Apirilaren 3an, goizeko 10:30ean, Euskadi Lagunkoia sareak online saio bat antolatu zuen, bakardadeei aurre egiteko sortutako baliabide praktikoak eta erabilgarriak ezagutarazteko. Bertan, sareko 27 udalerritako lagunek parte hartu zuten, ingurune lagunkoiago eta sentikorragoak eraikitzeko konpromisoa berretsiz.
Bakardadearen inguruko hausnarketa partekatu batekin hasi zen saioa
Lehenik eta behin, bakardadeen errealitateari buruzko hurbilketa orokorra egin zen, eta Euskadin duen eragina azaltzeko datu esanguratsu batzuk partekatu ziren. Testuinguru horretan, lau fase nagusi aurkeztu ziren errealitate hori modu integral batean lantzeko: sentsibilizazioa, identifikazioa, prebentzioa eta esku-hartzea. Etapa horiek udalerriek ikuspegi estrategiko eta eraginkor batetik lan egiteko oinarriak eskaintzen dituzte.
Baliabide praktikoen aurkezpena
Bigarren zatian, sareak sortutako bi baliabide praktiko aurkeztu ziren, tokiko ekimenak sustatzeko helburuarekin:
-
“Bakardadeari aurre egiteko gakoak eta tresnak” online ikastaroa
-
“Bakardadeak: Tresna-kita”
Bi tresnak urratsez urrats azaldu ziren, haien erabilera praktikoa, egokitzeko aukerak eta udal testuinguru desberdinetan nola txertatu daitezkeen nabarmenduz. Era berean, zalantza teknikoak argitu ziren, baliabide horien aprobetxamendu hobea sustatzeko.
Udal inklusiboago eta lagunkoiago baterako urrats berria
Topaketa honek Euskadi Lagunkoia sarea indartzen du elkarlaneko, prestakuntzako eta ekintza partekaturako gune gisa. Saioan argi geratu zen tokiko estrategiak garatzen jarraitu behar dela, udalerriei baliabide erabilgarriak eskainiz, eragin handiagoarekin eta sentikortasun handiagoz jardun ahal izan dezaten.
Grabazioa ikusgai
Saio osoaren bideoa Euskadi Lagunkoia-ren YouTube kanalean eta webgunean dago ikusgai, interesa duen edonork ikusi eta partekatu ahal izateko.