Aurkeztu da Getariako Txakolinaren uzta berria, 3.100.00 botila merkaturatuta
2020.eko urtarrilak 17
Gaur goizean “Txakolin Eguna” egin da Getarian, uzta berria aurkezteko, eta bertan parte hartu dute Nekazaritza, Arrantza eta Elikagaien Politikako sailburuorde Bittor Orozek eta Elikagaien Kalitate eta Industrietako zuzendari Peli Manterolak.
Uzta berria aurkezteko ez ezik, gastronomiaren, euskal kulturaren eta txakolinaren alde lan egin duten pertsonak edo erakundeak omentzeko ere balio du ekitaldiak. Aurten, Ander Gonzalez sukaldariak eta Gabriela Uriarte dietista-nutrizionistak eskuratuko dute “Mahasti Jaun” saria. ETBko “A bocados” programaren aurkezleak dira, eta pantailan egiten duten tandem bikainagatik eta bertako produktuarekin egindako sukaldaritza osasuntsuaren alde egiteagatik jasoko dute saria.
Getariako Txakolina J.I.-ak emandako datuen arabera, 2019ko uzta ia 2018koaren parekoa izan da, izan ere, 3.400.000 kilo mahats bildu dira eta horiekin ia 3.100.000 botila aterako dira merkatura.
Salmentei dagokienez, 2019an gehiago saldu da, 2018an baino %4,5 gehiago. Gipuzkoak eta Euskadiren gainerakoak jarraitzen dute merkatu nagusia izaten, %80arekin, eta ondoren Madril eta Bartzelona, %10arekin. Atzerriko merkatuetara ere %10 saltzen da. Merkatu horietatik azpimarragarriak dira AEB guztira esportatutakoaren %65arekin, Frantzia %10arekin, Erresuma Batua %5arekin eta Japonia %5arekin. Gainerako %15a nazioarteko beste merkatu batzuetara saltzen da, eta herrialde nordikoetarako esportazioa handitu da.
Orozek azpimarratu du “txakolina kalitateko produktu bereizi gisa, gourmet produktu gisa, posizionatzen ari dela, eta horren erakusgarria dela produktuak Europako azoketan eta Caprice proiektuaren baitan AEBetan eta Japonian egin diren promozio misioetan eduki duen harrera ona”.
