Irakaskuntzako Funtzio Publikoaren egituraren abiapuntua, ikastetxe bakoitzean kalitatezko hezkuntzako zerbitzua emateko behar diren lanpostuak konfiguratzea da. Lanpostuen Zerrenda ikastetxe bakoitzeko plazen kopurua eta, horrenbestez, plantila behar bezala dimentsionatzea ahalbideratzen duen oinarrizko tresna da, betiere zentro bakoitzean bete nahi diren hezkuntzako premiak aintzat hartuta.

Horrexegatik, hain zuzen ere ikastetxe bakoitzaren uneko hezkuntzako premiak bete nahi direlako, Lanpostuen Zerrenda ezin da argazki geldia izan, ikastetxeetako beharren arabera egokitu eta aldatzeko gaitasuna behar du izan.

Zentzu horretan, otsailaren 19ko 2/1993 Legeak, Euskal Autonomia Erkidegoko Unibertsitatekoez kanpoko Irakaskuntzarako Irakasleen Kidegoei buruzkoak, II Tituluko I kapituluan Lanpostuen Zerrendak arautzen ditu, eta horiek osatzeko oinarrizko printzipioak eta prozedurazko bideak ezartzen ditu. Saileko Ikastetxeen Plangintza eta Hornikuntza Zerbitzuak bestalde, Lanpostuen Zerrendak egiterakoan ikasturte bakoitzean erabiltzen diren parametro edo aldagaiak aldatzeko moduko baldintzak aintzat hartu behar ditu.

Horiek horrela, egiaztatu da Euskal Autonomia Erkidegoaren bilakaera demografikoaren ondorioz, azken urteotan ikastetxeetako matrikulen kopurua etengabe jaitsi egin dela. Logikoa denez, jaitsiera hori nabarmenagoa izan da Haur-Hezkuntzan eta Lehen Hezkuntzan, baina, denbora aurrera joan ahala, Bigarren Mailako Irakaskuntzara ere iritsi da.

Era berean, denboran zehar, besteak beste, honakoak ageri zaizkigu: ikastetxeetan matrikulen kopurua igotzea edo jaistea; modulu eta heziketa-zikloak ezartzea edo kentzea; hezkuntza-sistema hobetzeko programa pedagogikoak abian jarri izana edo baliabideetatik ahalik eta onurarik handiena ateratzeko xedez, eskola-unitateak batzea edo zatitzea, edo ikastetxeak batzea dakartzaten planak abian jarri izana; gizarte-eskaera eta Autonomia Erkidegoaren errealitate soziolinguistikoa, hizkuntza ereduetako matrikulazioan aldaketak eragiten dituztenak.

Horren guztiaren ondorioz, ikastetxeetako plantilei buruzko plangintza egiteko orduan aintzat hartu behar da oso adierazitako egoeren eragina, izan ere horien ondorioz Lanpostuen Zerrendek ikastetxeen errealitate aldakorrari erantzun behar diote, eta ikastetxe bakoitzaren plantilak ahalik eta hobekien erantzun behar dio gizartearen eskaerari eta hezkuntza sistemaren beharrei. Egokitze hori gauzatzeko zenbaitetan lanpostuak deuseztatu, sortu edo aldatu beharko dira. Aurreko guztia, eragindako langileen zilegizko eskubide eta itxaropenak zorrozki errespetatuaz, eta hezkuntza kalitaterik altuena emateko helburuaz egingo da.

Horrekin batera, Lanpostuen Zerrenda osatzen duten plaza gehienak irakaskuntzan diharduten plaza horien titularrek beteta daudenez, zerrenda horretan egiten diren aldaketek eragin zuzena izango dute plaza horien titular diren pertsonengan.

Ondorio horietarako otsailaren 19ko 2/1993 Legeak, irakaskuntzako kidegoei buruzkoak, orokorki bada ere, zera aurreikusten du: batetik, lanpostuen zerrenda aldatu ostean lanpostuaren edukia ere aldatzen denez, funtzionarioak euren lanpostuetatik kentzea; bestetik, lanpostua kentzeagatik atxikipena galtzea.

Horregatik guztiarengatik, kasuan kasuko Lanpostuen Zerrendan aldarazpenik egitearen ondorioz, lanposturen bat kendu edo aldarazten denean eragindako funtzionarioa zein den zehazteko, egoera arautuko duen legezko markoa ezartzea beharrezkoa da; hori guztia berdintasuneko baldintzetan, eta prozesu horietan eraginda suerta daitezkeen irakasleen zilegizko eskubide eta itxaropenak zorrozki errespetatuaz egingo da.

