Elurra kentzeko makinak, garabiak eta laguntzako eta zaintzako ibilgailuak, guztira 300 bat baliabide mugikor, izango dira aurtengo neguan Euskadiko errepide-sareko zirkulazioa bermatzeko.
(Txurdinaga, 19/11/07)
Eusko Jaurlaritzako Segurtasun Saileko Trafikoko zuzendari Sonia Díaz de Corcuerak gaur goizean aurkeztu du 2019-20ko Neguko Bidezaintza Plana (NBP) Euskadiko Trafikoa Kudeatzeko Zentroan egindako bileran. Bertan izan dira Ertzaintzaren, foru-aldundien, autobideen, Larrialdiei Aurre Egiteko eta Meteorologiako Zerbitzuaren eta Gobernu zentralaren ordezkariak.
Aurreko Neguko Bidezaintza Planean bezala, 2019-20ko NBP partzialki aktibatu ahal izango da, elur-mailaren eta prezipitazio-kopuruaren arabera. Eusko Jaurlaritzako Trafikoko zuzendari Sonia Díaz de Corcueraren esanetan, “NBPren jarraipen eta informazio fasea elur-maila 1.000 metroan kokatzen denean aktibatuko da, eta fase operatiboa, berriz, elur-maila 700 metrora iristen denean eta prezipitazio-kopuruak horrela egitea aholkatzen duenean. Garrantzitsuena da prezipitazioak trafikoan duen eragina aztertzea eta, ondorioz, neurririk egokienak hartzea egoera meteorologiko txarretan bide-segurtasuna bermatzeko”.
Trafiko Zuzendaritzaren NBP iragarpen meteorologikoen eta meteorologiak Euskadiko errepideetan duen eraginaren arabera baliabideak mugitzen dituzten erakundeak eta autobideen emakidadunak koordinatzeko plan bat da.
2019-20ko neguan, elurra kentzeko foru aldundien eta autobideen 190 makina, tona askotako ibilgailuak erretiratzeko puntu estrategikoetan kokatuko diren Euskadiko Trafikoa Kudeatzeko Zentroaren 7 garabi astun eta beste 130 ibilgailu izango dira koordinazio eta zaintza lanetarako. Horiei Ertzaintzaren lurraldeko trafiko-unitateetako patruilak batu behar zaizkie, eta patruila-kopurua ertzain-etxeetako baliabideekin sendotu eta osatu ahal izango da.
NBP 8 aldiz aktibatu zen aurreko neguan
2018-19ko neguan planaren azken urteetako aktibazio-kopuru txikiena erregistratu zen. Jarraipen eta informazio fasea 8 aldiz aktibatu behar izan zen (aktibazioak 2017-18ko neguan baino 9 gutxiago izan ziren). Fase operatiboa, berriz, 2 aldiz aktibatu behar izan zen 2018-19ko neguan, eta aktibazioak, beraz, aurreko ekitaldikoak baino 8 gutxiago izan ziren. 2016-17an ere 8 aktibazio erregistratu ziren, eta horietako 6tan fase operatiboa aktibatu behar izan zen.
NBPren aktibazioak | 2018-19 | 2017-18 | 2016-17 | 2015-16 | 2014-15 |
Jarraipen-fasea | 8 | 17 | 8 | 11 | 12 |
Fase operatiboa | 2 | 10 | 6 | 8 | 9 |
Laburbilduta, 2018-19 negualdia “arina” izan zen Euskadiko errepide-sarean elurrak edo izotzak zirkulazioan izandako eraginaren ikuspegitik. Alde horretatik, eta datu bat ematearren, azpimarra daiteke 2017/18ko kanpainan Neguko Bidezaintza Planaren Koordinazio Organoa bost aldiz elkartu zela krisi-mahaian, eta 2018/19 kanpainan, aldiz, behin bakarrik elkartu zen.
Aholku praktikoak
Eguraldi txarrarekin kontu handiz eta zuhurrago ibili behar da errepidean. Abiadura moteldu behar da eta tarte handiagoa utzi behar da aurrean doazen ibilgailuekin, zoru bustian distantzia handiagoa behar baita ibilgailua gelditzeko.
Pneumatikoek egoera onean egon behar dute, pneumatiko higatuek ez baitute ura behar bezala husten eta istripua eragin dezakete. Neguko pneumatikoak jartzea gomendatzen da, trakzio, frenatze-ahalmen eta kontrol hobea eskaintzen baitute zoruan ura, izotz zuria, izotza eta elurra dagoenean. Neguko pneumatikoak jartzen ez badira, bidean elurra dagoenean behar-beharrezkoa da ibilgailuan kateak eramatea eta jartzen jakitea zirkulatu ahal izateko.
Hotz handia egiten duen egunetan kontuz izotzarekin, ABS edo lau gurpileko trakzioa bezalako sistema modernoek ere ez gaituzte libratzen irristatzeko arriskutik. Ezinbestekoa da, beraz, astiroago eta zuhurrago gidatzea.
Beira-garbigailuak dira zaindu beharreko beste elementuetako bat: baldintza onetan eduki behar dira beti, euria edo elurra ari duenean errepidea ongi ikusi ahal izateko.
Era berean, funtsezkoa da bat-batean ez frenatzea eta abiadura handian ez zirkulatzea. Leunki eta pixkanaka frenatzen ahalegindu behar da, gurpilak blokea ez daitezen eta ibilgailuaren kontrola gal ez dezagun. Horrelakoetan, frenoko pedala askatu beharko da trakzioa berreskuratzeko, eta motor-frenoa erabili frenoko pedalarekin txandakatuta.
Azkenik, elurrarekin abiatzean garrantzizkoa da pixkana azeleratzea. Gurpilek irrist egiten badute, martxa handiagoa sartu beharko dugu gurpilei indar txikiagoa aplikatzeko.
