Azaroaren 30ean 2022-2036 Etxebizitzaren aldeko Itun Soziala sinatu da Bilbon, Eusko Jaurlaritzako Lurralde Plangintza, Etxebizitza eta Garraio Sailak bultzatutako akordioa.

Euskadik arlo horretan dituen erronkei eraginkortasunez aurre egiteko, etxebizitza-arloan herritarrekin jarduten duten eragileek modu lerrokatuan, partekatuan eta lankidetzan lan egin beharko dute, epe ertain eta luzerako ikuspegiarekin.

Parte-hartze handia

Etxebizitzaren aldeko Itun Sozial berrian honako hauek daude ordezkatuta: erakunde sozialak edo etxebizitza-kooperatibak, sindikatuak, enpresa pribatuak, elkargo profesionalak, unibertsitateak, zentro teknologikoak eta klusterrak. "Oso talde heterogeneoa da, eta jakin izan du topalekuak aurkitzen herrialdeko itun handi bat lortzeko, etxebizitzaren arloan kudeaketa eraginkorragoa lortzeko", adierazi du Iñaki Arriola Etxebizitzako sailburuak.

Lau jomuga 2036ra arte

EISk lau helburu kuantitatibo eta lehentasunezko sei jarduera-ildo ezartzen ditu helburu horiek betetzeko:

• 1. Helburua: autonomia-erkidegoko etxebizitza nagusien % 5 alokairu merkeko eskaintza publikora bideratzea 2036rako (50.000 etxebizitza).
• 2. Helburua: babes publiko iraunkorreko etxebizitzen parkea etxebizitza nagusien % 12ra igotzea.
• 3. Helburua: hamabost urteko epean eraikinen % 3 urtero birgaitzea lortzea, egungo %1,5aren aldean; horrek, epe horretan, 350.000 etxe eraberrituko direla esan nahi du -eraikitako hirutik bat, gutxi gorabehera-.
• 4. Helburua: etxebizitza libreko parke bat egon behar da, bai obra berrikoa, bai birgaitutako etxeetakoa, baliabide ekonomiko nahikoak dituzten kolektiboentzat

Sailburuak ekitaldian nabarmendu duenez, Euskadi erreferentea da etxebizitza-politiken arloan, lege autonomiko batekin eta neurri zehatzekin, hala nola gazteei laguntzeko neurriekin, horiek inspirazio-iturri baitira Estatuan. Gainera, Euskal Autonomia Erkidegoan etxebizitza duina eta kalitatezkoa izatea eskubide subjektiboa dela gogorarazi du, eta hori oinarrizkoa dela azpimarratu du, eta haren esku dagoela beste eskubide batzuk lortzea.

Informazio gehiago

https://www.etxebide.euskadi.eus/x39-ovad01/eu/contenidos/plan/ovv_psv_2022_2036/eu_ovv_admi/index.shtml