Horri dagokionez, esan behar dugu Haur-Hezkuntzan, Lehen Mailako Hezkuntzan, Helduen Hezkuntza Iraunkorrean eta Hezkuntza Berezian adierazitako legezko markoa dagoeneko badela; izan ere, apirilaren 16ko 81/1996 Dekretuak adierazitako hezkuntza maila horietan, ikastetxe publikoetako Lanpostuen Zerrendetako aldarazpenek zein irakasleengan izango duten eragina zehazteko irizpideak ezartzen ditu. Dekretu horrek hezkuntzaren erreforma baino lehenago, auzi hori arautzen zuen 1994ko urriaren 26ko Agindua, Hezkuntza, Unibertsitate eta Ikerketa Sailburuarena, ordezkatu zuen.

Bestalde, abenduaren 22ko 409/1998 Dekretuarekin gauza bera gertatzen da Derrigorrezko Bigarren Hezkuntzaren lehenengo zikloan, baina arau horrek adierazitako 81/1996 Dekretuak esandakoa aipatu eta zehaztasun batzuk gehitu baino ez du egiten.

Hala ere, Bigarren Irakaskuntzan arauen alorrean hutsunea dago eta hain zuzen ere Bigarren Irakaskuntzan egun premiazkoa da araudi orokorra eta denboran iraunkorra izango dena, ikastetxeetako plantilak ikasturtez ikasturte argitaratzen diren Lanpostuen Zerrenden arabera egokitu ahal izateko prozesuak eta irizpideak erregulatzeko; bereziki urriaren 3ko 1/1990 Lege Organikoak, Hezkuntza Sistemaren Antolamendu Orokorrerako denak (LOGSE), aurreikusten duen erreforma ezarri ondoren, zeren eta Lege horrek curriculum nabarmen berriztatzailea ekarri du eta, bereziki Lanbide-Heziketan, ikasgai berezitu berriak ezarri ditu. Legearen ondorioz, Bigarren Hezkuntzako ikastetxetarako tipologia zeharo berria sortu da, Bigarren Hezkuntzaren ondoko irakaskuntza malgutasun osoz eskaintzen duten ikastetxeak diseinatu dira, Batxilergoko eta Lanbide-Heziketako institutuen arteko ohiko dikotomia amaitu baita, eta ikastetxe berean Batxilergo eta Heziketa Ziklo ezberdinak eskaintzen dira; eta horrek ez du esan nahi Goi Mailako Lanbide-Heziketako Berariazko Institutuak izateko aukerarik ez dagoenik.

Atal horri loturik, egokia da gogora ekartzea LOGSEk aurreikusitako erreforma Autonomia Erkidego honetan arian-arian ezartzen berriki amaitu dela. Ezarpen horrekin batera Eskola Mapa berria egin behar izan da, Autonomia Erkidegoko ikastetxeetako sarea guztiz berrantolatu behar izan da eta, horrenbestez, ikastetxe horietan diharduten irakasleak ere berriz banatu behar izan dira. Ikastetxeetako sarearen berrantolaketari eta Eskola Mapa berria ezartzeari dagokienez, esan behar da egokitze hori urtarrilaren 30eko 26/1996 Dekretuak aurreikusitakoaren indarrez egin zela; izan ere, Dekretu horrek ikastetxeetako sare berria diseinatu zuen eta besteak beste honako faktoreak aintzat hartu zituen: Lurralde Historiko bakoitzeko errealitate geografiko eta demografikoak eta gizarte eta hizkuntzaren alorretako errealitateak.

Ikastetxeetan ziharduten irakasleen banaketa berriari dagokionez, bestalde, urriaren 6ko 1635/1995 Errege Dekretuaren hamabigarren xedapen gehigarriak autonomia erkidegoetako organo egokiak gaitu zituen Derrigorrezko Bigarren Hezkuntzaren Bigarren Zikloa, Batxilergoa, eta Lanbide-Heziketa ezartzearen ondorioz egin beharreko irakasleen banaketako prozedurei ekiteko irizpideak finkatu ahal izateko, betiere Administrazioak zehaztutako bideari jarraiki. Urriaren 2ko 2112/1998 Errege Dekretuaren hamabosgarren xedapen gehigarriak ere gaitze bera jasotzen du.

