Gobernantza Publiko eta Autogobernuko sailburuak 2022ko maiatzaren 18an emandako Aginduaren bidez, oinarri orokorrak onartu ziren arautzeko nola bideratuko diren Euskal Autonomia Erkidegoko Administrazio Orokorreko eta haren organismo autonomoetako kidego eta eskaletan enplegua finkatzeko prozesu bereziak eta enplegua finkatzeko salbuespenezko prozesuak. Agindu hori, berriz, Euskal Herriko Agintaritzaren Aldizkarian argitaratu zen, 2022ko maiatzaren 23an.

Era berean, Gobernantza Publiko eta Autogobernuko sailburuaren 2022ko irailaren 8ko Aginduaren bidez, zeina 2022ko irailaren 13an Euskal Herriko Agintaritzaren Aldizkarian argitaratu baitzen, Euskal Autonomia Erkidegoko Administrazio Orokorreko eta haren organismo autonomoetako Kidego Teknikoko Eraikingintza, Hirigintza eta Lurralde-antolamenduko Eskalan enplegua finkatzeko prozesu bereziko eta salbuespenezko prozesuko deialdia egin zen, eta prozesu horietako oinarri espezifikoak onartu ziren.

Oinarri orokorren 6. apartatuan, lanpostuen esleipen gehigarriak zein kasutan eta egoeratan egingo diren zehazten da: lehenengo itzulian esleitu diren lanpostuak, baldin eta lanpostu horietarako behin betiko hautatutako pertsonak azkenean funtzionario izendatu ez badira edo funtzionario izendatuta ere lanpostua jabetzan hartu ez badute; lehenengo itzulian esleitu diren lanpostuak, baldin eta esleipendunak lanpostuak jabetzan hartuaz batera plaza-erreserbarik gabeko eszedentzia egoerara igaro badira; karrerako funtzionarioen titulartasunekoak ziren lanpostuak, funtzionario horiei beste lanpostu bat esleitu bazaie finkatze-prozesuren batean. Horrez gain, aukera dago deitutako lanpostuak baino % 10 gehiago esleitzeko, lanpostu huts gehiago sortzen badira. Langileen ordezkariekin negoziatu eta onartu da beste % 10 horretan zehazki zein zuzkidura sartuko diren zehazteko irizpideak.

Administrazio Publikoaren Euskal Institutuko zuzendariaren 2025eko azaroaren 17ko ebazpenaren bidez:

Zehaztu zen zenbat plaza esleituko diren, eta plaza horiek nola banatuko diren hizkuntza-eskakizunaren arabera.

Esleipen osagarrietan parte har dezaketen pertsonak identifikatu ziren.

Esleipen prozedura zehaztu zen.

Lanpostuak aukeratzeko epea ezarri zen, baita lanpostua aukeratu behar zituzten hautagaiei dei egiteko prozedura ere.

B gidabaimena izatearen baldintza espezifikoa alegatzeko sistema ezarri zen.

Euskal Autonomia Erkidegoko Administrazio Orokorreko eta haren organismo autonomoetako kidego eta eskaletan enplegua finkatzeko prozesu bereziak eta enplegua finkatzeko salbuespenezko prozesuak arautzen dituzten oinarri orokorren 12., 13., 14., 15. eta 16. apartatuetan aurreikusitakoaren arabera (2022ko maiatzaren 18ko Agindua) garatuko dira lanpostuak aukeratzeko prozedura, destinoen esleipena, hautatutakoen zerrenda, dokumentazioaren aurkezpena, izendapena eta lanpostuaz jabetzeko prozedura.

Administrazio Publikoaren Euskal Institutuko zuzendariaren 2025eko abenduaren 3ko ebazpenaren bidez Kidego Teknikoko Eraikingintza, Hirigintza eta Lurralde-antolamenduko Eskalan enplegua finkatzeko prozesu berezian hautatutako pertsonen eta esleipen gehigarriko lanpostuen behin-behineko zerrenda argitaratu zen.

Hautatutako pertsonen eta esleipen gehigarriko lanpostuen behin-behineko zerrenden aurkako erreklamazioak aurkezteko epea amaitu ondoren, akats material bat antzeman da IVAPeko zuzendariaren 2025eko urriaren 2ko Ebazpenaren bidez onartutako behin betiko azken emaitzetan. Administrazio Publikoen Administrazio Prozedura Erkidearen urriaren 1eko 39/2015 Legearen 109.2 artikuluan ezarritakoaren arabera, bidezkoa da akats hori zuzentzea.

Horrekin, eta hautatutako pertsonen eta esleipen gehigarriko lanpostuen behin-behineko zerrenden aurkako erreklamazioak ebatzita, hautatutako pertsonen eta esleipen gehigarriko lanpostuen behin betiko zerrendak argitaratu behar dira.