo hori ezinezkoa bada, kutsadura hori gutxitu eta kontrolatzea, kutsadura prebenitu eta kontrolatzeko sistema integratu bat ezarri eta ingurumen osoaren babes-maila altua lortzeko.

Uztailaren 1eko 16/2002 Legea garatu eta burutzeko Erregelamendua onartzen duen apirilaren 20ko 509/2007 Errege Dekretuaren 3. artikuluan xedatutakoarekin bat eginez, baimen honetan sartzen dira ekoizpen-elementu eta -lerro guztiak; 16/2002 Legearen 1. eranskinean aipatzen ez diren arren, lege hori aplikatu beharreko esparruko jardueren instalazioetan gauzatzen direnak eta jarduera horrekin zerikusi teknikoa dutenak.

Kutsaduraren prebentzio eta kontrol integratuari buruzko uztailaren 1eko 16/2002 Legearen 9. artikuluan xedatutakoa betez, ingurumen-baimen bateratua behar dute 1. eranskinean aipatzen diren jardueraren bat garatzen duten instalazioak eraiki, muntatu, ustiatu, lekuz aldatu nahiz funtsezko beste aldaketaren bat egiteko. 11. artikuluaren arabera, baimen honen oinarrizko helburua baldintzak ezartzea da, araua, berau aplika daitekeen instalazio guztietan betetzen dela bermatzeko; horretarako, baimena emateko parte hartuko duten herri-administrazioen artean koordinatuta izango den prozedura bat erabili nahi da, izapideak erraztu eta partikularrek ordaindu beharreko kargak gutxitzearren. Era berean, indarrean dagoen araudiaren araberako ingurumeneko administrazio-baimen guztiak egintza administratibo bakar batean bildu nahi dira. Atusa Empresarial, S.L.U. enpresaren kasuan, baimen hauek guztiak behar ditu: Jabari Publikoko Urgunean isurtzeko baimena, hondakin arriskutsu eta sortzeko baimena, eta ingurumen-izaerako beste zehaztapenen artean, atmosferaren kutsadurari dagozkion baimenak eta lurzoruaren kutsadura prebenitu eta zuzentzeari dagozkionak. Gainera, espedientean beste administrazio eta erakunde eskudun batzuek ere parte hartu dute, aginduzko txostenak igorriz.

Kutsaduraren prebentzioari eta kontrol integratuari buruzko uztailaren 1eko 16/2002 Legearen 29. artikuluan xedatutakoaren arabera, ingurumen-baimen bateratua emateko prozedurak ordezten du jarduera sailkatuetarako udal-lizentziaren prozedura, azaroaren 30eko 2414/1961 Dekretuan, jarduera gogaikarri, osasungaitz, kaltegarri eta arriskutsuei buruzkoan aurreikusten zena; ez du ordezkatzen, ordea, udal-agintaritzak emango duen behin betiko ebazpena. Ondorio horietarako, ingurumen-baimen bateratua udal-agintarientzat loteslea izango da, baldin eta lizentzia ukatzeko bada edota neurri zuzentzaileak ezartzeko; baita goiko arauaren 22. artikuluan jasotako ingurumen alderdiei buruzko aipamena egiten bada ere. 29. artikulu horretan aipatzen denez, goiko guztiak ez ditu kaltetuko autonomia-erkidego bakoitzean jarduera sailkatuei aplikatzekoak diren gainerako arauak. Transkribatutako aginduak aplikatuz, Atusa Empresarial, S.L.U. enpresari dagokion ingurumen-baimen bateratuaren prozedurak barne hartu ditu Euskal Autonomia Erkidegoko Ingurumena Babesteko otsailaren 27ko 3/1998 Lege Orokorrean aurreikusitako izapideak; horiez gain, espedientean sartu dira Aguraingo Udalaren eta Eusko Jaurlaritzako Osasun Sailaren txostenak.

Instalazioak gehienez isur ditzakeen gai kutsatzaileen balioak eta ingurumena bere osotasunean ahalik eta gehien babesteko ustiapenerako ezarriko zaizkion beste baldintza batzuk zehazte aldera, Ebazpen hau egiterakoan kontuan izan da eskura daitezkeen teknika onenen erabilera. Zehazki, Europako Batzordearen 2005eko maiatzeko BREF txostenaren «Reference Document on Best Techniques in the Smitheries and Foundries Industry», Europako Batzordearen 2001eko abenduko BREF txostenaren «Reference Document on Best Available Techniques in the Ferrous metal Processing Industry» eta 2001eko abenduko BREF txostenaren «Reference Document on the application of Best Available Techniques to Industrial Cooling Systems» edukiak kontuan hartu dira.

Espedienteko txostenak aztertu ondoren, ebazpen-proposamena sinatu eta Atusa Empresarial, S.L.U. enpresak sustatutako proiektuak bete beharreko baldintzak ezarri ziren.

Goian adierazitako izapideak amaitu dira, eta kutsaduraren prebentzioari eta kontrol integratuari buruzko uztailaren 1eko 16/2002 Legearen 20. artikuluan jasotzen den entzunaldi-izapidea bete da. Ildo horretan, kontuan hartu behar da organo honi atxikitako zerbitzu teknikoek sustatzaileak izapide honetan egindako oharrak aztertu dituztela, eta guztiak kontuan hartu direla ebazpen hau lantzeko orduan.

Organo hau da ingurumen-baimen bateratu hau emateko eskuduna, aipatutako legearen 13. artikuluan eta Ingurumen, Lurralde Plangintza, Nekazaritza eta Arrantza Sailaren egitura organikoa eta funtzionala ezartzen duen abenduaren 22ko 629/2009 Dekretuaren 9. artikuluan ezarritakoari jarraituz.

Ondorengo araudia ikusi da: Ingurumen, Lurralde Plangintza, Nekazaritza eta Arrantza Sailak 2010eko martxoaren 12an emandako ebazpen-proposamena; Euskal Autonomia Erkidegoko Ingurumena Babesteari buruzko otsailaren 27ko 3/1998 Lege Orokorra; kutsaduraren prebentzioari eta kontrol integratuari buruzko uztailaren 1eko 16/2002 Legea; proiektuen Ingurumenaren gaineko Eraginaren Ebaluazio Legearen testu bategina onartzen duen urtarrilaren 11ko 1/2008 Legegintzako Errege Dekretua; Ingurumen, Lurralde Plangintza, Nekazaritza eta Arrantza Sailaren egitura organikoa eta funtzionala ezartzen duen abenduaren 22ko 629/2009 Dekretua; Herri Administrazioen Araubide Juridikoa eta Administrazio Prozedura Erkideari buruzko azaroaren 26ko 30/1992 Legea, eta aplika daitekeen gainerako araudia,

Lehenengoa. Helbide soziala Aguraingo udalerriko Agurain industrialdeko z/g -an duen (Araba) eta IFK: B-01359637 duen Atusa Empresarial, S.L.U. enpresari ingurumen-baimen bateratua ematea, burdinurtuko piezak egiteko eta eraldatzeko jarduerarako Aguraingo udalerrian, Ebazpen honen bigarren atalean ezarritako baldintzetan.

16/2002 Legearen, uztailaren 1ekoaren, Kutsaduraren prebentzioari eta kontrol integratuari buruzkoaren, «2.4. Metal ferrosoen galdategia, eguneko 20 tona baino gehiago ekoizteko ahalmena duena» kategorian eta «2.3. c. Jarduera Metal ferrosoak eraldatzeko instalazioak. Metal urtuzko babes-geruzak aplikatzea, orduko 2 tona altzairu gordin baino gehiago tratatzeko ahalmena dutenak» kategorietan sartuta dago jarduera.

Atusa Empresarial, S.L.U. enpresaren instalazioak Aguraingo udalerriko industrialdean kokatuta daude eta guztira 390.580 m2-ko azalera hartzen dute. Horietatik 51.500 m2 eraikita daude.

Atusa Empresarial, S.L.U. enpresak burdinurtuko piezak egin eta fabrikatzen ditu. Gehienezko ekoizte-ahalmena eguneko 83 tonakoa da.

Ekoizpen-prozesua urtzeko labeak lehengaien parkeko eremutik kargatzen hasten da. Materiala urtzean, hondarrezko moldeetan isurtzen da, berdez moldekatzeko atalean eratu ondoren. Molde horiei, beharrezkoa bada, arrak jartzen zaizkio kutxa beroko hargintza-etapetan, kutxa hotzeko hargintzan eta hareategian. Ondoren, burdina bereizten da, jada solido dagoenean, hondarretik (desmoldatze-etapa), airearen zirkulazioaren bidez hozteko. Piezak hoztuta daudenean, elikatze-sistemetatik bereizten dira, eta altzairuzko granailen bidez garbitzen dira. Ondoren, sailkatu eta biltegiratu egiten dira. Pieza landugabe garbiei tratamendu termiko bat ematen zaie. Tratamenduaren ondoren, begiratu batez ikuskatu egiten dira, kalitateko akatsak dituzten hautemateko. Korrosiotik babesteko, piezak galbanizatu egiten dira. Ondoren, mekanizatuko eragiketak ezartzen zaizkie (hariztatzea, zulatzea eta abar). Azken kontrola amaitzean, produktuak paketatu, paletetan jarri eta bezeroari eskakizunen arabera bidaltzen zaizkio.

Indukzioko bi urtzeko labe ditu, nukleo magnetiko gabeko maiztasun aldakorrekoak eta 16 tonako edukiera dutenak.

Instalazioan energia-iturri hauek erabiltzen dira: energia elektrikoa (ekoizpen-prozesua eta argiak), gas naturala (hainbat instalazio, berogailua eta ur sanitarioa) eta gasolioa (orgatilatxoak eta ekipo elektrogenoak).

Atusa Empresarial, S.L.U. enpresak 16 foku konfinatu ditu, galdatzeko, isurtzeko, hondarrez igurzteko, piezak hozteko, desmoldatzeko, granailatzeko, galbanizatzeko eta arrak egiteko eragiketetan sortutako isurtzeak ateratzeko. Bestalde, proben granailatzeari, bi ekipo elektrogenori eta laborategiari lotutako 4 foku ez-sistematiko daude.

Jarduerak hainbat hondakin-ur mota sortzen ditu: ur sanitarioak, konpresoreen purgak, atarietatik datozen eta kutsatuta egon daitezkeen euri-urak eta pabiloietako estalkietako euri-ur garbiak. Fluxu horiek guztiak Aguraingo Udaleko kolektorera husten dira.

Sortzen diren hondakin arriskutsuak eragiketa hauen bidez sortzen dira: urtzea (zink-oxidoak), desugerketa (azido erabilia, fluxezko opilak), mekanizatua (ebaketa-likidoa), koipea kentzea (koipea kendu ondoren olioztatuta geratu diren urak), zerbitzu orokorrak (olio hidraulikoa, mahuka-iragazkiak, ontzi hutsak, substantzia arriskutsuak izan dituzten plastikozko ontzi hutsak, pila alkalinoak eta botoi-pilak, bustitako trapuak eta xurgagailuak, ekipo elektrikoak eta elektronikoak) eta botikina (osasun-hondakinak).