Horiek horrela, gaitze hori erabiltzean hain zuzen ere, urtarrilaren 18ko 7/2000 Dekretua onetsi zen. Dekretu horrek lehenbiziko aldiz eta unean uneko eragiketa izanik, Bigarren Hezkuntzako irakasleen birbanaketako prozesua arautu zuen, ikastetxeetako plantilak, hezkuntzako adierazitako erreforma ezarri ondoren Euskal Autonomia Erkidegoaren ikastetxeen sareak hartutako fisonomia berriaren ondorioz, Lanpostuen Zerrenda berrien arabera egokitzeko asmoz.

Horregatik, Bigarren Mailako Irakaskuntzan gai honi buruzko arauetan zegoen hutsunea betetzen du honako Dekretu honek. Dekretua araudi orokorra da; hain zuzen ere, azkena argitaratutako lanpostu-zerrendaren arabera ikastetxe bakoitzaren plantila egokitu ahal izateko, irakasleak berriro banatzeko ikasturtez ikasturtezko prozesuetan aplikatu beharrekoa.

Zentzu horretan, Euskal Autonomia Erkidegoaren hezkuntza mailetan unibertsitatez kanpoko irakasleak berriz antolatzeko prozesuak arautzea ahalbidetuko duen arau multzoa osatzen du Dekretu honek, betiere ikastetxeetako plantilak gizartearen errealitate aldakorraren, errealitate demografikoaren, pedagogia eta hezkuntzako errealitatearen, errealitate soziolinguistikoaren, eta abarren arabera, Lanpostuen Zerrendetan islatzen den errealitatearen arabera, egokitzeko asmoz.

Horrekin batera, tresna arauemailea da, eta Bigarren Mailako Irakaskuntzako langileak berriz antolatzeko sistemari segurtasun juridiko handiagoa ematen dio eta, horrenbestez, etorkizunean egin daitezkeen birbanaketa berrietan eraginda suerta daitezkeen taldeetako pertsonei ere segurtasun juridiko handiagoa ematen die.

Dekretu honen edukiari dagokionez, haren araudi zehatza aztertzen hasi baino lehenago, azpimarratu behar da Dekretuak arautzen duen prozesuaren oinarrian dauden helburua eta printzipio eragilea klaustroen egonkortasuna dela, eta horri ekiteko ikastetxe bakoitzean behin betiko destinoa duten langileen artetik, ahalik eta langile gehien bertan mantendu nahi da; horrela, plangintza akademikoak eta irakaskuntzak beharrezko duten jarraikortasuna lortuko da, betiere kalitatezko irakaskuntza lortzeko xede komuna lortzearren. Hori guztia berdintasun osoz, eta eragindako langileen zilegizko interes, eskubide eta itxaropenak aitortuz eta zorrozki errespetatuz egingo da.

Hain zuzen ere, eragindako taldeari dagokionez, I. kapituluko Oinarrizko Printzipioetan Dekretua aplikatzeko eremu subjektiboa orokorki definitzen da. Hor esaten denez, Dekretuak arautzen duen prozesuan Eusko Jaurlaritzako Hezkuntza, Unibertsitate eta Ikerketa Sailaren menpean aritzen diren Bigarren Hezkuntzako Irakasleen Kidegoetako karrerako funtzionarioek zein Lanbide-Heziketako Irakasle Teknikoek parte hartzen dute, betiere zerbitzu aktiboan aritzen baldin badira eta Bigarren Hezkuntzako Institututan edo Goi Mailako Lanbide-Heziketako Institututan behin betiko destinoa baldin badute, edo zerbitzu aktiboan ez badaude ere, behin betiko destinoa erreserbatuta izateko eskubidea baldin badute. Horren arrazoia honakoa da: uztailaren 1eko 162/1997 Dekretuaren bidez Berariazko Lanbide-Heziketako espezialitateetarako, Berariazko Lanbide-Heziketan eta Bigarren Mailako Irakaskuntzan irakasleen hasierako atxikipena egin bazen ere, arau horrek geroagoko araudia aipatzen zuen —7/2000 Dekretua eta honako Dekretua, hain zuzen ere— izan ere araudi horretan atxikipenen irizpideak zehaztu behar ziren, ikastetxe bakoitzaren Lanpostuen Zerrendak zehazten dituen lanpostuetan irakasleak atxikitzeko.

Horiek horrela, adierazitako printzipio horretatik abiatuta eta 7/2000 Dekretuak xedatzen duen ildoari jarraiki, Dekretu honek arautzen duen prozesua elkarren jarraian egingo diren bi fasetan egituratu da, fase bakoitza jarraian egingo diren txandetan banatzen delarik.

