Kultura eta Hizkuntza Politika Saila

Estatuko hizkuntza-politikako arduradunek hizkuntza koofizialak sustatzeko estrategia komun bat adostu dute

Argitalpen-data: 

Irekia.jpeg
  • Euskadi, Galizia, Katalunia, Balear Uharteak, Nafarroa eta Valentziako Generalitateko ordezkariek urteko ohiko bilera egin dute gaur, baterako ekintzen jarraipena egin eta koordinatzeko.
  • Sei ordezkariek Espainiako Gobernuari gaztelaniaz besteko hizkuntza ofizialak sustatzeko ekintzen presentzia eta zehaztasun handiagoa izatea eskatu diete gorpuzten ari diren Hizkuntzaren Ekonomia Berriaren PERTEan.

Galizia, Euskadi, Katalunia, Balear Uharteak, Nafarroa eta Valentziako Generalitateak parte hartzen duten hizkuntza-politikaren arloko lankidetza-protokoloaren Jarraipen Batzordeak urteko ohiko bilera egin du gaur Santiagoko Pazo de San Roquen. Bertan, beren komunitateetako hizkuntza-politiketarako interesgarriak diren hainbat gai jorratu dituzte, bai eta beren hizkuntzak sustatzeko ekintza bateratuak ere.
Bileran izan dira Miren Dobaran, Eusko Jaurlaritzako Hizkuntza Politikarako sailburuordea; Valentín García, Galiziako Xuntako Hizkuntza Politikarako idazkari nagusia; Francesc Xavier Vila, Kataluniako Generalitateko Hizkuntza Politikarako idazkaria; Beatriu Defior, Balear Uharteetako Gobernuko Hizkuntza Politikarako zuzendari nagusia; Mikel Arregi, Euskarabidea/Euskararen Nafarroako Institutuko zuzendari-kudeatzailea, eta Marc Jiménez, Hizkuntza Politika eta Valentziako Kudeaketako zuzendariorde nagusia.

Eusko Jaurlaritzako Hizkuntza Politikarako sailburuorde Miren Dobaranek azpimarratu du bileraren ostean Protokolotik abian jarriko diren ekintza nagusiak bikoizketa eta azpitituluak direla, “batez ere hizkuntza ofizial horietako haurrei zuzendutako ikus-entzunezko produktuetan (Clan telebista katea edo Playz eduki digitalen plataforma) onartu berri den ikus-entzunezko legeak ezartzen duen bezala”. Halaber, finantza-erakundeei lotutako eremu sozioekonomikoan hizkuntzen sustapena azpimarratu zuen (contactless txartelen erabilera, ordainpeko plataforma birtualak, Redsys, etab.).

Manuel González Bediarekin, Espainiako Gobernuaren Hizkuntzaren Ekonomia Berriaren aldeko Aliantzarako Ordezkari Bereziaren Bulegoko zuzendariarekin izandako bileran, Hizkuntzaren Ekonomia Berria Berreskuratzeko eta Eraldatzeko Proiektu Estrategikoari (PERTE) dela eta, gobernuko sei ordezkariek hizkuntza ofizial horiek sustatzeko ekintzen presentzia eta zehaztasun handiagoa behar dela azpimarratu zuten. Ildo horretan, Protokoloaren taldeak Espainiako Gobernuari azpimarratu dio garrantzitsua dela baliabide horiek bizkortzea, eskura jartzea eta optimizatzea Espainiako Estatuko errealitate eleanitza ikusarazteko eta sustatzeko.

Eusko Jaurlaritzak, Galiziako Xuntak eta Kataluniako Generalitateak 2007an sinatu zuten hizkuntza politikaren arloko lankidetzarako protokolo orokorra. Ondoren, Balear Uharteetako Gobernuak eta, 2017an, Nafarroako Gobernuak eta Valentziako Generalitateak bat egin zuten protokolo horrekin. Hizkuntza propioa duten eta ofizialtasun-estatusa duten autonomia-erkidego guztien lehen lankidetza-esparrua da, kasuan kasuko autonomia-estatutuetan ezarritakoaren arabera.