Halaber, hondakin ez-arriskutsuak ere sortzen dira urtzean (zepa), upelean zinka sartzean (zink-errautsak, zink-laharrak), berdez moldekatzeko eragiketetan (hondarrak), biltegiratzeko eragiketetan (kartoia, plastikoak), bulegoetan (tonerra), hondarretan (berdez moldekatzea) eta jangeletan (hondakin organikoak).

Halaber, Atusa Empresarial, S.L.U. enpresak badu sortutako hondakin ez-arriskutsuen zabortegi bat. Bertan botatzen ditu galbanizatzeko prozesutik datozen zink-laharrak eta -errautsak, zepak eta urtzeko hondarrak, keen xurgapenean sortutako finak.

Proiektuak, 2005eko maiatzeko «Reference Document on Best Techniques in the Smitheries and Foundries Industry» BREF agirian adierazten denez, Teknika Erabilgarri Onenak (TEO) izan daitezkeen ondorengo neurriak ditu, besteak beste: Txatarra baldintza egokietan biltegiratzea, txatarra-itzuleren barne-birziklapena, ontziratu gabe biltegiratzeko biltegiak eta edukiontzi birziklagarriak erabiltzea, eragiketa-prozedurekin ekoizteko kontrol-sistema, metala zalian egoteko denbora murriztea eta zaliko tenperatura kontrolatzea, xurgatze-sistema, isurtzeak hautematea eta garbitzea, berdez moldekatzea, instalazioan hondarra berreskuratzeko sistema, instalazioan bertan finak balioztatzea, metodo hauetako baten bidez kutxa hotzean hargintzaren ataletik datozen isurtzeak tratatzea: ikatz aktibo bidezko xurgatzea, errekuntza, garbitze kimikoa edo bioiragazkia, amina berreskuratzea, zarata murrizteko estrategia, harrera kontrolatzeko sistema. 2001eko abenduko «Reference Document on Best Available Techniques in the Ferrous Metal Processing Industry» BREF agiriari dagokionez: Fluxatze-bainuko birsorkuntza-sistema, aurretratamenduan piezak ondo xukatzea, zink-hautsaren kanpoko balioztatzea. Hauek dira 2001eko abenduko «Reference Document on the application of Best Available Techniques to Industrial Cooling Systems» BREF agirian adierazitako Teknika Erabilgarri Onenak (TEO): Airearen eta uraren emarien modulazio-sistemak antolatzea; hartzeko hodian saretak jartzea, espezieak ez herrestan eramateko; txertatzeak eta korrosioa murrizteko diseinu egokia.

Bigarrena. Atusa Empresarial, S.L.U. enpresak Aguraingo udalerrian sustatutako burdinurtuko piezak egiteko eta eraldatzeko jarduera ustiatzeko, ondoren baldintzak eta betebeharrak ezartzea.

1. «49/2009 Dekretuan, otsailaren 24koan, hondakinak hondakindegietan biltegiratuta eta betelanak eginda ezabatzea arautzen duenean», ezarritakoaren arabera, 1.920.540 euroko fidantza bat aurkeztuko da, jarduera egiteagatik administrazioaren aurrean bete behar diren betebehar guztiak betetzeko, zehazki, zigilatzeari eta ixteari, itxi ondoko mantentze-lanei eta lixibiatuen kudeatzeari dagokionez.

   Sustatzaileak fidantza horren zenbatekoa txikitzea eskatu ahal izango du itxiera-planaren arabera, eta fidantza horren gutxieneko zenbatekoak bat etorri beharko du ustiapen-planean aurreikusitako zigilatze-azalera handienaren (horren benetako tamainan neurtua, ez proiekzio horizontalean) kontratako burutze-kostuarekin, eta itxi ondorengo mantentze-lanen kostuarekin 30 urtean zehar.

2. Atusa Empresarial, S.L.U. enpresak erantzukizun zibileko aseguru bat sinatu behar du, eta gutxienez hogeita hamar urtetan izan beharko du, zabortegia ixten den egunetik zenbatzen hasita. Aseguru horrek hirugarrengo pertsonei edo beren gauzei edo ingurumenari eragin dakizkiekeen kalteengatiko kalte-ordainak bere gain hartuko ditu, bere instalazioetan egon daitekeen zabortegiaren betebeharrak betetze aldera.

3. Atusa Empresarial, S.L.U enpresak finantza-azterlan bat aurkeztu beharko du, baimen honen indarraldia amaitu baino urte bat lehenago gutxienez. Azterlan horretan, zabortegia itxi ondorengo mantentze-lanen kostuak jasoko ditu, ingurumen-zainketako programaren bilakaera oinarri hartuta, eta era berean, Atusa Empresarial, S.L. enpresak enpresako kutsadura-bizitza murrizteko zer neurri hartu dituen ere jasoko du.

   Finantzen azterketa horretan, gastuak eta diru-sarrerak partidaka eta urteka xehatuta egon beharko dira, zigilatze-planarekin eta itxi ondorengo kontrolarekin koherentzian.

4. Administrazioarekiko harremanez arduratuko den pertsonari buruz emandako datuetan aldaketarik balego, Atusa Empresarial, S.L.U. enpresak aldaketa horien berri emango dio Ingurumen Sailburuordetzari.

5. Neurri babesle eta zuzentzaileak, sustatzaileak Ingurumen Sailburuordetza honetan aurkeztu dituen agirietan aurreikusi bezala burutuko dira, indarrean dagoen araudiaren arabera eta ondorengo ataletan ezarritakoari jarraituz:

   1. Airearen kalitatea babesteko baldintzak.

   1.1. Baldintza orokorrak.

   Atusa Empresarial, S.L.U. enpresaren instalazioa ustiatzean atmosferara egingo diren isurketek ez dituzte Ebazpen honetan ezarritako balioak gaindituko.

   Era berean, prozesuan zehar atmosferara isurtzen den gai kutsagarri oro bildu eta ihesbide egokienean zehar kanpora bideratuko da, behar denean, gai kutsagarrien ezaugarrien arabera diseinatutako gasak arazteko sistema batetik igaro ondoren. Arau orokor hori bete beharrik ez dute izango isuri ez-zarratuak biltzea teknikoki edota ekonomikoki bideragarria ez denean, edo ingurunean kalte urria eragiten dutela egiaztatzen denean.

   Neurriak hartuko dira ustekabeko isuririk ez egiteko, eta egiten direnak giza osasunerako eta gizartearen segurtasunerako arriskutsuak izan ez daitezen. Gas-efluenteak tratatzeko instalazioak behar bezala ustiatuko eta mantenduko dira, efluenteen tenperatura- eta konposizio-aldaketei eraginkortasunez aurre egiteko moduan. Era berean, ahalik eta gehien murriztuko dira instalazio horiek gaizki dabiltzan edo geldirik dauden aldiak.

   1.2. Fokuak identifikatzea. Katalogazioa.

   Atusa Empresarial, S.L.U. enpresaren instalazioak ondoko fokuak ditu, indarrean dagoen araudiaren arabera katalogatuta:

   (Ikus .PDF)

   1.3. Isuriaren muga-balioak.

1. Isuri atmosferikoek isurtzeko muga-balio hauek ez gainditzeko moduan ustiatuko da instalazioa:

   (Ikus .PDF)

   Muga-balio horiek baldintza hauek dituzte: 273 K-ko tenperatura, 101,3 kPa-ko presioa eta gas lehorra.

2. Neurtutako parametroek ez dituzte isurtzeko muga-balioak gaindituko arauz egingo diren aldizkako ikuskaritzetan (ordubeteko hiru neurketa, gutxienez) zortzi ordutan zehar neurtuta. Neurketa-tolerantzia gisa onartuko da kasuen % 25etan muga-balioa gehienez ere % 40 gainditzea. Tolerantzia hori gaindituz gero, neurketa-aldia astebetez luzatuko da, eta aldi horretako tolerantzia global gisa, kasuen % 6an, muga-balioa gehienez % 25 gainditzea onartuko da. Tolerantzia horiek izanda ere, gai kutsatzaileak isurtzen dituen fokuaren eraginpeko zonaldean ezin izango dira inoiz higienikoki onar daitezkeen balioak gainditu.

   1.4. Gasak biltzeko eta husteko sistemak.

   Fokuetako hondakin-gasak kanporatzeko tximiniak ez dira egongo B.1.2 atalean ezarritako goreneko kotatik behera. Tximiniek Industria Ministerioaren 1976ko urriaren 18ko Agindua, industriak atmosferan sortzen duen kutsadura saihestu eta zuzentzekoan ezarritako baldintzak beteko dituzte; horrela, besteak beste, laginak hartzeko puntuetara sarbide seguruak eta errazak jarriko dituzte.

   Zehazki, laginak hartzeko aurreikusten diren zuloen kokapen eta ezaugarriei dagokienez, egokitu behar dira laginak hartzeko gunetik fluxuaren noranzkoaren eta kontrako noranzkoaren arabera (L1 eta L2 parametroak) neurketa-gunea baino lehenago dagoen fluxu gaseosoko edozein perturbaziora arteko distantziak, 1976ko urriaren 18ko Aginduaren III. eranskinean ezarritakoaren arabera.

   L1 8D eta L2 2D distantziak betetzen ez diren fokuetan, inoiz ez dira L1 < 2D eta L2 < 0,5D balioak onartuko. Kasu horietan, neurketen txostenean laginketa-planoaren baliozkotasuna justifikatzea eskatuko da.

   Isurtze bakoitzaren biltzeko, husteko eta arazteko sistema guztiak egoera onean mantenduko dira. Horrez gainera, jarduera horrek sor ditzakeen isurtze barreiatuak murriztea ziurtatuko duten jarduerak egingo dira: kanpoko ateen itxitura eta instalazioak egunero eta astero garbitzea, instalazioa oro har ixtea eta abar. Aipatutako informazio guztia agiri honen F ataleko prebentziozko mantentze-lanen eskuliburuan jaso eta erregistratuko da.

   2. Saneamendu-sarera isuriak egiteko baldintzak.

   2.1. Isurien sailkapena, jatorria, gune hartzailea eta kokapena.

   Isuria sortzen duen jarduera mota nagusia: ur sanitarioak, industria-urak.

   Jarduera-taldea: 2.

   Mota-taldea-EJSN: 1- 2- 2451.

   (Ikus .PDF)

   Konpresoreen purgetako industria-urak Aguraingo Udaleko saneamendu-sarera konektatzeko eskatu beharko da.