Logikoa denez, ikastetxeetako plantilak hezkuntzako erreformatik sortu den errealitate berrira orokorki egokitzeko hasierako ahalegina behin eginez gero, adierazitako 7/2000 Dekretuak xedatutakoaren babesean, horretan aurreikusi zen lehenengo fasea, “Atxikimenduaren finkapen-mantenimendua” izenekoa, arautzeak dagoeneko ez zuen zentzurik, izan ere fase horren ardatza irakasle bakoitza orduko tokian mantentzea zen, betiere lanpostua kendu ez badute. Horregatik, LOGSE ezartzearen ondorioz ikastetxeetako egitura berriaren arabera irakasleen plantila egokitzeari dagokionez, zero puntutzat har litekeen une hori gaindituta izanik, Dekretu honetan ez da arautzen horren antzerako faserik.

7/2000 Dekretuan ez bezala, Dekretu honen I. fasean, “Lanpostuak ezabatzeari eta lekuz aldarazitako langileei buruzkoa” izeneko horretan, alde batetik, I. txandan, argitaratutako Lanpostuen Zerrendaren azken aldarazpenaren ondorioz eragindako langileak zeintzuk diren zehazteko irizpideak arautzen dira (printzipioz lekuz aldarazitako langileak); eta, bestetik, II. txandan, lekuz aldarazitako langileek euren postuen titularitate osoa berreskuratzeko aukerak xedatzen dira. Eragindako langile guztiek, ezinbestean, fase horretan parte hartu behar dute.

Izan ere lehenengo fase hori zeharo berria da 7/2000 Dekretuaren aldean, zeren eta Dekretu horrek, egoera zehatz eta jakin batean aplikatzeko araua zenez, une zehatz batean sortutako egoera zehatz bati erantzuteko sortu zenez, lekuz aldarazi beharreko langileak zeintzuk izango ziren zehazteko faserik ez zuen aurreikusi; hala ere, prozesuaren ondorioak aipatzen direnean, 13.1 artikuluko e) zatian honakoa esaten da: “Prozesu honen bitartez lanpostua lortzen ez duten langileak, euren destinoko ikastetxetik lekuz aldaraziak izango dira…” betiere ezabatuaren izaera hartzeko hautua egiten ez badute. Horregatik, geroago 2000ko martxoaren 22ko Agindua, Hezkuntza, Unibertsitate eta Ikerketa sailburuarena, argitaratu zen eta horretan Bigarren Mailako Hezkuntzako unibertsitatez kanpoko irakasleen birbanaketaren emaitza jendaurrean jarri zen; birbanaketa urtarrilaren 18ko 8/2000 Dekretuan argitaratutako Lanpostuen Zerrendarekin bat etorriz egin zen. Adierazitako aginduaren eranskinean lekuz aldaraziaren izaera hartu zutenen zerrenda agertu zen. Horren ondorioz, ez zen aurreikusi lekuz aldarazitako langileek euren lanpostuen titularitate osoa berreskuratzeko txandarik, izan ere, adierazi den bezala, Lanpostuen Zerrenda eta 2000ko martxoaren 22ko Agindua argitaratu arte, formalki ez zen lekuz aldarazitako langilerik izan.

Hain zuzen ere horrexegatik, lekuz aldarazitako langileek euren lanpostuen titularitate osoa berreskuratzeko faserik ez zelako aurreikusi, geroago 2001eko martxoaren 23ko Agindua, Hezkuntza, Unibertsitate eta Ikerketa sailburuarena, argitaratu behar izan zen eta Agindu horren bidez lekuz aldarazitako langileek euren lanpostuen titularitate osoa berreskuratzeko prozesua arautu zen. Agindu horren ondorioz 2001eko apirilaren 3ko Agindua argitaratu zen eta horren bidez prozesuaren emaitza jendaurrean jarri zen. Horren eranskinean, euren lanpostuen erabateko titularitatea berreskuratutakoan, lekuz aldarazitakoaren izaera utzi zutenen zerrenda ageri zen.

Bestalde, eta Dekretu honen araudiarekin jarraitzeko, behin aurreko fasea amaituz gero, II. faseari ekiten zaio, “Ikastetxean bertan berratxikitzea” izenekoari, alegia. Fase horrek elkarren jarraian egiten diren hiru txanda ditu eta txanda bakoitzean parte hartzea nahitakoa da. Adierazi denez, bigarren txanda horren zergatia ahalik eta irakasle gehien ikastetxean finkatu eta mantentzearen komenigarritasunean datza, horrela atzeman nahi den helburua lortuko baita: plantilak mantentzea eta klaustroak ahalik eta egonkorren bilakatzea.

