Arautegia
InprimatuEBAZPENA, 2009ko uztailaren 29koa, Arrantza eta Akuikulturako zuzendariarena; honen bidez, ekonomia-krisiagatik «Arrasteko euskal ontziteria egokitzeko NEAFCren plan»eko ontzien arrantza-jarduera aldi baterako borondatez uztea ezarri da 2009rako.
Identifikazioa
- Lurralde-eremua: Autonomiko
- Arau-maila: Ebazpena
- Organo arau-emailea: Ingurumen, Lurralde Plangintza, Nekazaritza eta Arrantza Saila
- Jadanekotasuna-egoera: Indarrean
Aldizkari ofiziala
- Aldizkari ofiziala: EHAA (Euskal Herria)
- Aldizkari-zk.: 218
- Hurrenkera-zk.: 6060
- Xedapen-zk.: ---
- Xedapen-data: 2009/07/29
- Argitaratze-data: 2009/11/12
Gaikako eremua
- Gaia: Administrazioaren antolamendua; Ingurune naturala eta etxebizitza
- Azpigaia: Herri Administrazioa; Nekazaritza eta arrantza
Testu legala
Arrantzarako Europako Funtsaren inguruko EEko Kontseiluaren 2006ko uztailaren 27ko 1198/2006 Arautegian daude ezarrita arrantza-sektorean Erkidegoak ematen duen egiturazko laguntzaren inguruko arauak. APB Arrantza-politika Bateratuaren 2002ko erreformatik hartutako neurriei laguntzea da AEFren helburua, arrainen populazioen gaineko presioa murrizteko, eta aldi berean sektorean jasangarriak diren jendartearen eta ekonomiaren baldintzak bermatzeko.
Ekonomiaren egungo egoera zein den ikusita, eta bereziki erregaien prezioen igoera zorrotzaren ostean, oso beharrezkoa da Erkidegoko arrantza-ontziteria egungo egoerari bizkorrago egokitzeko bide ematen duten neurri osagarriak ezartzea, aldi berean sektorearentzat baldintza sozio-ekonomiko jasangarriak bermatuz.
Europako Erkidegoan ekonomia-krisialdiak eragindako arrantza-ontzidien berregituraketa sustatzeko aldi baterako ekintza berezi bat ezartzen duen Kontseiluaren 2008ko uztailaren 24ko 744/2008 Erregelamenduan xedatu legez, arrantza-jarduera aldi baterako gelditzearen xedea onura ekonomikoak handitzea da batez ere, arrain-populazioen oneratzeari lagunduz edo merkaturatzeko baldintza hobeak sustatuz. Erregelamendu horretan ekintza espezifiko bat ezartzen da 2008ko petrolioaren prezio-igoeraren ondoriozko ekonomia-krisialdiak eragindako arrantzaleei eta arrantza-enpresei aparteko eta behin-behineko laguntza emateko.
Nekazaritza, Arrantza eta Elikadura sailburuak Euskal Autonomia Erkidegoko arrantza-sektorea diruz laguntzeko deialdia egiteko Agindua eman zuen 2009ko otsailaren 20an. Agindu horren hamabosgarren ebazpen-zatian arrantza-jarduerak aldi baterako etetea- azaldu legez, laguntza hauen helburua ontzi-jabeei eta arrantzaleei bideratutako arrantza-jardueren aldi bateko geldialdiak finantzatzen laguntzea da. Bigarren paragrafoan xedatu bezala, berriz, Arrantza eta Akuikulturako zuzendariaren ebazpenaren bidez, EHAAn argitaratuko dena, arrantza-ontzien jardueraren aldi bateko geldialdia adieraziko da horretarako behar diren baldintzak betetzen direnean, denboraldia eta baldintza zehatzak barne hartuta.
