Zamudio, Olaberria eta Zierbena dira biztanleko BPG altuena izan duten Euskal AEko udalerriak

2011.eko apirilak 19

Eskualdeka, aldiz, Arabako Errioxa, Gorbeialdea eta Arabako Ibarrak dira biztanleko BPG altuena izan dutenak

 

EUSTATek argitaratutako datuen arabera, Bizkaiko Lurralde Historikoan dagoen Zamudio udalerriak izan du Euskal AE biztanleko Barne Produktu Gordin altuena: Euskal AEko 100 erreferentzia-balioarekin alderatuta 975eko indizea izan du. Haren atzetik daude, bigarren eta hirugarren postuan hurrenez hurren, Olaberria (906) eta Zierbena (876) udalerriak; lehena Gipuzkoan dago eta bigarrena Bizkaian.

 

Araban Legutio (573) udalerriak izan du biztanleko BPG altuena, autonomia erkidegoko udalerri guztien artean laugarren postua lortuz.

 BPG sektoreen arabera honela banatu da: Zamudion zerbitzuen sektoreak (% 49,2) izan du BPG altuena eta gero industri sektoreak (% 47,1); bi sektore hauek Teknologi Parkeko enpresa-jarduerei lotuta daude. Biztanleko BPG altuena izan duten hiru udalerrietan ematen da ezaugarri bera: lehen sektoreak garrantzi eskasa duela. Zamudio udalerrian eman den egituraz bestelakoak dira Olaberria eta Zierbena udalerrienak; hauetan industri sektorea garrantzitsua da (% 85 ingurukoa) baina zerbitzuen sektorea % 15,6 izan da Olaberrian eta % 9,1 Zierbenan.

 

 

Eskualdeka, Arabako Lurralde Historikoan daude biztanleko BPG altuenak izan dituzten hiru eskualdeak. Horietako lehen eskualdea Arabako Errioxa izan da, 188 indizearekin; eskualde honetan ardogintzaren industriak portaera ona izan du eta biztanle dentsitatea txikia da. Laguardia (352) eta Eskuernaga (231) udalerriak dira eskualde horretako emaitza onenak izan dituzten udalerriak.

 

Gorbeialdea (181) eta Arabako Ibarrak (162) izan dira bigarren eta hirugarren postuetan dauden eskualdeak. Laugarren eta bosgarren postuetan, hurrenez hurren, Gipuzkoako Deba Garaia (132) eta Bizkaiko Durangaldea (122) eskualdeak izan dira.

 

Dena den azpimarratu behar da eskualde horietan guztietan industri sektorearen balio erantsi osoak portzentaje altua izan duela, % 55 ingurukoa, eta Euskal AEkoa % 27,9 izan dela. Bestalde, zerbitzuen sektoreak garrantzi eskasagoa izan du: % 35 ingurukoa eta Euskal AEn % 62,2.

 

1996 eta 2008 urteen artean biztanleko BPGk izan duen bilakaerari dagokionez, Zierbena (Bizkaia) eta Arama (Gipuzkoa) udalerrietan hazi da gehien biztanleko BPG; batez beste urtean% 32,1 eta % 22,2ko hazkunde pilatuak izan dituzte hurrenez hurren.

 

Baina hurrengo udalerrietan ere aipatzeko moduko hazkundeak izan dira: Bizkaian Derion(% 14,6), Araban Bernedon (% 14,2) eta Gipuzkoan Olaberrian (% 14,2).

 

 

Produktibitatearen ikuspegitik, eta Euskal AEko landun bakoitzeko BPG hartuta neurri gisa (hau da, biztanleak zenbatu beharrean udalerri bakoitzeko landun kopurua kontuan hartuta) udalerri hauek nabarmendu behar dira: lehenengoa Bizkaiko Zierbena (581), bigarrena Gipuzkoako Olaberria (251), hirugarrena Arabako Zanbrana (245) eta laugarrena Bizkaiko Fruiz (210).

 

 

 

Lurraldeak eta eskualdeak aztertuta, Goierri (Gipuzkoa) eta Kantauri Arabarra dira landun bakoitzeko BPG altuena izan duten eskualdeak, 119 indizearekin; eta Arabako Errioxa hirugarren postuan geratu da 116 indizearekin. Bizkaiko Lurralde Historikoan Durangaldeak izan du landun bakoitzeko BPG altuena: 107 indizea.

 

Eta hiru hiriburuak aztertzean hurrengo datuak atera dira: Bilbon eta Donostian BPGaren % 85etik gora zerbitzuen sektoreak sortu du; baina Gasteizen portzentaje hori % 64 ingurukoa izan da. Ildo horretan, industri sektoreak ekarpen handiagoa egin du Gasteizen (% 26,7) Bilbon (% 6,5) eta Donostian (% 6,8) baino.