Bavaria, Korsika, Flandria, Gales, Euskal Hirigune Elkargoa eta Akitania Berriko Eskualde Berriaekin 2025 lankidetza teknikoan aritzeko proiektuetarako laguntzak

Ebazpen honen helburua da eskualde estrategikoko (Bavaria, Korsika, Flandria, Gales, Euskal Hirigune Elkargoa eta Akitania Berriko Eskualde Berria) pertsona juridikoekin 2025erako egiteko alde biko jarduketa- eta lankidetza-proiektuak finantzatzeko laguntzen deialdia egitea, honako arlo hauetan jasotako gaietan betiere:

a) Euskadik eta Bavariak 2021eko ekainaren 23an sinatutako Elkar Ulertzeko Memoranduma:

• Digitalizazioa, adimen artifiziala, 4.0 industria

• Teknologia jasangarriak, garbiak eta ingurumena zaintzen dutenak

• Ingurumen-babesa (klima-egokitzapenaren eta ekonomia zirkularraren ikuspegitik)

• Barne-segurtasuna eta polizia (delinkuentziaren eta prebentzioaren aurkako borrokan eta polizien prestakuntzan eta hobekuntzan oinarrituta)

• Kultura-lankidetza

b) Euskadik eta Korsikak 2021eko apirilaren 13an sinatutako Elkar Ulertzeko Memoranduma:

• Euskararen eta korsikeraren hizkuntza-normalizaziorako politikak

• Atzerrian bizi den diasporarekiko edo gizataldeekiko harreman- eta lotura-politikak

• Lankidetza garatzea Europako gaien esparruan

• Interes komuneko esparruetako beste lankidetza batzuk, hala nola kultura, turismoa, politika ekonomikoa edo ingurumena

c) Euskadik eta Flandriak 2021eko azaroaren 15ean sinatutako Elkar Ulertzeko Memoranduma:

• Ikerketa, garapena eta berrikuntza (industria eta teknologia, osasuna, gizarte-politikak, genero-berdintasuna, sektore publikoaren kudeaketa, azpiegiturak eta garraioa)

• Lan-merkatua eta politika ekonomikoa (lanbide-heziketa, produktibitate- eta lehiakortasun-politikak)

• Ingurumena (klima-aldaketa, uren, materialen eta hondakinen tratamendua, bai eta ingurumenarekin eta energia berriztagarriekin bateragarriak diren teknologiak ere)

• Osasuna (batez ere, zainketa kronikoak)

• Kultura- eta sormena-sektorea

• Kultura anitzeko gizarte tolerante bat bultzatzea (bakea eratzea eta giza eskubideak errespetatzea)

• Eskualdeek Europan duten zeregina indartuko duten ekimenak eta aliantzak

d) Euskadik eta Galesek 2018ko uztailaren 12an sinatutako Elkar Ulertzeko Memoranduma (2021eko uztailaren 12an sinatutako akordioaz luzatua):

• Mugikortasuna eta garraioak (batez ere, trenbide-azpiegitura eta -zerbitzuak)

• Ingurumena eta klima-aldaketa

• Teknologia, berrikuntza eta lehiakortasuna

• Itsas energiak

• Nekazaritzako elikagaien industria

• Hezkuntza eta prestakuntza

• Zerga-estrategia eta -politika, zerga-administraziorako politika, aurrekontu-kudeaketa eta gizarte-zerbitzuak

• Osasuna eta gizarte-laguntzarako zerbitzuak, balioetan funtsatutako arreta medikoa eta zahartze aktibo eta osasungarria

• Negozio-aukerak

• Kultura anitzeko gizarte tolerantea bultzatzea (batez ere, hizkuntza-politikaren eta kultura-sektorearen sustapenaren arloan)

e) EAEren eta Euskal Hirigune Elkargoaren artean 2019ko urriaren 7an sinatutako lankidetza instituzionalerako memoranduma:

• Mugaz gaindiko mugikortasuna

• Goi-mailako irakaskuntza, prestakuntza eta ikerkuntza

• Garapen ekonomikoa eta turismoa

• Nekazaritza

• Lurralde-garapen jasangarria

• Ingurumena eta biodibertsitatea

• Kultura eta euskara

f) Euskadiren eta Akitaniaren arteko Lurralde Lankidetzarako Europako Taldearen hitzarmena, 2011ko uztailaren 11n sinatua:

• Eskualde bien arteko komunikazioak hobetzea, bereziki irisgarritasuna erraztuz eta, pertsonak eta salgaiak eramateko, ingurumena errespetatzen duten garraiobideak sustatuz

• Ikerketa- eta berrikuntza-jarduerak osagarri bihurtzea eta baloratzea, lurralde osoan teknologia-, ekonomia-, eta gizarte-dinamika berri bat –gobernantza on batez lagundua– sortu dadin

• Lurraldearen garapen jasangarria sustatzeko proiektuak abian jartzea, bereziki, energia berriztagarrien eta baso-balorizazioaren arloetan

• Hezkuntzaren eta prestakuntzaren arloan, herritarren erabateko garapena bermatzeko metodoak eta bitartekoak partekatzea

• Nekazaritzari, elikadurari eta osasunari lotutako gaiak elkarrekin tratatzea eta, ildo horretatik, kalitatearen, jatorriaren eta trazabilitatearen inguruko ekintzak bultzatzea eta lurraldeei balioa emango dieten nekazaritza-praktika jasangarriak garatzea

• Kultura- eta arte-dinamika sendotzea eta, bereziki, euskara eta euskal kultura sustatzea, sormen horren adierazpenetan txertatutako alderdi berri baten bitartez

• Elkarren laguntzaz, turismo-baliabideak batera baloratzea, betiere, geografia- eta kultura-identitateak errespetatuko dituen garapen kontrolatuaren esparruan

• Lurralde-lankidetza, nagusiki berrikuntzaren, ezagutzaren ekonomiaren, ingurumenaren eta arriskuei aurre hartzearen arloan oinarrituta

• Praktikarik onenak –adibidez, hiri-garapen jasangarriarekin lotutakoak– zein diren identifikatu, horiek eskualdatu eta hedatzeko esperientziak elkartrukatzea

• Europar Batasunean garapenerako ardatzak direnak aztertu, horiei buruzko datuak jaso nahiz gainbegiratzearekin zerikusia duten ekintzak

Bavaria, Korsika, Flandria, Gales, Euskal Hirigune Elkargoa eta Akitaniako Eskualde Berria Europako eskualde estrategikoekiko lankidetza teknikorako proiektuetarako laguntzen guztizko kreditua 50.000 eurokoa izango da 2025erako, Euskal Autonomia Erkidegoaren Aurrekontu Orokorren kargura.

Honako kontzeptu hauek lagundu ahal izango dira diruz:

a) Diruz lagundu daitezkeen proiektuen arabera, Bavaria, Korsika, Flandria, Gales, Euskal Hirigune Elkargoa eta Akitaniako Eskualde Berria Europako eskualde estrategikoetara joaten diren EAEko pertsonen bidaia- eta egonaldi-gastuak:

• Proiektu bakoitzeko garraio-gastuak: hegazkin-txartelen benetako kostua (beste edozein garraiobidek ere balio du), 1.000 euro gehienez.

• Ostatu- eta janari-gastuak proiektu bakoitzeko: 180 euro eguneko, gehienez ere 7 egunez.

b) Aldebiko proiektuak gauzatu, sustatu eta zabaltzeko gastuak, proiektu bakoitzeko jaso daitekeen dirulaguntzaren gehieneko zenbatekoa (5.000 euro) osatu arte, deialdi honen 3. artikuluan ezarritakoaren arabera.

Laguntzen gehieneko zenbatekoa proiektuaren kostuaren% 50 izango da erakunde eskatzailearentzat.

Diru-laguntzak honela ordainduko dira:

• Lehenengo ordainketa (% 40) dirulaguntzaren onespena sinatu ondoren egingo da.

• Bigarrengo ordainketa (% 60) proiektua amaitu eta gastu guztiak justifikatu ondoren egingo da 2025eko azaroaren 30a baino lehen.