   Azken efluente horren isurtze-baimena bidali beharko zaio ingurumen-organo honi, ongi hustu dela ziurtatzeko. Horrez gainera, sortutako efluenteen konexio-puntuen koordenatuei buruzko dokumentazioa emango da. Efluente horiek enpresa honen jardueraren emaitza dira, eta Aguraingo Udalaren saneamendu-sare orokorrera konektatuko dira.

   2.3. Isurien muga-balioak.

   Azken isuriek Aguraingo Udaleko «Etxekoak ez diren isurien ordenantza arauemailean» ageri diren mugak bete beharko dituzte.

   Ibilgura egiten den isuriaren ohiko kutsadura-parametroak ondoren zerrendatutakoak izango dira soil-soilik, bakoitzerako zehazten diren gehienezko balioekin:

   1. isuri-gunea (1IG):

   Konpresoreen purga (F3):

   (Ikus .PDF)

   Tratamendu-sistemaren irteeran hartuko dira laginak.

   2. isuri-gunea (2IG):

   Konpresoreen purgak (F6):

   (Ikus .PDF)

   Tratamendu-sistemaren irteeran hartuko dira laginak.

   Ezingo dira diluzio-teknikak erabili isurtzeko muga-balioak lortzeko.

   Baimen horrek ez du aukerarik ematen xedapen honetan berariaz adierazten ez diren substantziak isurtzeko, eta, bereziki, substantzia arriskutsuak (907/2007 Errege Dekretuaren, uztailaren 6koaren, Plangintza Hidrologikoari buruzko Erregelamendua onartzen duenaren, IV. eranskina).

   2.4. Arazketa- eta huste-instalazioak.

   Hondakin-uren arazketa-instalazioek jarduera nagusi hauek dituzte:

   Hariztatzeko makinen hobi septikoa.

   52 m3-ko edukiera duten 3 gorputzeko hobi septiko bat da, eta 116 hab-equ-ko kutsadura-karga tratatzeko eman zaio neurri hori. Ur sanitarioak tratatzen ditu bakarrik. Hauek daude konektatutako hobi septiko horrekin:

   38 dutxa.

   34 konketa.

   13 komun.

   7 pixaleku.

   Mekanizatuko konpresoreetako ura eta olioa bereizteko makina.

   Mekanizatuko konpresoreetako purgak tratatzen ditu. Ezaugarri hauek ditu:

   Tratamenduko gehieneko edukiera: 0,25 m3/h

   Ontziaren edukiera: 720 l

   Betetze-edukiera: 610 l

   Aurreiragazki oleofilikoa: 1 x 30 l.

   Adsortzioko iragazkia: 2 x 45 l.

   Galdatze-eremuko guztizko oxidazioko ekipoa.

   Guztizko oxidazioko sistema biologiko bat da, arbastua, erreaktore biologikoa, bigarren mailako dekantagailua eta buztinen birzirkulazioa dituena. 15 m3-ko edukiera, eta 233 hab-equ-ko kutsadura-karga tratatzeko eman zaio neurri hori. Ur sanitarioak tratatzen ditu bakarrik. Hauek daude konektatutako hobi septiko horrekin:

   31 dutxa.

   53 konketa.

   16 komun.

   7 pixaleku.

   Galdaketako konpresoreetako ura eta olioa bereizteko makina.

   Mekanizatuko konpresoreetako purgak tratatzen ditu. Ezaugarri hauek ditu:

   Tratamenduko gehieneko edukiera: 0,25 m3/h

   Ontziaren edukiera: 720 l

   Betetze-edukiera: 610 l

   Aurreiragazki oleofilikoa: 1 x 30 l.

   Adsortzioko iragazkia: 2 x 45 l.

   Zerbitzuko aire-konpresoreek galdaratxoak purgatu ondoren sortutako olioak ezabatzeko ekipamendu berezia izan behar dute nahitaez.

   3. Instalazioetan sortutako hondakinak egoki kudeatzen direla bermatzeko baldintzak.

   Instalazioetan sortutako hondakin guztiak Hondakinei buruzko apirilaren 21eko 10/1998 Legean eta aplikaziokoak diren arau espezifikoetan ezarritakoaren arabera kudeatuko dira eta, kasuan kasu, karakterizatu egin beharko dira beren izaera eta helbururik egokiena zehazteko.

   Espresuki debekatuta dago sortzen diren hondakin mota ezberdinak elkarrekin edo beste hondakin nahiz efluente batzuekin nahastea; hondakinak jatorrian bertan bereiziko dira, eta hondakinak biltzeko eta biltegiratzeko bitarteko egokiak jarriko dira, nahasketarik ez gertatzeko.

   Hondakinen kudeaketari buruzko printzipio hierarkikoei jarraituz, hondakin oro balioztatu egin behar da eta horretarako balioztatzegune baimendu batera eraman behar dira. Hondakinak deuseztatu ahal izango dira, baldin eta horiek balioztatzea teknika, ekonomia edota ingurumen aldetik bideragarria ez dela behar bezala egiaztatzen bada. Birsortzea-berrerabiltzea lehenetsiko da balioztatzeko beste edozein modu material edo energetikoren aurretik.

   Era berean, hondakinak tratatzeko Euskal Autonomia Erkidegoan instalazio baimenduak badaude, lehentasunez instalazio horietara bidaliko dira, autosufizientzia- eta gertutasun-printzipioei jarraituz.

   Hondakinen azken erabilera zabortegi baimenduan ezabatzea dela aurreikusten baldin bada, orduan hondakinen ezaugarriak zehazteko Kontseiluaren 2002ko abenduaren 19ko 2003/33/EE Erabakian xedatutakoarekin (hondakinak zabortegian hartzeko irizpideak eta prozedurak ezartzen dituena) eta otsailaren 24ko 49/2009 Dekretuan ezarritako jarraibideekin (hondakinak zabortegian bilduz ezabatzea eta betegarriak egikaritzea arautzen duena) bat etorrita.

   Instalazioan sortutako hondakinen kopurua, ebazpen honetan jasotakoa, orientagarria da soilik, eta jardueraren ekoizpen-aldeak eta hondakin-ekoizpenaren eta hondakin-sortzearen arteko erlazioa kontuan hartuta kalkulatu da (jardueraren adierazlean adierazita daude). Sortutako hondakinen kopurua handitzeak aurretik ezarritako biltegiratze- eta ontziratze-baldintzak aldatzea dakarrenean soilik eskatu beharko da baimena egokitzea.

   Hondakinak biltegiratzeko guneak edo guneek lurzoru estankoa izan beharko dute. Egoera fisiko likidoan edo oretsuan dauden edo oso bustita daudelako isuriak edo lixibiatuak sor ditzaketen hondakinen kasuan, horiek biltzeko kubeta edo sistema egokiak jarriko dira ezbeharrean gerta daitezkeen isuriak kanpora irten ez daitezen. Hauts itxurako hondakinen kasuan, hondakinak euri-urarekin bustitzea edo haizeak herrestan eramatea eragotziko da, eta, beharrezkoa izanez gero, estali egingo dira.

   Hondakinak desagertu, galdu edo isurtzen baldin badira, jazoera hori berehala jakinarazi beharko zaie bai Ingurumen Sailburuordetzari bai Aguraingo Udalari.

   3.1. Hondakin arriskutsuak.

   Sustatzaileak adierazitako hondakin arriskutsuak hauek dira:

   1. prozesua: «Galdaketa».

   1. hondakina: «Zink-oxidoak».

      Identifikazioa: 01359637/01 -3554/1/1.

      Hondakinaren kodea: Q8//R4//S25//C7/H5/14//A230 (1)//B3249.

      EHZ: 100909.

      Urtean sortutako kantitatea: 203.780 kg.

      Indukzioko labeetan galdaketan sortutako gasak iragaztearen ondorioz sortzen da; konposizioan zink-oxidoak dituzten hautsak dira. Big-bag poltsetan gordetzen dira lurzoru hormigoiztatuan, baimendutako kudeatzaileari bidali arte.

   2. prozesua: «Desugertze kimikoa».

   1. hondakina: «Azido erabilia (Klorhidrikoa eta Fluorhidrikoa)».

      Identifikazioa: 01359637/01 -3554/2/1.

      Hondakinaren kodea: Q7//D9//L27//C23//H8//A230 (1)//B3137.

      EHZ: 110105 / 110106.

      Urtean sortutako kantitatea: 21.360 kg.

      Desurgertze kimikoan azido klorhidrikoa erabiltzearen hondakin gisa sortzen da. Azido klorhidriko agortua da. Une jakinetan, azido fluorhidrikoaz osatuta ere egon daiteke. 20 m3-ko beira-zuntzezko biltegi hermetiko batean biltegiratzen da, euste-ontziekin.

   2. hondakina: «Flux-opilak».

      Identifikazioa: 01359637/01 -3554/2/2.

      Hondakinaren kodea: Q8//D9//S27//C7/23//H5//A230 (1)//B3129.

      EHZ: 110105.

      Urtean sortutako kantitatea: 15.360 kg.

      Flux agortua berreskuratzeko instalazioan buztinak iragaztean sortzen da. Big-bag poltsetan gordetzen dira lurzoru hormigoiztatuan, baimendutako kudeatzaileari bidali arte.

   3. prozesua: «Mekanizatua».

   1. hondakina: «Ebaketa-likidoa».

      Identifikazioa: 01359637/01 -3554/3/1.

      Hondakinaren kodea: Q7//D9//L27//C51//H5//A230 (1)//B3137.

      EHZ: 120109.

      Urtean sortutako kantitatea: 371.540 kg.

      Mekanizatuko eragiketetan sortzen da hondakin hau. 25 m3-ko beira-zuntzezko biltegi hermetikoetan biltegiratzen da, hormigoizko lurzoruetan.

   4. prozesua: «Koipegabetzea».

   1. hondakina: «Koipegabetzeko ur oliotsuak».

      Identifikazioa: 01359637/01-3554/4/1.

      Hondakinaren kodea: Q8//D9//L9//C51/24//H5//A230(1)/B3140.

      EHZ: 110113.

      Urtean sortutako kantitatea: 41.540 kg.

      Koipegabetzeko eragiketetan sortzen da hondakin hau. 1.000 litroko plastikozko bidoietan ontziratzen da, lurzoru hormigoiztatuan.

   5. prozesua: «Zerbitzu orokorrak».

   1. hondakina: «Olio hidraulikoa».

      Identifikazioa: 01359637/01-3554/5/1.

      Hondakinaren kodea: Q7//R13//L98//C51//H5/6//A230 (1)//B0019.

      EHZ: 130205.

      Urtean sortutako kantitatea: 6.840 kg.

      Mekanizatuko eragiketetan eta beste eragiketa orokor batzuetan sortzen da hondakin hau. 8.000 litroko beira-zuntzezko biltegi hermetiko batean biltegiratzen da, lurzoru hormigoiztatuan.