Bigarren fase horren lehenengo txandan, espezialitate bereko plazetan, 1. hizkuntza eskakizuna indarrean edo 2. hizkuntza eskakizuna duten horietan, norbere borondatez atxikitzea ahalbidetuko da, betiere atxikipen berriko plazak duen hizkuntza eskakizuna egiaztatuta duten eta hura baino hizkuntza eskakizun baxuagoko plaza baten titular diren irakasleen kasuetan. Horrela helburu bikoitza bete nahi da, batetik hizkuntza eskakizun jakin bat egiaztatuta duten irakasleek, hizkuntza eskakizun horretako plazetan behin betiko titularrak izatea, horrela euskalduntze prozesu aurrerakorra gauzatzen delako eta kalitatezko irakaskuntza elebidun eta integrala eskaintzeko helburua betetzen delako; eta bestetik, derrigorrezkotasun datarik ez duten 1. hizkuntza eskakizuneko plazetatik lekuz aldarazitako irakasleak berriz finkatzea erraztea, izan ere, gizartearen eskaera eta hezkuntza sistemaren beharrak betetzearren, plaza askoren hizkuntza eskakizuna denboraren poderioz aldatu denez, berriz finkatzeko zeregin horretan zailtasunak agertzen dira.

Puntu honetan aukera berria sartu da, norbere borondatez, kontrako zentzuan atxikitzeko aukera, alegia; hala ere lekuz aldarazitako irakasleek baino ezin izango dute aukera hori erabili, hau da, 1. hizkuntza eskakizuna indarrean edo 2. hizkuntza eskakizuna duten lanpostuetatik lekuz aldarazitako pertsonek; pertsona horiek beren espezialitateetan, derrigorrezkotasun datarik ez duten 1. hizkuntza eskakizuneko edo 1. hizkuntza eskakizuna indarrean duten lanpostuetan berratxiki ahal izango dira. Horrela, plantiletan ahalik eta egonkortasunik handiena lortzeko adierazitako helburua lortzen da, eta gainera adierazitako plaza horietan etorkizun hurbil edo urrunean hizkuntz eraldaketarik gertatuz gero, plaza horien titularrek lanpostuari eustea ahalbideratzen da.

Horrekin batera, lehenengo txanda horretan hizkuntz eraldaketa delakoaren jokoa onartzen da, hau da, lekuz aldarazi diren pertsonak euren espezialitate bereko baina 1. hizkuntza eskakizuna indarrean duten edo 2. hizkuntza eskakizuna duten plazetan berratxikitzea ahalbideratuko da, nahiz eta hizkuntza eskakizun hori egiaztatu gabe izan; eta hori guztia martxoaren 9ko 47/1993 Dekretuaren berariazko araudiak ezartzen dituen baldintzetan eta aurreikusten dituen ondorioetarako egingo da, izan ere, Dekretu horren bidez hizkuntza eskakizunak definitzeko eta irakasleen lanpostuetako derrigorrezkotasun datak ezartzeko irizpideak xedatzen dira.

Bigarren txandan eta aurreko kasuaren arrazoi berberengatik, espezialitate ezberdineko plazetan norbere borondatez berratxikitzea ahalbideratzen da, betiere aukeratzen den espezialitate berria izanez gero eta, aldi baterako baino ez, lehenengo xedapen gehigarriak aurreikusten dituen baldintzetan, titulazioaren bidezko irispidea onartzen da. Puntu horretan, 7/2000 Dekretuak aurreikusitakoaren aldean berrikuntza garrantzitsua sartzen da; izan ere, Dekretu horrek espezialitate ezberdineko plazetan berratxikitzeko lau bide onartzen zituen, ez bakarrik oposizioaren bidez espezialitatea lortu izanaren bidea. Horiek horrela, espezialitatea izatea aitortzen zen honako kasuetan: III. eranskinak espezialitate bakoitzerako zehazten zituen titulazioak izatea; espezialitate horretan IV. eranskinak zehazten zuen antzinatasuna izatea; edo Lanerako Prestakuntza eta Orientabidea espezialitatean trebakuntza nahikorik izatea.

Ildo horretan azpimarratu behar da espezialitate ezberdinetara iristeko Dekretu horrek aipatzen zituen zeharkako bide horiek salbuespeneko bideak zirela, LOGSEk aurreikusitako hezkuntzako erreforma ezartzearen ondorioz sortutako egoera berri eta bereziari erantzuteko xedez sortuak, LOGSEren ondorioz espezialitate berriak sortu baitziren. Bestalde, Berariazko Lanbide-Heziketan modulu eta heziketa ziklo berriak abian jarri eta sustatu zituzten irakasleen giza kapital garrantzitsua aprobetxatzeko beharra ere bide berezi horiei ekiteko arrazoia izan zen.

