#BesaldIA2627 proiektuak zabaltzen duen aukera

Bigarren Elkarrizketa Publikoetan [politika publikoen ebaluazioari buruzkoak] (Yimbi aretoan, Bilbon, 2026ko irailaren 23an), gure #BesaldiKide eta Gobernantza Saileko sailburuordea Xabier Otxandianok Besaldik egindako ibilbidea eta orain arte lortutako aurrerapenak nabarmendu zituen. Bertan izan zen, besteak beste, Itziar Fernández Ogasuneko zuzendaria ere. Otxandianok, Eusko Jaurlaritzan politika publikoen ebaluazioaren arloan duen erantzukizunetik, aitortza beroa egin zion Besaldik egindako lanari.

Leku hura zenbat lagunek eta nork bete zuten —Besaldiren lehen ebaluazio mardula (nahitaezko lehen txosten orokorra) ia amaituta zegoen unean— seinale onak ziren, ziurrenik. Organoa, etenik gabe, dagoeneko lanean ari da enplegu-politiken lehen ebaluazioan (hiru urtekoa) (Daleph eta KSNETekin); halaber, 2027a amaitu arteko jarduera aurreikusita dauka bere jarduketa-ildoetan —hala nola jarraipena eta ebaluazioa, ikerketa, sistematizazioa, sentsibilizazioa, prestakuntza, komunikazioa eta dokumentazioa—, eta jarduera hori hainbat tresnaren bidez egituratuta dago, dirulaguntzen bidezkoak (SIIS eta EHU) zein kontratu bidezkoak (Iseakekin, esaterako), funtsean dagoeneko esleituta.

Aukera bat zabaltzen zaie, beraz, Nekane, Marijo, Maite eta Fernandori (Besaldiko langileak), erreferentziazko komunitatearen, saileko eta Jaurlaritzako langileekin eta egituren, adimen artifizialen eta azpiegitura digitalen laguntzaz eta, kasu honetan, KPMGren laguntzaz: Besaldi pentsatzea, aztertzea, probatzea, ikastea, erabakitzea, diseinatzea eta eraikitzea. #BesaldIA2627 proiektuaren bidez, bor-borra apaldu eta ideiak pausatzen laguntzea.

Jarduerak baliabideak kontsumitzen ditu eta ondorioak eragiten ditu, baina ez ditu nahitaez aktibo iraunkorrak eraikitzen, banakakoak izateari utzi eta kolektibo bihurtzen diren horietakoak. Besaldin, gauzak egiteari utzi gabe, orain badugu zer izan nahi dugun erabakitzeko aukera, bai eta Besaldi axola zaien pertsonekin eta eragileekin batera erakunde bat osatzen duten eta sendotasuna ematen dioten jakintza, kontzeptu, errutina, irudi, azpiegitura, dokumentu, teknologia, datu, harreman, xede, emozio, balio, arau, prozedura eta ohituren multzo hori aitortu eta mugatzeko aukera ere (ikus;Besaldi eredurantz»).

Eta hori egiteko, adimen artifizialen erronkari aurrez aurre begiratu eta, gure gaitasun eta aukeren neurrian, seriotasunez heldu behar diogu. Gurekin bat egingo duzu?