   2. hondakina: «Mahuken iragazkiak».

      Identifikazioa: 01359637/01-3554/5/2.

      Hondakinaren kodea: Q5//D15//S8//C51//H5//A230 (1)//B0019.

      EHZ: 150202.

      Urtean sortutako kantitatea: 940 kg.

      Mahuka-iragazkien mantentze-lanetan sortzen da hondakin hau. 1.000 litroko edukiera duten kaioletan biltegiratzen da, lurzoru hormigoiztatuetan.

   3. hondakina: «Substantzia arriskutsuak eduki dituzten plastikozko ontziak.»

      Identifikazioa: 01359637/01-3554/5/3.

      Hondakinaren kodea: Q5//R13//S36//C51/41//H5//A230 (1)//B0019.

      EHZ: 150110.

      Urtean sortutako kantitatea: 420 kg.

      Ontzi hutsak biltzen direnean sortzen da; gai arriskutsuak gordetzeko erabili diren plastikozko ontziak dira. Paletetan biltegiratzen dira, hormigoizko lurzoruan.

   4. hondakina: «Gai arriskutsuak eduki dituzten metalezko ontziak».

      Identifikazioa: 01359637/01-3554/5/4.

      Hondakinaren kodea: Q5//R13//S36//C51/41//H5//A230 (1)//B0019.

      EHZ: 150110.

      Urtean sortutako kantitatea: 100 kg.

      Ontzi hutsak biltzen direnean sortzen da; gai arriskutsuak gordetzeko erabili diren ontzi metalikoak dira. Paletetan biltegiratzen dira, hormigoizko lurzoruan.

   5. hondakina: «Pila alkalinoak eta botoi-pilak».

      Identifikazioa: 01359637/01-3554/5/5.

      Hondakinaren kodea: Q6//R13//S37//C16//H14//A230 (1)//B0019.

      EHZ: 200133.

      Urtean sortutako kantitatea: 10 kg.

      Agortutako pila alkalinoak eta botoi-pilak dira. Kutxetan biltegiratzen dira, lurzoru hormigoiztatuan.

   6. hondakina: «Bustitako trapuak eta xurgatzaileak».

      Identifikazioa: 01359637/01-3554/5/6.

      Hondakinaren kodea: Q7//D15//S8//C51//H5//A230 (1)//B0019.

      EHZ: 150202.

      Urtean sortutako kantitatea: 11.000 kg.

      Instalazioak garbitzeko eragiketetan eta mantentze-lanetan sortzen da hondakin hau. Bidoietan biltegiratzen dira, lurzoru hormigoiztatuan.

   7. hondakina: «Baztertutako ekipamendu elektrikoak eta elektronikoa».

      Identifikazioa: 01359637/01-3554/5/7.

      Hondakinaren kodea: Q14//R13//S40//C6/18//H6//A230 (1)//B0019.

      EHZ: 160213.

      Urtean sortutako kantitatea: 50 kg.

      Ekipo elektrikoak eta elektronikoak birjartzean sortzen da; baztertutako ekipo ofimatikoak dira. Kutxetan biltegiratzen dira, lurzoru hormigoiztatuan.

   6. prozesua: «Botikina».

   1. hondakina: «Hondakin sanitarioak».

      Identifikazioa: 01359637/01-3554/6/1.

      Hondakinaren kodea: Q16//D15//S1//C35//H9//A230 (1)//B0019.

      EHZ: 180103.

      Urtean sortutako kantitatea: 1 kg.

      Zerbitzu Medikoaren azpiprozesuan sortzen da; hondakin ebakitzaileak eta zorrotzak dira. 1 kg-ko edukiontzi hermetiko batean biltegiratzen dira, lurzoru hormigoiztatuan.

      1. Hondakin arriskutsuak biltzeko sistemak bereiziak izango dira, duten tipologia dela-eta, isuriren bat gertatuz gero, nahasi, arriskutsuago bihurtu edo kudeaketa zaildu dezaketen kasuetan.

      2. Hondakin arriskutsuak dituzten ontziek uztailaren 20ko 833/1988 Errege Dekretuak (maiatzaren 14ko 20/1986 Oinarrizko Legea, hondakin toxiko eta arriskutsuei buruzkoa, betearazteko oinarrizko araudia onartzen du Dekretu horrek) 13. artikuluan ezarritako segurtasun-arauak kontuan izan beharko dituzte; itxita egongo dira kudeatzaileak jaso arte, isuri edo lurrundu ez daitezen.

      3. Aurreko paragrafoan aipatzen diren ontziek etiketatuta egon beharko dute, eta etiketak argia, irakurtzeko modukoa eta ezabaezina izan beharko du; etiketa 1988ko uztailaren 20ko 833/1988 Errege Dekretuak 14. artikuluan horretarako adierazitako jarraibideen araberakoa izango da.

      4. Berariazko hondakin sanitarioak (II. taldea) manipulatu, ontziratu, etiketatu eta biltegiratzeko baldintzak martxoaren 26ko 76/2002 Dekretuan, Euskal Autonomia Erkidegoan hondakin sanitarioak kudeatzeko baldintzak arautzen dituenean, eta hori garatzeko araudietan ezarritakoak izango dira.

      5. Hondakin arriskutsuek ezin izango dute 6 hilabete baino gehiago biltegiratuta egon.

      6. Hondakinak kudeatzaile baimenduaren instalazioetara eraman aurretik, nahitaezko baldintza izango da agiri baten bidez egiaztatzea kudeatzaile baimendu horrek hondakinak onartu dituela. Agiri horretan hondakinak onartzeko baldintzak ezarriko dira, eta egiaztatu egingo da tratatu beharreko hondakinaren ezaugarriak administrazio-baimenarekin bat datozela. Agiri hori Ingurumen Sailburuordetzara bidaliko da hondakina lehenengoz erretiratu aurretik, eta, behar izanez gero, hondakinen kudeatzaile berri batengana eraman aurretik. Beharrezkoa izanez gero, karakterizazio xehatua egingo da, proposatutako tratamenduaren egokitasuna egiaztatzeko. Hala badagokio, arrazoitu egin beharko da proposatutako kudeaketa-modua ebazpen honetan jasotzen diren hondakinen kudeaketari buruzko printzipio hierarkikoei egokitzen zaiela.

      7. Hondakin arriskutsuak eraman aurretik eta, hala badagokio, araudian ezarritako aurretiazko jakinarazpena egin ondoren, kontrolerako eta jarraipenerako agiria bete beharko da. Agiri horren ale bat garraiolariari emango zaio, eta zamarekin batera eraman beharko da jatorritik helmugaraino. Atusa Empresarial, S.L.U. enpresak artxibategian erregistratu eta gorde beharko ditu onarpen-agiriak eta kontrolerako zein jarraipenerako agiriak, edo horien agiri ofizial baliokideak, bost urtean gutxienez.

      8. Egiaztatu egin beharko da hondakin arriskutsuak baimendutako kudeatzailearen instalazioetara eramateko erabiliko den garraiobideak betetzen dituela indarrean dagoen legerian horrelako gaiak garraiatzeko xedatutako baldintzak.

      9. Atusa Empresarial, S.L.U. enpresak sortutako olio erabilia kudeatu beharko du, ekainaren 2ko 679/2006 Errege Dekretuak, industriako olio erabiliaren kudeaketa arautzen duenak, xedatutakoaren arabera, eta irailaren 29ko 259/1998 Dekretuak, Euskal Autonomia Erkidegoaren eremuan erabilitako olioen kudeaketa arautzen duenak, xedatutakoari jarraiki.

      10. Ekipo elektrikoen eta elektronikoen hondakinak (hodi fluoreszenteak ere hondakin mota horietakoak dira) 208/2005 Errege Dekretuan, otsailak 25ekoan, aparatu elektriko eta elektronikoen eta horien hondakinen kudeaketari buruzkoan, ezarritakoaren arabera kudeatuko dira.Halaber, pilen eta metagailuen hondakinek bete beharko dute otsailaren 1eko 106/2008 Errege Dekretuak, pilei eta metagailuei eta haien hondakinen ingurumen-kudeaketari buruzkoak, xedatutakoa.

          Kudeatzaile baimenduak egindako onarpen-agiria izateari, aurretiazko jakinarazpena egiteari eta kontrolerako eta jarraipenerako agiria betetzeari buruzko neurriak ez dituzte bete beharko kudeaketa-sistema bateratuen kudeaketa-azpiegiturara entregatutako hondakinek, edo udal-hondakinekin eta gaika bildutako izaera berekoekin bateratu daitezkeenekin batera kudeatzeko udal-erakundeetara emandakoek, betiere dagokion udal-erakundearen aldetik entrega hori egiaztatzen baldin bada. Toki-erakundeei eman-izanaren egiaztagiriak gutxienez bost urtez gorde beharko dira.

          Nolanahi ere, hondakinak sortzeko kontrol-erregistroan sortutako ekipo elektriko eta elektronikoen hondakinen kantitateak adieraziko dira.

      11. Atusa Empresarial, S.L.U. enpresak poliklorobifeniloak (PCB) dituzten edo izan ditzaketen aparatuak dauzkan bitartean, haiek behar bezala kudeatzeko abuztuaren 27ko 1378/1999 Errege Dekretuan, poliklorobifeniloak, polikloroterfeniloak eta horiek dituzten aparatuak ezabatzeko eta kudeatzeko neurriak ezartzen dituen horretan, eta hori aldatu zuen otsailaren 24ko 228/2006 Errege Dekretuan adierazitako baldintzak bete beharko ditu.

      12. Atusa Empresarial, S.L.U. enpresak Europako Parlamentuaren eta Kontseiluaren 2000ko ekainaren 29ko 2037/2000 (EE) Erregelamenduan, ozono-geruza agortzen duten substantziei buruzkoan, zehazturiko substantzia erabiliak bere eskuetan dituen heinean, berreskuratu egingo dira, aldeek onetsitako bitarteko teknikoen bidez edo ingurumenaren ikuspegitik onargarria den beste edozein deuseztatze-bide tekniko erabiliz deuseztatzeko, edota birziklatzeko edo birsortzeko erabiliko dira, aparatuak berrikusteko edo mantentzeko lanetan nahiz desmuntatu edo deuseztatu aurretik.

      13. Atusa Empresarial, S.L.U. enpresak urtero adierazi beharko dio Ingurumen Sailburuordetzari sortutako hondakin arriskutsuen jatorria zein den, zein kopuru sortu den, zein erabilera emango zaion eta adierazpenaren xede den ekitaldiaren amaieran aldi baterako biltegiratuta daudenen zerrenda.

