Azkuna Zentroak, Bilboko Udalako Gizarte eta Kultura Zentroak, 2020-2021 erakusketa-denboraldia irekiko du gaur, Mabi Revuelta (Bilbo, 1967) artistaren ‘Acromática, una partida inmortal’ erakusketaren inaugurazioarekin. Erakusketaren komisarioa Susana Blas da, arte garaikideko komisarioa eta historialaria.

Erakusketak, urtarrilaren 24ra arte zabalik egongo dena, Mabi Revueltaren ibilbide artistikoa berrikusten du eta, aldi berean, Acromáticak aurkezten du, erakusketari titulua ematen dion proiektu berria.

Proiektua prentsaurrekoan aurkeztu da gaur goizean. Bertan parte hartu dute Fernando Pérezek, Azkuna Zentroko zuzendariak; Mabi Revueltak, artistak; Susana Blasek, komisarioak; eta Koldo Bilbaok, bbk-ko kultur jardueren arduradunak, erakusketaren erakunde laguntzailea.

XAKETIK ABIATUTA

Xakea hari eroale gisa hartuta, ibilbidea lehen espazioan (Apertura, Irekiera) hasten da, eta bertan kokatzen da Naturaleza muerta con perlas negras, erakusketaren tonu poetikoa markatzen duena.

Bigarren espazioan (Medio juego, Joko erdia), Acromática proiektua osatzen duten hainbat lan zabaltzen dira. Proiektu hau historiako xake-partidarik artistikoenetako batean oinarrituta dago: 1851n Adolf Anderssen eta Lionel Kieseritzkyren artean jokatutako ‘Hilezkorra’.

Azkenik, azken espazioan (Fin de partida, Partida amaiera), Línea de tiempo (Denbora-lerroa) dago: artistaren ibilbidearen laburpena, xakearen lau aroetan oinarritua: erromantikoa, zientifikoa, hiper-modernoa eta dinamikoa.

ACROMÁTICA

Mabi Revueltaren hitzetan, «Acromática piezen seriean, behin eta berriz itzultzen naiz jokoen unibertsora, oraingoan xakea eta haren arauen eta mugimenduen multzo berezia inspiraziotzat hartuta. Bi koloreko eremu txiki batean, munduaren ordenaren eta izaki eta gauzen patuaren hedapena ikusten dugu, izugarria eta larria. Eskulturaren, zinemaren, dantza garaikidearen, musikaren eta idazketaren bidez, jokoen erregearen kontakizuna egiten saiatzen naiz, haren mugetatik hara joz, metafora artistiko, intelektual, beliko eta bitalen bidez artikulatua».

Susana Blas komisarioak deskribatzen duen moduan, «alderdi antologikoak artistaren ibilbidea berrikusten du, eta lau kategoriatan antolatzen du bere lana, xakearen historiako aroak definitzen dituztenak eta, aldi berean, diziplina unibertsal horri aurre egiteko eta jokatzeko lau aro direnak.»

Mabi Revueltaren obrek gogoeta egiten dute bere lanean hasieratik agertzen diren gai unibertsalei buruz: errealitate-fikzio harremanak, generoen iragazkortasuna (literatura, arte eszenikoak, eskultura, marrazketa, ikus-entzunezko arteak), hezkuntza artistikoari buruzko ikerketa eta estrategia didaktikoen bilaketa ekintza artistikoa gizarte-aldaketaren eragile gisa baloratzeko.

Acromática. Una partida inmortal Azkuna Zentroa–Alhóndiga Bilbaok eta Tabacalera Promoción del Artek (Madril) koproduzitutako proiektua da, eta bbk Fundazioaren laguntza du.

Acromática. Una partida inmortal

2020ko urriaren 14tik 2021eko urtarrilaren 24ra
Erakusketa Aretoan
Asteartetik igandera, 11:00etatik 20:00etara, astelehenetan itxita
Sarrera dohainik
Bisita gidatuak (45’):
Ostegunero: 18:00 Sarrera dohainik aurrez izena emanda: Az Info / 944 014 014 Gutxienez: 4 pertsona Gehienez: 10 pertsona