- Berdintasun, Justizia eta Gizarte Politiketako sailburuak aitortu du kalean bizi diren emakumeen ehunekoak "gorakada txikia" izan duela Legebiltzarreko Kontrolerako Osoko Bilkuran
- Nabarmendu du, halaber, Gizarte Zerbitzuen Euskal Zerbitzuak areagotu egin duela bazterkeria-egoeran edo -arriskuan dauden pertsonentzako arreta eta estaldura
Nerea Melgosa Berdintasun, Justizia eta Gizarte Politiketako sailburuak Eusko Legebiltzarreko Kontrol Osoko Bilkuran azaldu duenez, “gorakada txiki bat izan da kalean bizi diren emakumeen ehunekoan”, eta kalean bizi diren hamar pertsonatik bat emakumea dela adierazi du. Melgosak hori esan du Isabel Gonzalez Elkarrekin Podemos-IUko ordezkariari emandako erantzunean, Eusko Jaurlaritzak etxerik gabeko emakumeen arretan dituen “politikak, estrategiak eta baliabideak” zalantzan jarri baititu.
Melgosa sailburuak bere hitzaldian adierazi duenez, etxerik gabeko emakumeen presentzia nabarmenagoa da hiru hiriburuetan, baita gizarte-arretako beste baliabide batzuetan ere, hala nola aterpetxeetan edo gaueko harrera-zentroetan. Era berean, bizitegi-bazterketako egoeran dauden emakumeengan “arreta berezia” jartzeko beharra aitortu du. Ildo horretan, erakunde guztien inplikazioa azaldu du, baita “lankidetzan aritzen garen hirugarren sektoreko erakundeena ere”.
Melgosak inbertsioei buruzko datu batzuk eman ditu, eta nabarmendu du “bazterketa-egoeran edo bazterketa-arriskuan dauden pertsonen estaldura nabarmen handitu dela Gizarte Zerbitzuen Euskal Sisteman; %30 hazi da egoitza-zentroetan, %22 harrera-zentroetan eta %122 lehen mailako arretako etxebizitzetan.
“Euskadik Estatuko estaldura-tasarik altuena du etxerik gabeko pertsonei dagokienez: 1,4 pertsona artatu ditu 1.000 biztanleko, eta 30 euro baino gehiagoko inbertsioa egin du biztanleko gastu publikoan; Estatuak, berriz, 7 euro inbertitu ditu”, azaldu du.
Azkenik, Berdintasun, Justizia eta Gizarte Politiketako sailburuak Egoitza-Bazterkeria Larriko Egoerak Prebenitu eta Murrizteko II. Euskal Estrategia aipatu du. “Prestatuta daukagu”, esan du Ganberan, eta azaldu du emakumeentzako arreta jasota dagoela lehen estrategiaren ebaluaziotik ateratako ondorio eta gomendioetan.
“Amaitzeko, azpimarratu nahi dut bazterkeriaren eremuan emakumeei arreta ematea lehentasunezkoa dela euskal erakundeentzat, eskaini dizkizudan eta Estrategia berrian jasotzen diren datuetan egiaztatu ahal izan duzun bezala eta zure itxaropenak betetzea espero dut”, ondorioztatu du sailburuak.