2025eko MEC. Merkataritza-establezimenduak eta merkataritza-jarduerarekin lotutako zenbait zerbitzu modernizatzeko laguntza.

EAEko merkataritza-establezimenduetan eta merkataritza-jarduerarekin lotutako zenbait zerbitzutan energia-kontsumoaren modernizazioa eta efizientzia hobetzea, berrikuntzaren bidez; oinarri teknologikoa eta ekoefizientea duten prozesuak ezartzea; eta kudeaketa-tresnak, azpiegiturak eta ekipamenduak hobetzea, kalitate- eta lehiakortasun-maila handiagoa lortzeko bide gisa.

Diruz lagundu daitezkeen inbertsioak:

1. Laguntzaren xede den establezimenduaren azpiegitura eta ekipamendua berritzea:

a) Establezimenduaren barrualdea edo kanpoaldea egokitzeko, berritzeko edo handitzeko eraberritze, obra eta instalazioak, betiere eragina baldin badute establezimenduaren egokitzapenean, merkataritza-azaleraren banaketan edo itxura hobetzeko orduan.

b) Energia-aurrezpen edo -efizientziarako neurriak ezartzeko obrak eta instalazioak (ate automatikoak, instalazio elektrikoak, okupazio-sentsoreak, isolamenduak…).

c) Oztopo arkitektonikoak kentzeko egindako berrikuntzak, mugikortasun murriztua duten pertsonen irisgarritasuna hobetzeko.

d) Errotuluak eskuratu eta establezimenduaren kanpoaldean instalatzea, izen komertziala, marka, logotipoa edo antzekoak identifikatzeko, bai eta eguzki-oihalak erosi eta instalatzea ere.

e) Establezimenduaren jarduera nagusiari lotutako altzariak eta makineria erosi, instalatu eta muntatzea.

f) Ekipamendua eta altzariak erostea.

g) Alarmak eta segurtasun-sistemak. Diruz lagundu daitekeen inbertsioaren gehieneko zenbatekoa ezin izango da 6.000 euro baino handiagoa izan, BEZik gabe.

h) Lokala girotzeko ekipamenduak, betiere energia-efizientzia altuko ziurtagiri energetikoa badute.

i) Merkataritza-jarduerari zuzenean lotutako espazioak eta elementu komunak hobetzeko eta modernizatzeko inbertsioak, merkataritza-gune batean integratuta badaude; besteak beste, korridoreak, instalazio teknikoak, estalkiak, kanpoko fatxada, zerbitzuak edota sarbideak, betiere espazio horiek laguntzaren xede den establezimenduetan garatutako jardueraren titularrek kudeatzen badituzte, jabekide-erkidegoko araubidean. Merkataritza-gunean bildutako establezimenduetako jardueraren jabe bakoitzak, jabekide-erkidegoaren partaide denak, esandako espazio komunean egiten diren inbertsioetatik, bere partaidetzari dagokion gastuen zatiagatik (zati alikuota) eskatu ahal izango du laguntza.

j) Proiektua idaztetik, obra zuzentzetik edo arkitekto, ingeniari edo instalatzaile baimenduek egindako proiektuetatik eratorritako gastuak, betiere laguntzaren xede den establezimenduan obrak eta instalazioak egiteko beharrezkoak badira.

2. Teknologia berriak eta berrikuntza sartzea laguntzaren xede den establezimenduan:

a) Ekipamendu informatikoak, aplikazio informatikoak eta kudeaketa-softwarea, laguntzaren xede den establezimenduaren kudeaketa hobetzera zuzendutakoak, betiere merkaturatze-prozesuetan integratuta edo enpresa-kudeaketara bideratuta badaude. Ekipamendu informatiko bat eta periferiko mota bakoitzeko unitate bat baino ez dira diruz lagunduko, inbertsioa gauzatzen den establezimendu bakoitzeko.

b) Merkaturatze-sistemak sortu, garatu, ezarri, hobetu edo martxan jartzeko lanak (webgunea garatzea, online saltzea, ecommerce, scommerce, mcommerce eta parekoak) edo establezimendua kudeatzekoak (bezeroak, hornitzaileak eta abar).

c) Salmenta-puntuen terminalak eta produktuen irakurgailu optiko eta kodetze-sistemak.

d) Salgaien balantza elektronikoak.

e) Kutxa-erregistratzaileak.

f) TicketBAI (TBAI) sistemarako fakturazio-softwarea ezartzea.