      14. Erregistro bat edukiko du, hondakin arriskutsuei buruzko datu hauek agerrarazteko: kopurua, izaera, identifikazio-kodea, jatorria, tratatzeko metodo eta tokiak, sorrera eta lagapen datak, jasotzeko maiztasuna eta garraiatzeko modua, uztailaren 20ko 833/1988 Errege Dekretuaren 17. artikuluan ezarritakoa betez, eta uztailaren 20ko 952/1997 Errege Dekretuaren bidezko aldaketan ezarritakoa betez. Sei hilean behin, kontrolerako erregistro horren kopia bidaliko da Ingurumen Sailburuordetzara.

      16. Hondakin arriskutsuen kudeaketako funtsezko oinarriak bete daitezen, hau da, hondakin horiek ahal den gutxiena sortzeko, Atusa Empresarial, S.L.U. enpresak neurri babesleak erabiliz hondakin arriskutsuen sorrera gutxitzeko plana aurkeztu beharko du Ingurumen Sailburuordetzan, gutxienez lau urtean behin.

      17. Aurreko f) eta g) (kudeatzaileak EAEn daudenean), m) eta n) ataletan adierazitako agiriak Ingurumen Sailburuordetzara bidaliko dira, ahal dela transakzio elektroniko bidez, IKS-L03 Sistemaren erakundeentzako bertsioa erabilita.

      18. Amiantoa duten hondakinak antzemanez gero, Atusa Empresarial, S.L.U. enpresak 108/1991 Errege Dekretuan, amiantoak ingurumenean sortzen duen kutsadura saihestu eta gutxitzekoan, ezarritako eskakizunak bete beharko ditu. Era berean, amiantoa duten hondakinak kudeatzeko egingo diren manipulazioak martxoaren 31ko 396/2006 Errege Dekretuan ezarritako aginduen arabera burutuko dira; dekretu horren bidez ezarri ziren amiantoarekin lan egitean segurtasun- eta osasun-arloan bete behar diren gutxieneko baldintzak.

      19. Hondakin arriskutsu bakoitzari dagokion izendapena eta kodifikazioa ezartzen zaio, hondakin bakoitzaren egoera eta ezaugarrien arabera, baimena izapidetzerakoan jasotako informazioa oinarri hartuta. Kode batzuek aldaketaren bat izan badezakete ere, beste batzuk, oinarrizkoak direlako, aldatu gabe utzi behar dira ekoizpen-jardueran. Hondakina zein motatakoa den eta zein osagai arriskutsu dituen (ekainaren 20ko 952/1997 Errege Dekretuaren I. eranskinean xehetasunez jasota) definitzen dute, bai eta hondakina zein jarduerak eta zein prozesuk sortzen duen ere (uztailaren 20ko 833/1988 Errege Dekretuaren I. eranskinean xehetasunez jasota). Kudeaketa-bideetan hierarkizazioa zuzena dela egiaztatzeko, eta bai Hondakinak Kudeatzeko Europako Estrategian bai Euskal Autonomia Erkidegoko Ingurumeneko Esparru Programan (2007-2010) ezarritakoa betetzen dela bermatzeko, hondakin bakoitzaren onarpen-agirietan jasotako informazioa organo honek onartu beharko du, dagokion kudeatzaile baimenduak horretarako eskaria egin ostean. Egiaztatzeak garrantzi berezia izango du, batez ere, berreskurapena edo balioa ematea kudeatzeko eragiketa-kodearen arabera kudeatu diren hondakinen onartze-agirietan lagatze- edo ezabatze-kodeak balioztatzeko eskatzen bada.

          3.2. Arriskurik gabeko hondakinak.

          Sustatzaileak adierazitako hondakin ez-arriskutsuak hauek dira:

          (Ikus .PDF)

          • Urtean gutxi gorabehera hondarren zenbat hondakin ekoizten den bidali beharko da.

            1. «Hondarrak» izeneko hondakinaren kasuan, hondakin horrek ispilu-sarrera du gaur egun indarrean dagoen hondakinen Europako zerrendan. Bada, horiek hondakin ez-arriskutsutzat hartuko dira, baldin eta lehenengo aldiz ebaluatu baino lehen karakterizatzen badira; karakterizazio horren emaitzak Ingurumen Sailburuordetzara bidali beharko dira, proposatutako kudeaketa egokia ote den egiaztatzeko. Baldin eta hondakina arriskutsua dela ezartzen bada, Ebazpen honetako B.3.1 idatz-zatian jasotako xedapenak aplikatuko dira.

               Zehazki, aintzat hartu beharko da hondarrek kromita, zirkonioa eta olibinoa duten, eta horrela baldin bada, metal astunak zehaztu beharko dira. Adizioko produktuak, moldekatzearen propietateak hobetzen dituztenak (harrikatz-hautsa, betunak, erretxinak, olioak eta beren nahasteak), modu berean hartuko dira, eta isuri gabeko hondakin-hondarrei ezaugarri arriskutsuak esleitu ahal izango dizkie, haiek egoteagatik (BTEX,s eta PAH, arriskutsutzat hartzeko kantitate nahikotan).

            2. Erabilitako ontziak eta ontzi-hondakinak gaika behar bezala bereizi eta eragile ekonomiko bati emango zaizkio hornitzaileari, erabilitako ontzien kasuan berriro erabili ahal izateko; ontzi-hondakinak, berriz, berreskuratzaile, birziklatzaile edo balioztatzaile baimendu bati emango zaizkio.

            3. Hondakin horiek ezabatzeko direnean, ezin dira urtebete baino gehiagoz biltegiratuta eduki; hondakinen azken helburua balioa ematea denean, 2 urtez gorde ahal izango dira.

            4. Oro har, hondakin guztiak hustu aurretik, kudeatzaile baimendu batek emandako onarpen-agiria izan beharko dute, onarpen horretarako baldintzak zehaztuta. Agiri horren kopia bidali behar zaio Ingurumen Sailburuordetzari, proposatutako kudeaketa egokia dela eta ebazpen honetan ezarritako oinarrizko printzipioak betetzen direla egiaztatzeko. Hala badagokio, arrazoitu egin beharko da proposatutako kudeaketa-modua ebazpen honetan jasotzen diren hondakinen kudeaketari buruzko printzipio hierarkikoei egokitzen zaiela. Atusa Empresarial, S.L.U. enpresak artxibategian erregistratu eta gorde beharko ditu onarpen-agiriak, edo horien agiri ofizial baliokideak, aginduzkoak direnean, bost urtean gutxienez.

            5. Halaber, otsailaren 24ko 49/2009 Dekretuarekin, hondakinak zabortegian utzita eta betelanak eginda ezabatzea arautzen duenarekin bat etorriz, hondakin ez-arriskutsuak zabortegi baimendu batera eraman aurretik, jarraipenerako eta kontrolerako dagokion agiria bete beharko da. Agiri horiek bost urtez gorde beharko dira.

            6. Erregistro bat edukiko du, eta bertan, ondorengo datu hauek jasoko dira: kopurua, izaera, identifikazio kodea, jatorria, tratatzeko metodo eta tokiak, sorrera eta lagapen datak, jasotzeko maiztasuna eta garraiatzeko modua. Urtero, Ingurumen Sailburuordetzari bidaliko zaio kontrolerako erregistro horren kopia.

            7. Aipatutako d) eta e) (kudeatzaileak EAEn daudenean) eta f) ataletan adierazitako agiriak Ingurumen Sailburuordetzara bidaliko dira, ahal dela transakzio elektroniko bidez, IKS-eeM Sistemaren erakundeentzako bertsioa erabilita.

               4. Lurzorua babesteko baldintzak.

               Urtarrilaren 14ko 9/2005 Errege Dekretuan eta otsailaren 4ko 1/2005 Legean ezarritako agindua betez lurzoruaren egoerari buruz aurkeztu duten aurretiazko txostenean jasota dauden gomendioen arabera, Atusa Empresarial, S.L.U. enpresak Ebazpen honetako bigarren ataleko F.3. azpiatalean ezohiko jardunean aplikatzeko prebentzio eta jarduerari buruzkoak, eta Ebazpen honetako B.3. atalean hondakinak gordetzeari buruzkoak jasotako neurriak hartuko ditu.

               Lurrak mugitzea dakarten obrak egin behar baditu, sustatzaileak hondeatu beharreko materialak (lurrak, obra-hondakinak, etab.) bereizi beharko ditu, egiaztatu ahal izateko, lurra kutsa dezaketen jardueren ondorioz benetan kutsatu ote diren, eta zehaztu ahal izateko, bereiztearen emaitzak ikusita, zein den material horiek kudeatzeko biderik egokiena.

               Bereiztearen emaitzak Ingurumen Sailburuordetzara bidali beharko dira, baloratu ditzan, eta kudeatu aurretik egin beharko da hori.

               Lurzorua ez kutsatzeko eta kutsatutakoa garbitzeko otsailaren 4ko 1/2005 Legeko 10. artikuluko 2. paragrafoak ezarritakoa betez, jarduera ezartzeko edo zabaltzeko hondeatze-lanetan edo lur-mugitzeetan kutsadura-zantzuak hautematen badira, lan horien arduradun zuzenak horren berri eman beharko dio udalari eta Ingurumen Sailburuordetzari, hartu beharreko neurriak ezar ditzan sailburuordetzak, 17. artikuluko seigarren paragrafoak ezarritakoa betez, beharrezkoa izango balitz.

               Lurzoruei buruzko aurretiazko txostenean ez zegoen jasota enpresan dagoen zabortegi-instalazioei buruzko xedapen bakar bat ere, eta hori dela eta, txostena hedatu egin beharko da. Instalazio horri atxikitako arriskuen ebaluazioa eman beharko da.

               Hondakin ez-arriskutsuen zabortegiarekin lotuta, egokitzapen-proiektu bat aurkeztu beharko da Ingurumen Sailburuordetzan. Proiektu horrekin batera, «49/2009 Dekretuaren, otsailaren 24koaren, hondakinak hondakindegietan biltegiratuta eta betelanak eginda ezabatzea arautzen duenaren» 16. artikuluan zerrendatutako dokumentazioa aurkeztu beharko da.

               Era berean, 1481/2001 Errege Dekretuaren, abenduaren 27koaren, hondakinak zabortegietan utzi eta ezabatzeko era arautzen duenaren, 1. eranskinean ezarritako betekizunak bete beharko ditu egokitzapen-proiektuak, zabortegi-gordailuaren bidez, batez ere, lurzorua eta urak babesteko 3. puntuari dagokionez.

               Dokumentazioa aztertu ondoren, ingurumen-organo horrek eragiketen jarraipenari buruzko behin betiko erabakia hartuko du edo, aitzitik, beharrezko neurriak hartuko ditu, instalazioak ahalik eta azkarren ixteko, «1481/2001 Errege Dekretuaren, abenduaren 27koaren, hondakinak zabortegietan utzi eta ezabatzeko era arautzen duenaren» 8.1. artikuluaren b) paragrafoko bederatzigarren tartekian eta 14. artikuluan xedatutakoari jarraiki.

