Ekonomia eta Ogasun Saila

Euskadik 7,2 milioi euro jasoko ditu Next Generation funtsetatik, tokiko merkataritzari laguntzeko

Aurreko edizioan Euskadik 5,8 milioi jaso zituen, hau da, 2022rako % 24ko igoera

Euskadin garatuko diren proiektuak Erresilientzia Planaren barruan kokatzen dira, eta ebaluazio-batzordearen ondoren onartu dira, behin-behineko ebazpenean, alegazioak aurkezteko epearen zain; beraz, baliteke oraindik proiekturen bat sartzea. Behin-behineko ebazpen hori gaur jakinarazi zaie tokiko erakunde onuradunei; Euskadiren kasuan, 7 proiektu dira, eta 7,2 milioi euro jasoko dituzte. EAEko proiektuek erkidego guztietako udalen 599 proiekturi egin behar izan diete aurre norgehiagoka bidez, eta Ministerioak 2022ko deialdi horietan mobilizatutako ia 105 milioien % 6,92 lortu dute, lortutako balorazio ona nabarmenduta.

Eusko Jaurlaritzako Turismo, Merkataritza eta Kontsumo Saila lankidetzan aritu da Espainiako Gobernuko Merkataritza Ministerioarekin funts horiek kudeatzen eta koordinatzen, deialdiaren zirriborroei ekarpenak eginez, autonomia-erkidegoetako zuzendarien mahaietan aktiboki parte hartuz eta Ebaluazio Batzordean euskal proiektuak defendatuz. Eusko Jaurlaritzako Merkataritza Zuzendaritzak, halaber, informazioa eman die euskal udal guztiei, eta laguntza eman die proiektuak prestatzeko, eskatu zaienean.

Onartutako jarduerak hiru ildotan banatuta daude, Turismo Sektorearen Lehiakortasun eta Modernizazio Planaren (14. osagaia) eta ETEak Bultzatzeko Planaren (13. osagaia) barruan.

Merkatuetarako eta hiriguneetarako laguntzen atalean, Euskadin 5 proiektu onuradun identifikatu dira, 5,7 milioi euroko zenbatekoarekin, Abanto-Zierbenako, Azpeitiko, Ordiziako, Azkoitiko eta Laudioko udalentzat. Ildo horren bidez, eduki teknologiko, berritzaile eta jasangarriko plan eta proiektuak finantzatu nahi dira, bai eta ekipamenduak hobetzekoak ere, bere barrutian dagoen merkataritza-sektoreari zuzenduta.

Joan-etorri turistikoko merkataritza-guneetarako laguntzen lerroan proiektu onuradun bat dago, Donostiako Udalak aurkeztua 1,1 milioi euroren truke, merkataritza-hiri ireki, erakargarri eta jasangarri baten inguruko San Sebastian Open Dendak proiektuarekin. Laguntzen segmentu hori turismo-eremuetan kokatutako merkataritza-proiektuei laguntzera eta turisten erosketa-esperientzia hobetzera bideratzen da espezifikoki.

Landa-merkatu jasangarrietarako laguntzetan proiektu onuradun bat dago, 400.000 eurokoa, eta Arabako Foru Aldundiak aurkeztu du. Arabako landa-merkataritza bultzatzeko planarekin puntuaziorik onena lortu du hiru lerroetan aurkeztutako proiektu guztietan. Laguntzen atal hau landa-eremuetan merkataritza-jarduera ezartzen, modernizatzen eta sustatzen laguntzera bideratuta dago, landa-ekonomiaren lehiakortasuna, iraunkortasuna eta dibertsifikazioa hobetuz.