Onartutako inbertsioaren gutxieneko zenbatekoa (BEZik gabe) merkataritza-establezimendu bakoitzeko:

• 3.000 euro 1. puntuan (azpiegiturak eta ekipamenduak berritzea) jasotako inbertsioetarako.

• 1.000 euro 2. puntuan (teknologia berriak eta berrikuntza sartzea) jasotako inbertsioetarako.

Ez dira diruz lagunduko:

1.– Inbertsio hauek ezin dute inola ere dirulaguntzarik jaso:

a) Lokalak erostea eta eskualdatzeko eskubideak.

b) Garraio-elementuak, telebistak edo telefono-terminalak erostea.

c) Ekipamendua leasing edo renting bidez erostea.

d) Erakusteko eta probatzeko artikuluak, bai eta ondoren salmentan jar daitezkeenak ere.

e) Argi-aldaketa hutsa.

f) Eraberritze-lanak, baldin eta ez badute establezimenduaren itxura modu argi eta zuzenean aldatuko.

g) Laguntzaren enpresa eskatzaileak berak fabrikatu, egin edo garatutako elementuak edo ekipamenduak.

h) Eraberritzeak, obrak edo instalazioak baliabide propioekin egitera bideratutako materialak erostea.

i) Zerbitzuaren edo saltokiaren tipologia dela eta, gastu gisa (eta ez inbertsio gisa) hartuko diren ekipamenduak eta tresnak.

2.– Gastu hauek ezin dute inola ere dirulaguntzarik jaso:

a) Administrazio-baimenen edo lizentzien ondoriozko tasak, aseguruak eta garraio-kostuak.

b) Balio erantsiaren gaineko zerga (BEZ) eta, oro har, mota guztietako zergak, tasak edo kontribuzioak.

c) Aktibo baten elementuen mantentze-, konponketa- edo ordezte-lanen gastuak.

d) Bulegoko materialaren, tresnen eta antzekoen gastuak.

e) Dekorazio-gastuak.

f) Profesionalen aholkularitzako eta prestakuntzako gastuak.

g) Softwarea mantentzeko lanen eta eguneraketen gastuak, edo tresna informatikoak erabiltzeko lizentziak, betiere ez badira ezinbestekoak TicketBAI sistema ezartzeko. Datu hori modu egokian justifikatu beharko da.

h) Web-orrien publizitate- eta posizionamendu-gastuak.

Diruz lagundu daitezkeen inbertsioak edo aktiboak eskuratzeko kostua ez da inola ere merkatuko balioa baino altuagoa izango, Dirulaguntzen Araubidea Erregulatzeko abenduaren 21eko 20/2023 Legeak 30.1 artikuluan ezarritakoarekin bat etorrita.

Diruz lagundu daitezkeen inbertsio eta aktiboen baldintzak:

a) Zorrozki beharrezkoak diren inbertsioak eta laguntzaren xede den establezimenduan garatutako jarduera nagusiarekin zuzenean lotura dutenak.

b) Laguntzaren xede diren Euskal Autonomia Erkidegoan kokatutako kaleko txikizkako establezimendu fisikoetan —establezimendua zabalik eta jardunean dagoela— egindako inbertsioak.

c) Enpresaren aktiboan lehen aldiz sartutako inbertsioak, laguntzaren xede den establezimenduan bertan badaude, hau da, salmenta gauzatzen den establezimenduan edo haren eranskinetan. Eranskinek laguntzaren xede den establezimenduari elkartuta edo haren ondoan egon beharko dute eta merkataritza jarduerarekin zerikusia izan beharko dute. Diruz lagundutako inbertsioak gutxienez bi urtez egon beharko du (dagokion fakturaren datatik aurrera) laguntza eskatu den establezimenduan. Tarte horretan ezin zaie hirugarren pertsona fisiko nahiz juridikoei laga.