               5. Zaratari buruzko baldintzak.

            1. Ondorengo indize akustikoak gaindi ez daitezen beharrezko neurri guztiak ezarriko dira:

               1) Jarduera maila hauei egokitu behar zaie: etxebizitzen barrualdean entzungo den LAeq,60 segundo zarata-indizeak ezin izango du inoiz ere 40 dB gainditu, 07:00ak eta 23:00ak bitartean, leiho eta ateak itxita, ezta LAmax indizeak 45 dB ere.

               2) Jarduera maila hauei egokitu behar zaie: etxebizitzen barrualdean entzungo den LAeq,60 segundo zarata-indizeak ezin izango du inoiz ere 30 dB (A) gainditu, 23:00ak eta 7:00ak bitartean, leiho eta ateak itxita, ezta LAmax indizeak 35 dB (A) ere.

               3) Jarduerak ez du 1. taulan adierazitakoa baino zarata handiagoa egingo, 4 m-ko garaieran neurtuta (egoera berezietan izan ezik, horietan apantailamenduak saihesteko beharrezko garaiera hartuko da), industria-esparruaren kanpoaldeko itxituraren perimetro osoan.

               (Ikus .PDF)

               1. taula. Industria-esparruaren kanpoaldeko itxituran eskatutako zarata-mailak.

                  Abian den instalazioak, 1. taulan finkatutako mugak betetzeaz gain, ez du eguneko inolako baliotan (LAeq,d, LAeq,e eta LAeq,n) 1. taulan adierazitako balioak baino 3 dB-etik gorako gehikuntzarik gaindituko.

                  Gainera, jardueraren gainerakotik bereizitako prozesuaren jardun-modu bat baldin badago, jardun-modu horri lotutako zarata-maila bat zehaztu beharko da (LAeq,Ti). Ti jardun-modu horren iraupen-denbora izango da. Maila horrek ez ditu 1. taulan finkatutako balioak 5 dB-etan gaindituko.

            2. Jardueraren zuzeneko edo zeharkako eraginez zaratarentzat ezarritako kalitate akustikoaren helburuak gainditzen direnean, hain zuzen ere, zaratari buruzko azaroaren 17ko 37/2003 Legean garatzen den zonakatze akustikoari, kalitate-helburuei eta igorpen akustikoei buruzko urriaren 19ko 1367/2007 Errege Dekretuaren 14. eta 16. artikuluetan adierazten direnak, jarduerak beharrezko neurriak hartu beharko ditu helburu horiek gainditu ez daitezen.

            3. Zamalanetan eta materiala kamioietan garraiatzean egiten den zaratak ez du handituko sentsibilitate akustiko handieneko guneetako zarata-maila.

            5. Ingurumena Zaintzeko Programa.

               Ingurumena zaintzeko programa sustatzaileak aurkeztutako agirietan aurreikusitakoaren eta ondoko atal hauetan ezarritakoaren arabera gauzatu beharko da:

               1. Atmosferarako isuriak kontrolatzea.

            1. Atusa Empresarial, S.L.U. enpresak isurien kontrola egin beharko du, informazio honi jarraituz:

               (Ikus .PDF)

            2. Aurreko atalean aipatutako neurketa guztiak kontrol erakunde baimendu batek (KEB) egin beharko ditu (ordubeteko hiru neurketa, gutxienez, zortzi orduan zehar neurtuta; eta dioxinak eta furanoak ere neurtzen direnean, 6-8 orduko neurketa bat), eta aldizkako kontrol horiei buruzko txostenak Ingurumen Sailburuordetza honek prestatutako «KEBen gutxieneko txostenean» ezarritakoaren arabera egin beharko dira. Nolanahi ere, isurtzeko kontrolek eta baldintzek Ingurumen Sailburuordetzaren jarraibide teknikoetan eskatutako baldintza guztiak bete beharko dituzte.

            3. Baimendutako kontrol erakundeak adierazitako parametro guztiak neurtu eta horien gainean egiten dituzten txostenak bidali beharko dira. Neurketa berriak egin beharko dira, baldin eta parametroen neurketarik ez badago edo egindako neurketak ebazpen honetan ezarritako kontrol-maiztasunaren aurretik egindakoak badira. Isuri atmosferikoen ondorengo kontrolak egindako azken neurketarekiko adierazitako maiztasunarekin egingo dira.

               2008ko apirilaren 30a baino beranduago aurkeztutako neurketen BKE txostenek IT-DPECA-EA-IPPC-03, IT-DPECA-EA-IPPC-04 eta IT-DPECA-EA-IPPC-05 instrukzio teknikoetan adierazitakoa beteko dute Eusko Jaurlaritzako Ingurumen, Lurralde Plangintza, Nekazaritza eta Arrantza Sailaren web-ean eskura daitezke- eta txostenak kontuan hartuko du «IPPC instalazioetan BKEren gutxieneko edukiari buruzko instrukzioa», eta web-orrian eskura daiteke hau ere: http://www.ingurumena.ejgv.euskadi.net/r49-3614/es/contenidos/informacion/aire_ippc/es_aireippc/indice.html.

            4. Erregistro bat egin beharko da euskarri informatikoan edo, horrelakorik ezean, paperean, agiri gaurkotuak erabilita, eta 1976ko urriaren 18ko Aginduak, industriak atmosferan sortzen duen kutsadura saihestu eta zuzentzekoak, 33. artikuluan ezarritako edukia jaso beharko du. Erregistro horretan adieraziko dira egin diren neurketen emaitzak, mantentze-eragiketak, garbiketa, aldiroko berrikuspenak, matxurengatiko geldialdiak, egiaztapenak, edozein motako gertaerak, eta abar. Dokumentazio guztia eguneratuta edukiko da eta ingurumen-ikuskarien eskura egongo da.

               2. Isuritako uraren kalitatearen kontrola.

            1. Sustatzaileak aurkeztu dituen agirien arabera, ondorengo analisiak egingo dira:

               (Ikus .PDF)

               Isurketen kontrol-kutxeten UTM koordenatuak aurkeztu beharko ditu sustatzaileak.

            2. Kanpoko kontrol bakoitza, bai laginak hartzea, bai ondorengo analisia, «erakunde laguntzaile» batek egin eta egiaztatuko du, eta goian aipatutako parametroak hartuko dira kontuan. Sustatzaileak isuri-puntu bakoitzeko lagin hartu berri baten analisia aurkeztu beharko du gutxienez; lagina 24 orduko ur-emariarekiko proportzionala izango da, edo bestela, lagin puntual esanguratsua.

               Isurketen kontrolen emaitzak Ingurumen Sailburuordetzara bidaliko dira laginak hartzen direnetik hilabete bateko (1) epean.

               Purgetako urentzat, lehen urtean, hiru hilean behin uren analisi bat egiteko eskatuko da, eta bigarren urtetik aurrera, kontrol analitikoa sei hilean behin egin ahal izango da, emaitzak onak badira.

            3. Laginketak kutsatzaile gehien sortzen den aldietan egingo dira.

            4. Isuriak baimenean jarritako baldintza guztiak betetzen dituela ulertuko da, B.2.3 atalean adierazitako parametro guztiek ezarritako mugak betetzen badituzte.

            5. Titularrak urtero aurkeztu beharko du lehen aipatutako maiatzaren 23ko 606/2003 Errege Dekretuaren Hirugarren Xedapen Gehigarriak barne hartutako substantzia arriskutsuak dituzten isuriak daudela aitortzen duen agiria. Adierazpen horretan ekoizte-prozesuan manipulatu diren substantzia guztiak adierazi behar dira, nahiz eta isurian ez detektatu.

            6. Titularrak aldizkako txostena igorriko die Ingurumen Sailburuordetzari eta kolektorearen kudeaketa-organoari, eta bertan datu hauek azalduko dira:

               Hiru hilean behin: isuriaren adierazpen analitikoa, efluentearen emariari eta konposizioari dagokionez (hiruhilekoan egindako efluenteen kontrol-analisi guztiak barne egongo dira).

               Urtero: tratamendu-sistemaren ustiapenean izandako gorabeheren deklarazioa eta isuriaren hobekuntzan lortutako emaitzak.

               3. Jardueraren adierazleak kontrolatzea.

               Sustatzaileak jardueraren funtzionamenduaren adierazle hauen jarraipena egingo du urtero, ingurumenean duten eragina aztertzeko:

               (Ikus .PDF)

               4. Zarataren kontrola.

            1. Hiru urtean behin, Ld, Le, Ln, LAeq,Ti eta LAeq,60 segundo indize akustikoen ebaluazioak egin beharko dira. Kontroleko lehen urtean izandako emaitzen arabera erabakiko da aurrerantzean neurketak egiteko maiztasuna.

            2. Aurreko atalean adierazitako ebaluazio guztiak ENAC erakundeak espazio- eta denbora-laginketarako egiaztatutako akustikaren esparruko entsegu-laborategiek egin beharko dituzte. Nolanahi ere, ingurumen organoak ebaluazio horiek egiten dituzten erakundeek gaitasun tekniko egokia dutela zainduko du.

            3. Ebaluazio-metodoak eta -prozedurak eta ebaluazio horiei buruzko txostenak Ingurumen Sailburuordetza honek emandako jarraibide teknikoetan ezarritakora egokituko dira.

               5. Emaitzak kontrolatu eta bidaltzea.

               Ingurumena zaintzeko programa osatzen duten txosten eta analisien emaitzak behar bezala erregistratu eta Ingurumen Sailburuordetzara bidaliko dira. Ingurumena zaintzeko programaren emaitzak urtean behin bidaliko dira, beti martxoaren 30a baino lehen, ingurumenean aditua den erakunde aske batek egindako txostenarekin batera. Txosten horretan adieraziko dira neurri zuzentzaileen funtzionamendua, eta prozesuak eta ingurunearen kalitatea kontrolatzeko sistemak. Emaitzen analisia ere adieraziko da, eta bereziki aipatuko dira aldi horretan gertatu diren gorabehera garrantzitsuenak, horien ustezko arrazoiak eta konponbideak, eta baita laginketen xehetasunak ere, aurretik zehaztu ez baldin badira.

               6. Ingurumena zaintzeko programari buruzko agiri bategina.

               Sustatzaileak ingurumena zaintzeko programaren agiri bategina landu beharko du, aurkeztu dituen agirietan eta ebazpen honetan proposatutako betebeharrak bilduz. Programa horrek zehaztu behar ditu kontrolatu beharreko parametroak, parametro bakoitzarentzako erreferentzia-mailak, analisi edo neurketen maiztasuna, laginketarako eta analisirako teknikak, eta laginketa-puntuen kokaleku zehatza. Halaber, dagokion aurrekontua adierazi beharko du.