Horregatik LOGSEk ezarritako hezkuntza-sistemaren ezarpen-prozesuaren egutegia amaitu arte espezialitate jakin batzuetara iristeko aukera irekitzea gomendatu zen. Izan ere urriaren 6ko 1635/1995 Errege Dekretuaren hainbat xedapen iragankorrek horixe xedatzen dute; Dekretu horrek eskumena duten hezkuntza alorreko administrazioei ahalmena ematen die, zein bere eremuan eta irispide berezi horien bidez, Berariazko Lanbide-Heziketako zenbait espezialitatetan irakasleak atxikitzeko baldintzak ezar ditzaten. Plaza hutsak betetzeko hornikuntzako deialdietan Lanbide-Heziketako plaza jakin batzuk esleitzeari dagokionez, apirilaren 30eko 777/1998 Errege Dekretuan ere antzerako aurreikuspenak agertzen dira. Azkenik, uztailaren 1eko 162/1997 Dekretuak ere, Lanerako Prestakuntza eta Orientabidea espezialitatearen kasu zehatzerako, trebakuntzako baldintzari dagokionez, antzerako aurreikuspenak jasotzen ditu.

Laburbilduz, espezialitate ezberdinetara iristeko adierazitako aukera horiek guztiz justifikatuak ziren LOGSEk deskribatutako hezkuntza sistema ezartzeko igaroaldian eta, horrenbestez, prozesu hori amaitutakoan, aukera horien zergatia ere amaitu da eta, horrenbestez, bide horiek ezinbestean desagertu behar ziren. Bakar-bakarrik eta izaera iragankorraz indarrean mantendu da titulazioaren bidez iristeko aukera, betiere lanpostuak betetzeko prozeduretan aukera horri eusten zaion bitartean; langile horien lekualdatze lehiaketetan aurreikusitakoarekiko koherentea den irizpide bateratua mantendu nahi da horren bidez.

Bestalde, txanda horretan bigarren itzulia edo ondorio-fasea ezartzen da, eta txanda horretan egiten diren atxikipenen ondorioz hutsik geratzen diren plazek ahalbideratuko dute une horretan dauden lekuz aldarazitakoek, berez, euren lanpostuetako titularitatea berreskura dezaten. Puntu horretan, pertsona bat baino gehiago erabateko titularitatea berreskuratzeko moduan daudenean, argitaratutako azken Lanpostuen Zerrendak eragindako pertsonek aurrez garatutako prozesuetan lekuz aldarazita suertatu direnekiko lehentasuna izango dute. Lehentasun horren oinarria honakoa da: Lanpostuen Zerrenda bakoitzak eragindako irakasleak lekuz aldarazitako irakasletzar joko dira bakar-bakarrik Dekretu honek arautzen duen prozesuaren amaieran ezin izan badira finkatu edo berratxiki; horrenbestez, prozesuan zehar erabateko titularitatea duten behin betiko irakasletzat joko dira.

Bigarren fasearen hirugarren txandak, plaza ibiltari edo mistoetan finkatu edo berratxiki ez direlako, hau da ikastetxe batean baino gehiagotan irakastea eskatzen duten postuetan edo espezialitate bat baino gehiago irakastea eskatzen duten postuetan finkatu edo berratxiki ez direlako, prozesuaren une horretan lekuz aldarazitako irakasle gisa daudenak, norbere borondatez berratxikitzea ahalbideratzen du. Txanda honetan ere aurreko puntuan adierazitako lehentasuna errespetatuko da.

4. Kapituluak prozesuaren fase eta txanda guztietan partaideak antolatzeko irizpideak arautzen ditu, pertsonen arteko lehia gertatzen denean horien arteko lehentasuna edo eskubide hobea zehazteko xedez. Baremo baten irizpideen arabera eskubide hobea zehaztuko da. Baremo horren oinarria, alde batetik, LOGSE indarrean jarri aurretik katedratiko ziren eta egoera zehatz batean dauden irakasleen preferentzia da. Beste aldetik, gainerakoen artean eskubide hobea zehazteko, zerbitzuan emandako denbora balioztatuko da, eta balio bera emango zaie kidegoan zerbitzuan emandako denborari eta ikastetxean zerbitzuan emandako denborari, balio biak batuko direlarik. Aurrenekoa langile multzo honetan erabili ohi den irizpideari jarraiki sartu da eta bigarrena hainbat eta hainbat aldiz eskatu den ikastetxeetako plantilen iraunkortasunaren printzipioa betetzearren sartu da. Berdinketa kasuetan irtenbidea emateko prozedura ere ezarri da kapitulu horretan.

