Segurtasun Sailak alerta laranja aktibatu du bihar, ostirala, irailak 25, itsasaldeko arriskuagatik nabigaziorako (lehenengo bi milietan) 06:00etatik 21:00etara bitartean, eta abisu horiak ezarri ditu kostaldeko inpaktuagatik, prezipitazio handiagatik, prezipitazio iraunkorragatik eta haizeagatik kostaldean.
Euskalmet Euskal Meteorologia Agentziaren arabera, ipar-mendebaldeko haizeak eta aire hotzak udazkeneko lehen denboralea eragingo dute. Hala, tenperaturaren jaitsiera nabarmena izango da, udako tenperaturatik udazkeneko balioetara igaroko baita, eta maximoak 12-16 ºC artekoak izango dira.
Aipatutako alerta laranjaz gain, bihar, 06:00etatik 21:00etara bitartean, abisu horian egongo da EAE kostaldeko inpaktuagatik, olatuen altuera adierazgarria 5-6 metro ingurukoa izango delarik.
Era berean, Segurtasun Sailak abisu horiak aktibatu ditu kantauri isurialdean, bereziki Gipuzkoako ekialdean, prezipitazio handiagatik (00:00etatik 18:00etara, ordubetean 15 l/m² pilatu daitezke) eta prezipitazio iraunkorragatik (00:00etatik 24:00etara, 24 orduan 50-60 l/m² pilatu daitezke). Bi kasuetan, zaparrada ertainak eta trumoitsuak botako ditu, eta leku batzuetan handiak izan litezke.
Haizeari dagokionez, abisu horia 00:00etatik 21:00etara aktibatuko da kostaldean. Ipar-mendebaldeko haize-boladek 100 km/h-ko abiadura gainditu dezakete kostaldean, eta EAEko gainerako haizeguneetan, berriz, 90-100 km/h-koa. Haizeguneak ez diren lekuetan, boladak 60-80 km/h-koak izan daitezke.
Larrialdietan, deitu 112 zenbakira.
Gomendatzen da pronostikoen eta abisuen eguneratzeak Euskalmet (www.euskalmet.euskadi.eus) eta Twitter (@Euskalmet) bidez jarraitzea edo "abisuak nahieran" zerbitzuan alta emanda.