               Era berean, ingurumena zaintzeko programak jardueraren adierazleak zehaztu eta adierazle horiek aztertzeko sistematika barruan izan beharko du, horien arabera enpresan bertan ingurumen-hobekuntza ziurtatzearren ezarritako neurri eta mekanismoen eraginkortasuna egiaztatu ahal izateko (ingurumen-adierazleak).

            6. Prebentzio-neurriak eta funtzionamendu-baldintzak ohiz kanpoko egoeretan.

               1. Fabrika gelditzeko eta abiarazteko eragiketak eta mantentze-lanetarako programatutako eragiketak.

               Programatutako mantentze-lanei dagokienez, botako diren kutsagarriak eta sortuko diren hondakinen balioespena egin beharko du enpresak, eta dagokionean, horiek kudeatzeko eta tratatzeko proposamena ere.

               2. Jarduera uztea.

               Jarduera lege hauen aplikazio-esparrukoa da: lurzorua ez kutsatzeko eta kutsatutakoa garbitzeko otsailaren 4ko 1/2005 Legea («27.1. epigrafea. Burdinazko, altzairuzko eta ferroaleaziozko oinarrizko ekoizkinak egitea (IAEE)») eta kutsadura sor dezaketen jardueren zerrenda eta lurzoru kutsatuen adierazpenerako irizpide zein estandarrak ezartzen dituen urtarrilaren 14ko 9/2005 Errege Dekretua. Hori dela-eta, Atusa Empresarial, S.L.U. enpresak hasiera eman beharko dio lurzoruaren kalitatearen adierazpenerako prozedurari, gehienez ere bi hilabeteko epean, jarduera behin betiko uzten duenetik kontatzen hasita, otsailaren 4ko 1/2005 Legeak 17.4. artikuluan xedatutakoaren arabera. Goian adierazitako xedapenak zabortegiaren instalazioari ere aplikatu beharko zaizkio.

               3. Ezohiko funtzionamendua denean aplikatzeko prebentzio-neurriak eta jardunak.

               Sustatzaileak aurkeztutako oinarrizko proiektuan egindako proposamenean ezohiko egoeretan aplikatu beharreko prebentziozko neurriak eta jardunerako baldintzak zehazten dira. Horiez gain, ondorengo ataletan aipatzen diren baldintzak bete behar dira:

            1. Prebentziozko mantentze-lanen eskuliburua eduki beharko da instalazioen egoera ona bermatzeko, batez ere ustekabeko jario edo isuriak daudenean kutsadura ekiditeko eskuragarri dauden baliabideei eta segurtasun-neurriei dagokienez. Isuri-ihesak daudenean lurzorua babesteko hartu beharreko neurriak zehaztuko dira, eta zehatz adieraziko da hauei dagokien guztia: eraikuntzako materialak (iragazgaiztea), biltegiratzeko neurri bereziak (gai arriskutsuak), egon daitezkeen isuri-ihesak antzemateko neurriak edo gainbetetzerako alarma-sistemak, lantegiko kolektore-sarea zaindu eta garbitzekoak (sistematikoki garbitzeko beharra, maiztasuna, garbiketa mota), eta lurzoruaren gaineko isuriak biltzeko sistemak.

            2. Aurreko paragrafoan adierazitako eskuliburuak ikuskaritza eta kontrolerako programa jaso beharko du, hauek bilduko dituena: estankotasun-probak, mailen eta adierazleen egoera, balbulak, presioa arintzeko sistema, hormen egoera eta lodieren neurketa, andelen barnealdearen begi-bidezko ikuskaritzak (hormena eta estaldurena) eta kubetetako detekzio-sistemen aldizkako kontrol sistematikoa, zorua kutsa dezakeen edozein egoerari aurre hartzeko.

            3. Goian aipatutako prebentziozko mantentze-lanen eskuliburuan, atmosferaren kutsadurari aurre hartzeko eta zuzentzeko (arazketa, minimizazioa, eta abar) sistemen egoera ona gehitu behar dira.

            4. Era berean, ustiapenari buruzko eskuliburu bat eduki behar da, eta bertan, aldizka egindako mantentze-lanen berri eman behar da, baita antzemandako gertaerena ere.

            5. Besteak beste, olioak, erregaiak, produktu kimikoak, zepak eta orokorrean, instalazioan sortutako hondakinak maneiatzeak lurzoruak eta ura kutsa ditzake. Beraz, isuriak, jarioak edo ihesak gertatzeko arriskua izan dezaketen lursailen azalera guztiak iragazgaiztuko dira.

            6. Prozesurako behar diren lehengaiak, erregaiak eta produktuak ingurunean ez sakabanatzeko moduan biltegiratuko dira.

            7. Hautsezko produktuak biltegiratzeko, iragazkiak dituzten zulo itxiak izango dira.

            8. Segurtasun-tarteei eta babes-neurriei dagokienez, egiaztatu egin beharko da biltegiratzeko instalazio horiek bete egiten dituztela produktu kimikoak biltegiratzeari buruz indarrean dagoen araudian ezarritako betebeharrak. Egiaztapen hori egiteko, Ingurumen Sailburuordetza honi aurkeztuko zaizkio eskumena duten erakundeek emandako egiaztagiriak.

            9. Larrialdirik gertatuz gero, berehala eta eraginkortasunez esku hartzeko beharrezkoak diren material guztiak edukiko dira, kantitate nahikoan: berriro ontziratzeko erreserbako edukiontziak, beharrezkoa izanez gero; gerta daitezkeen isuriei eusteko produktu xurgatzaile selektiboak, segurtasuneko edukiontziak, hesiak eta kaltetutako ingurunean isolatzeko seinaleztapen-elementuak eta babes pertsonalerako ekipamendu bereziak.

            10. Ingurumen Sailburuordetzara bidaliko da kubetak husteko eragiketak kontrolatzeko protokolo edo agiri bidezko prozedura; eraginkortasunean eragin dezaketen produktuen jarioak ez dira tratamendu-instalaziora eramango.

            11. Hidrokarburoen bereizgailuak aldian-aldian ikuskatuko dira, hondakinak pilatu ez daitezen (buztinak, olioak eta koipeak); dekantagailuetan eta bereizgailuetan metatutako lohiak eta flotatzaileak aldian-aldian kendu behar dira. Hondakin horiek baimendutako kudeatzaile bati emango zaizkio.

            12. Gordailu edo putzuen hondoan pilatzen diren solidoak ez dira ibai-ibilgura hustuko aldizkako garbitze-lanetan zehar; behar bezala kudeatuko dira edo zabortegi baimendura eramango dira.

            13. Arazketa-prozesuan pilatutako hondakin solidoak eta lohiak aldizka aterako dira instalazioa behar bezala ibil dadin. Behar izanez gero, andel iragazgaitzetan eta hondoan hustubiderik ez dutenetan biltegiratuko dira.

            14. Inoiz ez dira pilatuko euri-uren jariatzearen ondorioz ibilgu publikoko ura kutsatzeko arriskua egon daitekeen guneetan.

            16. Hobi septikoaren sistemak garbitze- eta mantentze-lan egokia izango du errendimendu ona ziurtatzeko. Aldizka enpresa espezializatu batek erretiratuko ditu pilatutako solido eta lohiak, eta iragazki biologikoaren ohantzea garbituko du, eta garbiketan arrastatutako solidoak ibilgura hustea saihestuko da.

            17. Urtean behin instalazio horien garbiketaren eta mantentze-lanen fakturaren kopia bat bidaliko da.

            18. Larrialdi-egoeretan, babes zibileko legeria aplikatuko da, eta bertan ezarritako betekizun guzti-guztiak bete beharko dira.

            19. Titularrak behar diren bitartekoak izango ditu arazketa-instalazioak zuzen ustiatzeko eta ustekabeko isuriak prebenitzeko hartu diren segurtasun-neurriak abian izateko.

            20. Ingurunearen edo jardueraren kontrolaren gainean kalteak eragin ditzakeen gorabehera edo ezohiko gertaeraren baten aurrean, gorabehera edo ezohiko gertaera horren berri eman beharko dio berehala Ingurumen Sailburuordetzari.

            21. Gertakari edo arazo larriren bat edo atmosferara ustekabeko isuriren bat eginez gero, Ingurumen Sailburuordetzari jakinarazteaz gain, SOS Deiak eta Udalari ere jakinarazi beharko zaie berehala. Ondoren, eta gehienez ere 48 orduko epean, ezbeharrari buruzko txosten xehatua bidali beharko da Ingurumen Sailburuordetzara. Txosten horretan, gutxienez, honako datu hauek agertuko dira:

                Gertakari mota.

                Gertakaria non, zergatik eta zer ordutan gertatu den.

                Iraupena.

                Ustekabeko isuria bada, emaria eta isuritako gaiak.

                Mugak gaindituz gero, isuriei buruzko datuak.

                Eragindako kalteen balioespena.

                Hartutako neurri zuzentzaileak.

                Prebentziozko neurriak berriro gerta ez dadin.

                Prebentziozko neurriak eraginkortasunez aplikatzeko aurreikusitako epeak.

            22. Instalazioek suteen aurkako babesari buruz araudian ezarritako betekizunak betetzen dituztela egiaztatu beharko da. Abenduaren 3ko 2267/2004 Errege Dekretua aplikatu behar bada, egiaztapen hori egiteko, Ingurumen Sailburuordetza honi aurkeztuko zaizkio eskumena duten erakundeek emandako egiaztagiriak. Hori egin ezean, egindako eskaeraren kopia aurkeztu beharko da erakunde eskudunaren aurrean.

                Bestela, 2267/2004 Errege Dekretu hori zergatik ezin den aplikatu justifikatu beharko da. Gainera, instalazioek suteen aurkako babesaren arloan ezarritako exijentziak betetzen dituztela egiaztatu beharko da. Egiaztapen hori egiteko Ingurumen Sailburuordetza honi aurkeztuko zaio enpresa instalatzaileak egindako ziurtagiria, suteen aurka babesteko instalazioen araudia onartzen duen azaroaren 5eko 1942/1993 Errege Dekretuan ezarritakoarekin bat etorrita. Halaber, tresna, ekipo eta sistemen mantentze-lanak Errege Dekretu horretan finkatutakoaren arabera burutzen direla egiaztatzen duen agiria aurkeztu beharko da. Agiri horiekin batera, baimendutako enpresa instalatzaile edo mantentzaileak industria-erregistroan inskribatzeko ziurtagiria aurkeztu beharko dute.

            7. Baldin eta arautegi berria indarrean sartzeak, edo barneratzen diren sistemen egitura eta funtzionamenduari buruzko ezagutza berri esanguratsuetara egokitu beharrak hori egitea gomendatzen badute, neurri babesle zein zuzentzaileak eta ingurumena zaintzeko programa aldarazi ahal izango dira, bai neurtu behar diren parametroen kasuan, bai neurketaren aldizkakotasuna eta aipatutako parametroek hartu behar duten tarteari dagozkion mugen kasuan. Era berean, neurri babesle zein zuzentzaileak eta ingurumena zaintzeko programa jardueraren sustatzaileak hala eskatuta edo ofizioz aldaraz daitezke, ingurumena zaintzeko programan lortutako emaitzetan oinarrituta.

