Eusko Jaurlaritzako Ekonomia eta Ogasun Sailak webinar ikastaro bat eman du, EUDELekin batera antolatua, Next Generation EU-tik datozen europar funtsak kudeatzen dituzten erakunde guztientzat eskatzen den iruzurraren aurkako Neurrien Planari buruz. Laurogei pertsonek baino gehiagok (arduradunak eta udaleko langileak) parte hartu dute modu telematikoan EUDELen egoitzatik deitutako saioan.

Ikastaroko hizlari nagusi gisa, Iñaki Barredok, Europako Ekonomia eta Funtsetako sailburuordeak, zehatz-mehatz deskribatu du Eusko Jaurlaritzak onartutako Iruzurraren aurkako Planaren edukia. Barredok udal-arduradunei jakinarazi die zer neurri eta alderdi hartu behar diren kontuan beren tokiko planak egiteko garaian, Suspertze eta Erresilientzia Mekanismoaren Europako eta Estatuko arauetara egokitzeko.

EUDELek eskertu egin du Eusko Jaurlaritzak udalei informazioa eta orientazioa emateko ematen duen zerbitzua, ahalik eta deialdi europar gehienetara iritsi ahal izan daitezen, eta, aldi berean, Next Generation EU funtsak jasotzetik eratorritako baldintza zorrotzak betetzeko gidak eta ereduak eman diezazkieten, izapideak arintze aldera.

Orain arte, euskal udalerriek 90 milioi euro jaso dituzte guztira, ehun udal baino gehiagorentzat. EUDELeko presidente Gorka Urtaranek adierazi duenez, aurreikusten da zenbateko hori datozen hilabeteetan handitzea, abian diren deialdiak ebatzi edo laguntza-programa berriak bultzatu ahala.

Ikastaroaren hitzaldian erabilitako aurkezpena eskuragarri dago Eusko Jaurlaritzaren Kohesio Politikaren eta Europako Funtsen Zuzendaritzaren webgunean, eta, zehatzago,  "prestakuntza-pilulen" atal berrian.