Europako Erkidegoan ekonomia-krisialdiak eragindako arrantza-ontzidien berregituraketa sustatzeko aldi baterako ekintza berezi bat ezartzen duen Kontseiluaren 2008ko uztailaren 24ko 744/2008 Erregelamenduaren 15. artikuluan xedatu legez, 1198/2006 Araudiko 24. artikuluan eta 744/2008 Araudiko 24. artikuluan ezarritako neurriez gain, flota egokitzeko programak eragindako arrantzaleei eta armadoreei arrantza-jarduera eteten laguntzeko neurriak ere finantzatu ahal izango ditu Arrantzarako Europako Funtsak, baldin eta jarduera 2009ko urtarrilaren 1etik 2009ko abenduaren 31ra bitartean eteten bada, gehienez ere hiru hilabetetan, itsasontzia behin betiko kentzen denetik, edo sei aste, flota egokitzeko programara bildutako gainerako itsasontzien kasuan.
Arrasteko euskal ontzidia egokitzeko NEAFCren Ipar Ekialdeko Atlantikoko Arrantza batzordearen plana onartzeko ebazpena eman zuen 2009ko ekainaren 30ean Arrantza eta Akuikulturako zuzendariak.
Gorago azaldutakoaren harira, Kontseiluaren 2006ko uztailaren 27ko 1198/2006 Erregelamendua, Kontseiluaren 2008ko uztailaren 24ko 744/2008 Erregelamendua, Nekazaritza, Arrantza eta Elikadura sailburuaren 2009ko otsailaren 20ko Agindua, Nekazaritza, Arrantza eta Elikadura Sailaren egitura organikoa eta egitekoena finkatzen duen urriaren 11ko 290/2005 Dekretua eta aplikatu beharreko gainerako arauak kontuan izanda, ondokoa
Lehenengoa. Arrasteko euskal ontzidia egokitzeko, Ipar Ekialdeko Atlantikoko Arrantza Batzordearen (NEAFC) planera bildutako itsasontzien jardueraren borondatezko aldi baterako etetea adieraztea.
Bigarrena. Etetea kasuan kasuko portuko itsas kapitainak nabigazio rolaren gordailuaren eta hartzearen gainean jaulkitako ziurtagiriaren bidez bidezkotuko da, eta itsasontzien arrantza erakundeak igorri beharko dio ziurtagiri hori Arrantza eta Akuikultura Zuzendaritzari. Jarduera etenda egongo deneko epea kalkulatzeko eta kasuan kasuko ziurtagiria jaulkitzeko, rolaren emate eta hartze dataz gain, portuko agintaritzaren ziurtagiria hartu ahal izango da kontuan, alegia, itsasontzia portura sartzen den dataren ziurtagiria, edo Arrantza eta Akuikultura Zuzendaritzak egin ditzakeen egiaztapenak.
Jardute ezaren epea hau izango da: itsasontzia portura heltzen den egunetik beretik bertatik benetan ateratzen den egunaren aurrekora arte.
Hirugarrena. Laguntzak emateko baldintzak ondorengoak dira:
Desegin behar diren itsasontzien kasuan, laguntzak 3 hileko etenaldikoak izan daitezke gehienez. Etenaldia 2009ko urtarrilaren 1etik abenduaren 31ra bitartean egin izan beharko da.
Desegin behar ez diren itsasontzien kasuan, laguntzak 6 asteko etenaldikoak izan daitezke gehienez. Etenaldia 2009ko urtarrilaren 1etik abenduaren 31ra bitartean egin beharko da.
Laugarrena. Agindu honetan araututako jarduera etenaldia Arrantzarako Europako Funtsaren funts publikoen eta Euskal Autonomia Erkidegoko funtsen bidez finantzatu ahal izango da, eta halakoxea izatekotan, baldintzak kasuan kasuko arautegiaren bidez arautuko dira.
Bosgarrena. Ebazpen honekin ez da administrazio bidea amaitutzat ematen eta interesdunek gora jotzeko errekurtsoa aurkeztu ahal izango diote Nekazaritzaren eta Arrantzaren Garapenerako sailburuordeari. Horretarako, hilabeteko epea dago, ebazpena Euskal Herriko Agintaritzaren Aldizkarian argitaratu eta biharamunetik hasita.
Vitoria-Gasteiz, 2009ko uztailaren 29a.
Arrantza eta Akuikulturako zuzendaria,
JOKIN DÍAZ ARSUAGA.