d) Diruz lagun daitezkeen lerroetan jasota egotea (azpiegiturak eta ekipamenduak berritzea edo teknologia berriak eta berrikuntza txertatzea).

e) Inbertsioa benetan egin izana, diruz lagundu daitekeen aldian fakturatu izana (2024ko urriaren 1etik 2025eko irailaren 30era) eta 2024eko uztailaren 1etik justifikazio-aldia amaitu arte ordaindu izana (bi hilabete, dirulaguntza emateko ebazpena jakinarazi eta hurrengo egunetik aurrera).

Ordainagiriak eskabidearekin batera aurkezten ez badira, gehienez ere bi hilabeteko epean aurkeztu beharko dira, dirulaguntza emateko ebazpena jakinarazi eta hurrengo egunetik zenbatzen hasita, eta 2025eko abenduaren 01eko epea errespetatuz.

Diruz lagundu daitekeen aldia:

2024eko urriaren 1etik 2025eko irailaren 30era arte, biak barne.

Inbertsioek onartutako inbertsioaren % 40ko dirulaguntza jaso ahal izango dute, eta % 52ra arte handitu ahal izango da. Establezimendu bakoitzeko gehieneko dirulaguntza 10.000 eurokoa izango da.

Ehuneko horiek handitu egin daitezke enpresak honako hauek egiaztatzen baditu:

a) 2024an "Merkabide", "Retail Euskal Eskola" edo "Eus-commerce" programetako batean, gutxienez, parte hartu izana: puntu 1.

b) 8. oinarriko 1. puntuan (azpiegiturak eta ekipamenduak berritzea) jasotako inbertsioa: 2 puntu.

c) Emakumearen enplegua egonkortzeko irizpidea, dirulaguntzaren xede den establezimenduko enpresa eskatzailearen langileen erdiek gutxienez kontratu mugagabea dutela eta emakumeak direla egiaztatzen bada: puntu 1.

d) Berdintasun-plana edo lana eta familia bateragarri egiteko plana izatea, edo Emakumeen eta Gizonen Aukera Berdintasunerako entitate laguntzailearen izendapena, Emakunde-Emakumearen Euskal Erakundeak edo beste edozein administrazio publikok emanda: puntu 1.

e) Enpresa Kontsumobideko Arbitraje Sistemari atxikita badago: puntu 1.

f) Eskabide-egunean merkataritza-elkarteren batekin lotura badu, eta lotura hori laguntzaren xedea den establezimenduan egiten den inbertsioak bertan iraun artekoa bada gutxienez: puntu 1 gehienez. Horretarako, merkataritza-elkartea Euskadiko Merkatarien Elkarteen Erroldan inskribatuta egon beharko da (indarrean dagoen elkartean, jakina).

g) 2024an «Berriz Enpresa» enpresa-transmisioko programa batean parte hartu izana: puntu 1.

h) Entitate eskatzaileak laguntzaren xede den establezimenduan egiten duen merkataritza-jarduerak 10 urte baino gehiagoko antzinatasuna izatea: puntu 1.

i) Establezimenduan euskaraz aritzea jendearekin, Bai Euskarari ziurtagiriaren, BIKAIN Hizkuntza Kudeaketaren Kalitatearen ziurtagiriaren edo Euskararen Kalitate Ziurtagiriaren bitartez egiaztatuta, 2024an; edo, bestela, «Euskaraz barra-barra» proiektuan parte hartzea (https://euskarazbarrabarra.eus/): puntu 1 gehienez.

j) Energia-komunitateetan parte haru izana (Ekiola Energía Sustapenak SL, EVE, TEK -Tokiko Komunitate Energetikoak-...) 2024an: 2 puntu.

Dirulaguntzaren ehunekoa, gehikuntza-puntuak barne, ez da inola ere onartutako guztizko inbertsioaren % 52 baino handiagoa izango.

Ordainketa bakarra egingo da