Dekretu honen helburua honako hau da: garapen-lankidetzarako «Ignacio Ellacuría» saria sortu eta arautzea, Euskadiko eta Euskaditik kanpoko erakundeek, kolektiboek eta pertsona indibidualek herrien arteko berdintasunaren eta justiziaren aldeko borrokan eta pobrezia ezabatzeko borrokan egindako ekarpena aitortzeko, euskal gizartea eta nazioarteko gizarte sentsibilizatze aldera.

Dekretu honek arautzen duen saria eskuratu ahal izango dute honako atal hauetariko batean bildutako zirkunstantziak betetzen dituzten erakundeek, ekimenek edo pertsona fisikoek:

Euskal lankidetzarekin harremanen bat duten, eta beren komunitateen garapenaren alde ekarpen esanguratsua eta nabarmena egin duten irabazi-asmorik gabeko herrialde pobretuetako toki-erakundeak.

Irabazi-asmorik gabeko euskal erakundeen ekimenak, ahal bada erakundeen partzuergo batek bultzatutakoak, eta Hegoaldeko herrien garapenean eta/edo justizian oinarritutako nazioarteko harremanetan ekarpen esanguratsu eta nabarmena egin dutenak. Kasu honetan, ekimena sustatu duen erakundeari edo erakundeei emango zaie saria.

Euskal jatorriko pertsona fisikoak, pobretutako herrien garapenaren alde egindako elkartasun-lanarengatik nabarmendu direnak.

Herrien justiziaren eta garapenaren alde ekarpen esanguratsu eta nabarmena egin duten eta horregatik euskal lankidetzarako eredu gisa hartzen diren pertsona fisikoak, nazioarteko eremukoak.

Saria urtero deituko da garapenerako lankidetzako sailburu eskudunaren agindu bidez, eta aginduan edizio bakoitzaren aldi baterako oinarri espezifikoak zehaztuko dira.

Dekretu honek araututako sari gisa oroigarrizko arte-lan bat eta diru-kopuru bat emango da, eta sariaren zenbatekoa sariaren edizio bakoitza deitzen duen Aginduan zehaztuko da.

Lankidetzarako Euskal Agentziak kudeatuko du saria.

1. Garapen-lankidetzarako euskal erakundeek aurkeztuko dituzte hautagai-zerrendak.

2. Ofiziozko epaimahaiak aurreko edizioetan baliozko moduan aurkeztu diren eta saria jaso ez duten, baina saria jasotzeko baloratuak eta, hala badagokio, proposatuak izan daitezkeen hautagaiak hartuko ditu barnean.

1. Epaimahaiak aurkezten diren hautagai-zerrendak aztertu eta saria emateko proposamen bat egingo du, eta honako hauek osatuko dute: Eusko Jaurlaritzaren eta beste euskal erakunde batzuen ordezkariak, Euskadiko GKEen koordinakundea, eta euskal lankidetzan aitortutako ospea duten pertsonak. Epaimahaiaren osaerak kontuan hartu beharko du emakumeen eta gizonen berdintasunerako otsailaren 18ko 4/2005 Legearen 20.5 artikulua, eta Sariaren deialdirako Aginduan finkatuko da.

2. Epaimahaiak gehiengo soilez hartuko ditu erabakiak, eta berdinketa gertatzen bada, presidenteak kalitatezko botoa baliatuko du.

3. Arau honetan xedatzen ez denari dagokionez, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean kide anitzeko organoei buruz jasotako araudiari jarraituko zaio.

1. Esleipen-proposamena emateko hausnarketetan, epaimahaiak honako irizpide hauek aplikatuko ditu:

   Erakundeak, ekimenak edo pertsonak inplikaturiko komunitateen giza garapenean egindako ekarpenaren garrantzia.

   Erakundeak, ekimenak edo pertsonak egindako lanaren luzapena eta sendotzea.

   Erakundearen, ekimenaren edo pertsonaren sentsibilizazio-irismena euskal gizartean eta, hala badagokio, nazioarteko gizartean.

2. Epaimahaiak irizpideak interpretatuko ditu, garapen-lankidetzarako otsailaren 22ko 1/2007 Legearen 3. artikuluan ezarritako lankidetza-politikaren orientazio-printzipioen arabera.

3. Oro har, Epaimahaiak saria aurkeztutako hautagai bakar baten alde esleitzea proposatuko du. Hala ere, salbuespen gisa, Epaimahaiak honako hau proposatu ahal izango du:

   Saria ex aequo hautagai bati baino gehiagori esleitzea; Epaimahaiak hori egiteko arrazoi bereziak azaldu beharko ditu. Kasu honetan, sariaren zuzkidura ekonomikoa saritutako hautagaien artean banatuko da erdibana.

   Saria esleitzeke uztea, epaimahaiaren ustez behar adina meritu ziurtatzen dituzten hautagaiak aurkeztu ez direlako.

1. Sariaren esleipen-erabakia garapenerako lankidetzaren sailburu eskudunak emango du hiru hileko gehieneko epean, deialdia Euskal Herriko Agintaritzaren Aldizkarian argitaratzen denetik zenbatzen hasita, eta erabakia arrazoitu egin beharko da.

2. Erabakiak administrazio-bidea agortzen du, eta Euskal Herriko Agintaritzaren Aldizkarian argitaratuko da garapenerako lankidetzaren sailburu eskudunaren Agindu bidez, saritutako erakundeari edo pertsonari jakinarazpen indibidualizatua ematea alde batera utzi gabe.

Garapenerako lankidetzako sail eskudunak horretarako deitutako ekitaldi publiko batean emango da saria.

Garapen Lankidetzarako «Ignacio Ellacuría» Sarian parte hartzeak saria arautzen duten oinarri guztiak onartzen direla esan nahi du.

Betebeharrak bete gabe geratu direla ulertuko da ondorengo kasuetan:

1. Deialdian parte hartzen duten pertsonek edo entitateek aurkeztutako dokumentazioan iruzur egiten bada.

2. Dekretu honetan, dagokion deialdiaren Aginduan, edo beste edozein xedapenek oro har ezartzen duelako nahitaez bete behar den beste edozein agindutan ezarritako betebeharrak ez betetzea.