            8. Urtean behin, Atusa Empresarial, S.L.U. enpresak Ingurumen Sailburuordetzari jakinaraziko dizkio atmosferara botatako kutsagarriei, uretara egindako isurketei eta sortu dituen hondakinei buruzko datuak, E-PRTR-Euskadi, botatako eta eskualdatutako kutsagarrien Europako Inbentarioa landu eta eguneratzeko, E-E-PRTR Araudiko eta ingurumen-baimen bateratuetako isurketen gaineko informazioa ematea arautzen duen apirilaren 20ko 508/2007 Errege Dekretuari jarraituz.

               Informazio hori osatzen duten datuak ekitaldi horren hurrengo martxoaren 31 baino lehen bidali beharko dira, Ingurumenari buruzko Adierazpenaren (IA) bidez. Informazio-trukaketa horren funtsa Ingurumenari buruzko Adierazpenari (IA) dagozkion ingurumeneko datu teknikoak eta prozedurakoak sartzean datza, IKS-eeM Sistemaren bidez (www.eper-euskadi-net web orrian eskuragarri). Datu horiek guztiek Euskal Autonomia Erkidegoko ingurumenean eragina duten jardueren erregistroa osatuko dute, eta erregistro hori transakzio-basea izango da, datuak Europako Ingurumen Agentziaren erregistroetara bidaltzeko, E-PRTR-Europa erregistrora, alegia.

               Era berean, ebazpen honetan aurreikusitako gainerako informazio-trukeak aipatu ingurumen-adierazpenaren bidez gauzatuko dira, ahal izanez gero.

               Informazio hori publikoa izango da, ingurumenaren arloan informazioa eskuratzeko, publikoak parte hartzeko eta ingurumen gaietan justiziara heltzeko eskubideak arautzen dituen uztailaren 18ko 27/2006 Legeak, xedatutakoari jarraikiz lege horrek 2003/4/EE eta 2003/2005/EE zuzentarauak kontuan hartzen ditu eta, betiere, izaera pertsonaleko datuak babesteari buruzko abenduaren 13ko 15/1999 Lege Organikoak xedatutakoa bermatuko da.

            9. 2007ko apirilaren 21eko 509/2007 Errege Dekretuaren 4. artikuluko 3. atalari jarraituz, instalazioaren titularrek agintaritzari jakinarazi beharko diote instalazio horietan erabiltzen eta ekoizten diren substantziek, 1907/2006 EE Erregelamenduan erregistratu eta ebaluatzeko aurreikusitako prozesuan identifikatu direnek, giza osasunerako eta ingurumenerako izan dezaketen arriskua.

            10. Ingurumen-baimen bateratu honen mendeko instalazioan egindako aldaketek bat etorri beharko dute kutsaduraren prebentzio eta kontrol integratuari buruzko uztailaren 1eko 16/2002 Legeak 10.3 artikuluan ezarritako komunikazio-erregimenarekin. Hori horrela, ingurumeneko beste baimen bateratu bat beharko da aldaketak funtsezkoak direnean.

                Hirugarrena. Atusa Empresarial, S.L.U. enpresak ingurumen-organoaren aurrean egiaztatu beharko du ebazpen honetako bigarren ataleko ondorengo puntuetan ezarritako baldintzak betetzen dituela, ebazpen hau jakinarazten denetik gehienez 6 hilabeteko epean: A (Fidantza); B (Erantzukizun zibileko asegurua); E.2.1. (industria-efluenteen konexioa eta Aguraingo Udalaren saneamendu-sare orokorrera isurtzeko hiru isuri-guneen koordenatuak); E.3.1.f) eta E.3.2.d) (hondakin arriskutsuak eta ez-arriskutsuak onartzeko dokumentuak); E.3.1.n) eta E.3.2.f) (hondakin arriskutsuak eta ez-arriskutsuak erregistratzeko eredua); E.3.2.a. (hondakinen europar zerrendan ispilu-sarrera duten hondakinen ezaugarriak bereiztea); E.4. (lurzorua babesteko neurriak, zabortegiaren instalazioetarako baimena eskatzea eta lurzoruari buruzko txosten hedatua, non zabortegiaren instalazioek zer arrisku duten aztertzen den); F.1. (atmosferara egindako isurien kontrola); F.2. (isuriaren uraren kalitatea kontrolatzea); F.3. (zarata kontrolatzea); F.5. (ingurumen-zaintzako programaren dokumentu bateratua); G.1. (isurien eta hondakinen kalkulua mantentze-lanetan); G.3.a. (prebentziozko mantentze-lanen eskuliburua); G.3.h. (produktu kimikoen biltegiratze-ziurtagiriak); G.3.i. (larrialdietarako materialen zerrenda); G.3.j. (kubetak husteko maniobraren protokoloa) eta G.3.u. (suteen aurkako babesen ziurtagiriak).

                Halaber, lehen aipatutako epean, sustatzaileak Ingurumen Sailburuordetza honetan aurkeztu beharko du teknikari eskudunak emandako ziurtagiria. Bertan, instalazioak aurkeztutako proiektuarekin eta Ebazpen honetan xedatutakoarekin bat etorrita eraiki eta hornitu direla ziurtatuko du.

                Baldin eta baimena emateko aurkeztu den proiektuak eta emandako baimenak ez badute aurreikusten instalazioan jada daudenak osatzeko neurri zuzentzaileak edo babes-neurriak ezartzeko jarduketa bakar bat ere egin behar denik, nahikoa izango da ziurtagiriak zehaztea instalazioak jada eraikita eta ekipatuta daudela, ingurumen-baimen bateratuak xedatutakoaren arabera. Ez da beharrezkoa ziurtagiri hori sinatzen duen teknikaria kanpoko erakunde batekoa izatea.

                Ziurtagiri horrekin batera, ingurumen-baimen bateratuaren atal bakoitzari buruzko analisi bat jasotzen duen txosten bat bidali beharko da.

                Dena den, baldintza horiek bete ote diren egiaztatzeko, ingurumen-organo honi atxikitako zerbitzu teknikoek ikuskapen-bisita egingo dute, hala badagokio.

                Horretarako, aipatutako ikuskaritza-bisitaren aurretik, sustatzaileak Ingurumen Sailburuordetza honetan aurkeztu beharko du baldintza horiek betetzen direla egiaztatzen duen agiria, eskumena duen teknikari batek egina.

                Goiko baldintza horiek guztiak betetzeko, sei hilabeteko epea ezarri da, ebazpen hau jakinarazten den egunaren biharamunetik kontatzen hasita, eta Ingurumen Sailburuordetzak ingurumen-arloko baimen bateratua eraginkorra dela adierazten duen ebazpena emango du.

                Adierazitako baldintzak betetzen direla ziurtatzean, ebazpena emango da, eta, horren bitartez, ingurumen-baimen bateratua eraginkortzat aitortuko da.

                Laugarrena. Ingurumen-baimen bateratu honen indarraldia 8 urtekoa da, sustatzaileak Ebazpen hau hartzen duen egunetik hasita. Epe hori igarota, baimena berritu egin beharko da, eta, hala badagokio, jarraian datozen aldietarako eguneratu.

                Ingurumen-baimen bateratua amaitu baino hamar hilabete lehenago, titularrak baimena berritzeko eskaera egin beharko du, uztailaren 1eko 16/2002 Legearen 25. artikuluan xedatutakoa betez.

                Bosgarrena. Edonola ere, ingurumen-baimen bateratua ofizioz aldatu ahal izango da kutsaduraren prebentzio eta kontrol integratuari buruzko uztailaren 1eko 16/2002 Legeak 26. artikuluan ezarritako kasuak aintzat hartuta.

                Artikulu hori betetzearen kalterik gabe, ebazpen honen baldintzak ingurumena zaintzeko programan jasotakoak barne hartuta aldatu ahal izango dira, jardueraren sustatzaileak eskatuta, behar bezala justifikatuz gero. Gainera, ofizioz aldatu ahal izango dira, honako egoera hauetan:

                Araudi berria indarrean jartzen bada.

                Ingurunearen egitura eta funtzionamenduari buruzko ezagutza esanguratsu berrietara egokitzeko beharra ikusten bada, bereziki inplikatutako sistemen hauskortasuna areagotzen dela antzematen bada.

                Ingurumena zaintzeko programan jasotako emaitzen edo bestelako oharpenen arabera, ingurumen-inpakturako ezarritako neurri babesle, zuzentzaile edo konpentsatzaileak nahikoak ez direla egiaztatzen bada.

                Seigarrena. Atusa Empresarial, S.L.U. enpresak Ebazpen honen xede den burdinurtuko piezak egiteko eta eraldatzeko jardueran titulartasun-aldaketarik eginez gero, aldaketa hori Ingurumen Sailburuordetzan jakinarazi beharko du, hark onar dezan.

                Zazpigarrena. Baimen honek balioa galduko du honako hauek gertatzen direnean:

                Epearen barruan ez egiaztatzea ebazpen honetako hirugarren atalean ingurumen-baimen bateratuak ondorioak izan ditzan ezarritako baldintzak betetzen direla, interesdunak, behar bezala justifikatuz, epea luzatzeko eskatzen ez badu.

                Atusa Empresarial, S.L.U. enpresaren nortasun juridikoa bukatzea, indarrean dagoen araudian ezarritako kasuetan.

                Ebazpen hau eraginkor egitean adierazten direnak.

                Zortzigarrena. Ebazpen honen edukia jakinaraztea Atusa Empresarial, S.L.U. enpresari, Aguraingo Udalari, ingurumen-baimen bateratua emateko prozeduran parte hartu duten erakundeei, eta gainerako interesdunei.

                Bederatzigarrena. Ebazpen hau Euskal Herriko Agintaritzaren Aldizkarian argitaratzeko agintzea.

                Hamargarrena. Ebazpen honek ez du agortzen administrazio-bidea; horrenbestez, gora jotzeko errekurtsoa aurkez dakioke Ingurumen, Lurralde Plangintza, Nekazaritza eta Arrantza sailburuari, hilabeteko epean, ebazpen hau jakinarazi eta hurrengo egunetik hasita, hori guztia azaroaren 26ko 30/1992 Legearen, Herri Administrazioen Araubide Juridikoaren eta Administrazio Prozedura Erkidearen 114. artikuluarekin eta ondorengoekin bat etorriz (urtarrilaren 13ko 4/1999 Legeak aldatu zuen lege hori).

                Gasteiz, 2010eko azaroaren 2a.

                Ingurumeneko sailburuordea,

                NIEVES TERAN VERGARA.