   Egiazta daitekeenez, antolamenduko irizpideak eta ezarritako baremoa 7/2000 Dekretuak araututako prozesuan erabilitako berberak dira. Jarraikortasun horren arrazoiak bi motakoak dira. Alde batetik, antolamenduko irizpide horiek Dekretu horretan agertzea eta horiek aplikatu izana arauzko aurrekina da; aurrekin hori aintzat hartu behar da, honako erregulazioa baldintzatzen baitu, batez ere Dekretu horren prozesu negoziatzaileak agerian utzi zuelako gai hau etorkizunean eta behin betikoz arautuko zuen testuan, ahal den neurrian, Dekretuan bertan agertzen diren irizpideak jasotzeko borondatea.

   Bestalde, segurtasun juridikoko arrazoiek antolamenduko adierazitako irizpideak mantentzea aholkatzen dute, zeren eta bai prozesu horretan eragindako irakasleek, bai geroagoko prozesuetan eraginda suertatuko diren irakasleek, arrazoiz suposa dezakete egoera berdinetan irizpide berak erabiliko direla.

5. kapituluan Dekretuak arautzen duen langileen birbanaketa prozesua eta horren ondorioz sortuko diren eraginak biltzen dira. Ondorioei dagokienez, eraginik nabarmenena honakoa da: argitaratutako azken Lanpostuen Zerrendak ekarritako aldaketen ondorioz euren lanpostua kendu dela ikusi duten pertsonek, baldin eta Dekretu honen aurreikuspenen indarrez ezin izan badute finkatu edo berratxikita izan, lekuz aldarazitako irakasleen izaera hartuko dute. Lekuz aldarazitako irakaslearen figurak, gure araudian berria ez den figurak, esan nahi du pertsona horiek euren ikastetxeetan behin betiko destinoa mantentzen dutela, baina ikastordu kopuru nahikorik ez dutenez, beste ikastetxe batean irakatsi behar dutela; hala ere, ongi ulertu behar da, edozein arrazoi dela kausa, euren ikastetxeetan ikastordu beharrik berriro izanez gero, berriz itzuliko liratekeela bertan irakastera.

   Lekuz aldarazitako irakasleei kenduaren izaera hartzeko aukera emango zaie. Aukera erabili nahi izanez gero, klaustroaren bileratik bost egun igaro baino lehenago libreki egin beharko da hautua. Kenduaren izaera hartuz gero, interesdunak adierazten du bere ikastetxearekin duen lotura apurtu nahi duela eta destinoko beste ikastetxe bat nahi duela. Aukera egiteko eskubidea bost egunetara murrizteko arrazoia, lekualdatze-lehiaketarako deialdia egin baino lehentxeago berratxikipenaren ondorioak argitaratzeko premian datza.

   Prozesuaren eraginetako datari dagokionez, nahitaez, prozesuaren abiapuntua den Lanpostuen Zerrendak adierazten duen ikasturtearen hasiera izan behar da.

   Lehenengo eta bigarren xedapen gehigarriek Dekretu honek orokorki arautzen duen langileen birbanaketako prozeduran parte hartuko ez duten bi talde gutxituak aipatzen dituzte. Lan-kontratuko langileak eta Irakaskuntza Ertainetako Institutu Teknikoetako Irakasle Berezien Kidegoko funtzionarioak dira, betiere egituratu nahi diren hezkuntza mailetan irakasten duten irakasleen plantiletako kide baldin badira. Ulertzen dugu langile horiek oro har diseinatutako prozeduran parte hartzen ez badute ere, irakasleak birbanatzeko prozesuaren arauak lan-harreman mugagabea duten maila horietako langile guztien egoerak bildu behar dituela, lotura juridikoa edozein motatakoa izanik ere. Horregatik, laburki bada ere, langile horien balizko egoerak eta kasu bakoitzean jarraitu beharreko bidea ere arautu dira.

