Bizikidetzaren eta giza eskubideen arloan proiektuak garatzen dituzten erakundeei laguntzak, 2026 urterako

Izaera pribatuko eta irabazi-asmorik gabeko pertsona juridikoak, fundazioak, elkarteak eta legez eratutako gizarte-ekimeneko kooperatibak, baldin eta haien helburuak, beren estatutu sozialetan aurreikusitakoaren arabera, giza eskubideak, bakea eta bizikidetza demokratikoa badira, betiere haien programak edo jarduerak Euskal Autonomia Erkidegoan egiten badira eta Eusko Jaurlaritzaren Elkarteen eta Erakundeen Erregistro Orokorrean edo, hala badagokio, dagokion erregistro publikoan erregistratuta badaude.

Euskal Autonomia Erkidegoan egoitza duten edo Euskal Autonomia Erkidegotik kanpo egoitza duten terrorismoaren eta giza eskubideen urraketen biktimen elkarteek ere eskatu ahal izango dituzte laguntzak, baldin eta elkartekideen artean Euskal Autonomia Erkidegoan gertatutako ekintza terroristen edo giza eskubideen urraketen biktimak badituzte.

Erakunde interesdunek Euskal Autonomia Erkidegoko Administrazio Publikoaren egoitza elektronikoaren bidez aurkeztu beharko dituzte eskabideak, deialdiaren ebazpenean ezartzen den dokumentazioarekin batera, eta bertan kontsultatu eta egin beharko dituzte prozedura honetarako behar diren izapide guztiak, egoitza horretan horretarako dagoen eredua erabiliz. Eredu hori nahitaez erabili beharko da kasu guztietan.

Eskabide horrekin batera, proiektuaren, programaren edo jardueraren memoria aurkeztuko da, bai eta proiektua gauzatzeko behar den aurrekontua ere, Euskal Autonomia Erkidegoko Administrazio Publikoaren egoitza elektronikoan gaitutako ereduak erabiliz.

Erakunde eskatzaileak ez du aurkeztu beharko jada administrazio eskudunaren esku dagoen dokumentazioa, edo beste administrazio publiko batek egindakoa. Laguntzak kudeatzen dituen organoak dokumentazio hori kontsultatu edo eskatu ahal izango du ezarritako elkarreragingarritasun-mekanismoen bidez, salbu eta erakunde interesdunak berariaz adierazten badu aurka dagoela. Egoitza beste autonomia-erkidego batean duten erakunde eskatzaileen kasuan, zeinekin Euskal Autonomia Erkidegoko Administrazioak ez baitu elkarreragingarritasun-zerbitzurik, zerga-betebeharrak eta Gizarte Segurantzarekikoak betetzen dituztela egiaztatzen duen ziurtagiria aurkeztu beharko da.

Dirulaguntzaren erakunde onuradunek emandako dirulaguntzaren erabilera justifikatzen duten agiriak aurkeztu beharko dituzte, jarduera egin eta gehienez ere hilabeteko epean, eta betiere 2027ko urriaren 1a baino lehen, Euskal Autonomia Erkidegoko Administrazio Publikoaren egoitza elektronikoan eskuragarri dauden eredu normalizatuak erabiliz.

Ezarritako baldintzak bete direla eta programan aurreikusitako helburuak lortu direla justifikatzeko, egindako gastuaren justifikazio-kontu sinplifikatua erabiliko da.

Onartutako aurrekontu osoa justifikatu beharko da.

Diruz lagundutako jardueraren egiaztagiriak honako hauek jaso beharko ditu:

1. Jarduketa-memoria bat, garatutako proiektua, programa edo jarduera bete dela justifikatzen duena, non deskribatuko baita nola txertatu den genero-ikuspegia proiektuan, bai eta tratu- eta diskriminazio-desberdintasuneko egoeran dauden kolektiboen arteko intersekzionalitatea ere.
2. Egindako jardueren kostua justifikatzen duen memoria ekonomikoa.
3. Diru-sarreren eta gastuen balantzea. Justifikazio-aldia amaitu aurretik benetan ordaindu den gastua hartuko da kontuan. Balantze horretan, diruz lagundutako jarduerak jaso dituen diru-sarrera eta dirulaguntzei buruzko informazio zehatza jasoko da, zenbatekoa eta jatorria adierazita.
4. Jardueraren gastuen zerrenda sailkatua, alderdi hauek zehaztuta: hartzekodunaren eta dokumentuaren identifikazioa, zenbatekoa, jaulkipen-data eta ordainketa-data. Gastuen eta fakturen zerrenda Giza Eskubideen eta Biktimen Arretarako Zuzendaritzak normalizatutako formulario eta txantiloietan aurkeztuko da.
5. Diruz lagundutako proiektua edo programa gauzatzeko egindako gastuen jatorrizko fakturak edo kopia konpultsatuak. Dokumentazio hori zenbakituta eta ordenatuta emango da.

Emandako dirulaguntzaren guztizko zenbatekotik, % 15 Dekretu Arautzailearen 2. artikuluan deskribatutako administrazio- eta funtzionamendu-gastuak ordaintzeko erabili ahal izango da.

Erakunde onuradunetik kanpoko zerbitzu eta profesionalak kontratatzeko baimena emango da, proiektuaren izaeragatik zerbitzu mota hori beharrezkoa denean hura gauzatzeko. Baimendutako azpikontratazioa % 70ekoa izango da.

Era berean, erakunde onuradunek egokitzat jotzen duten beste edozein dokumentazio osagarri aurkeztu ahal izango dute, diruz lagundutako jarduera hobeto justifikatzeko.