   Laburbilduz, zera gehitu liteke: Lanpostuen Zerrenda aldatzearen ondorioz euren lanpostua ezabatzen dela ikusten duten lan-kontratuko langile horiek, beren espezialitate eta hizkuntza eskakizuneko beste lanpostu bat, hutsik geratzen dena, esleitua izateko eta horretan behin betiko titular gisa jarduteko lehentasuna izango dute. Esleipen hori egiterakoan eragindako pertsonari ahalik eta kalterik txikiena egiten saiatuko da, eta ikasturtearen hasierako esleipen-prozesua baino lehenago egingo da.

   Irakaskuntza Ertainetako Institutu Teknikoetako Irakasle Berezien Kidegoko funtzionarioei dagokienez, bigarren xedapen gehigarriak beste hainbeste ezartzen du. Langile horiek sailkatu gabeko antzinako Bestelako Pertsonala deiturikoak dira, abenduaren 2ko 1467/1988 Errege Dekretuak, unibertsitatez kanpoko ikastetxe publikoetan zerbitzurik ematen duen bestelako pertsonala sailkatzekoak, ezarritakoarekin bat etorriz funtzionario bilakatu zirenak, alegia. Errege Dekretu horren 3. artikuluak ezartzen du langile horiek Dekretua argitaratu arte egiten zuten zeregin berberetan jarraituko dutela. Horrekin batera, azken lerrokadan dio langile horiek atxikitzen diren unibertsitatez kanpoko ikastetxeetako Lanpostuen Zerrendek aintzat hartuko dituztela langile horien ezaugarriak. Gauzak horrela, Lanpostuen Zerrendetan langile horien postuak ageriko dira, eta langile horiek euren lanpostuetan atxikita jarraituko dute. 1467/1988 Errege Dekretua aplikatuaz, ikastetxe horietako Lanpostuen Zerrendak antzinako Bestelako Pertsonalaren plaza jasoko du.

   Hirugarren xedapen gehigarriak, ikastetxe bi batuko balira Dekretu honek arautzen duen prozesua gauzatzeko jarraitu beharreko urratsen inguruan berariazko aurreikuspena egiten du.

   Eta gauza bera gertatzen da laugarren xedapen gehigarrian ikastetxeak bereiztu/batu kasuetarako. Nabarmendu behar da, ikastetxe hartzailean sartuko diren pertsonak zehazteko ondorioetarako, aldez aurretik ikastetxe igorlean Dekretu honek arautzen duen prozesua egin beharko dela, eta prozesu horretan bereizketa/batuketaren gaia diren lanpostu guztiak sartu beharko direla.

   Azkenik, Dekretuak bi xedapen iragankor ditu. Lehenengo xedapen iragankorrak titulazioaren bidez berratxikitzeko aukera aztertzen du, betiere irispide hori postuak hornitzeko prozesuari begira irekita dagoen neurrian. Bigarren xedapen iragankorrak, bestalde, espezialitateen arteko korrelazioa arautzen du, Dekretu honen II. eranskinak aurreikusitakoarekin bat etorriz.

   Arauzko honako proiektuari ekiteko, Euskal Autonomia Erkidegoak bere gain hartutako eskumenak aintzat hartu dira, eta LOGSEren bederatzigarren xedapen gehigarrian xedatutakoaren babesean ekin zaio proiektuari; izan ere, xedapen gehigarri horrek ahalmena eman die autonomia erkidegoei Irakaskuntzako Funtzio Publikoa zein bere eskumenen testuinguruan arautzeko.

   Ekainaren 12ko 9/1987 Legeak, ordezkapen-organoei buruzkoak eta lan baldintzak zehazteari eta herri administrazioen zerbitzura dauden langileen partaidetzari buruzkoak, 32. artikuluan xedatutakoarekin bat etorriz, Dekretu hau izapidetzean sindikatuen ordezkapenak alegazioak aurkezteko aginduzko izapidea bete da eta Dekretuaren zirriborroa aipatu ordezkapenarekin Plangintzako Batzorde Teknikoan negoziatu da.

   Bestalde, aginduzko txostenak eskatu zaizkie Hezkuntza, Unibertsitate eta Ikerketa Sailaren Aholkularitza Juridikoari, Lege Garapen eta Arau Kontrolerako Zuzendaritzari, Euskara Planen Zuzendaritzari, Funtzio Publikoaren Zuzendaritzari, Kontrol Ekonomikoko Bulegoko Zuzendaritzari eta Euskadiko Eskola Kontseiluari.

   Horren indarrez, Hezkuntza, Unibertsitate eta Ikerketa sailburuaren proposamenaz eta Jaurlaritzaren Kontseiluak 2002ko apirilaren 16an egindako bilkuran aztertu eta onetsi ondoren, hauxe