Azkoitia Lagunkoiak, Aizkibel Liburutegiarekin lankidetzan, zerbitzu berri bat jarri du martxan, liburutegiko aleak adinekoen edo mugikortasun edo osasun arazoak dituzten pertsonen etxeetara eramateko.
«Lagunkoiatik beharrezko zerbitzua dela ikusten dugu, pertsona batzuek etxetik irteteko zailtasunak dituztelako, edo, besterik gabe, ezin direlako irten. Irakurketa lagun ona da, eta pertsona horiei guztiei lagundu nahi diegu beren denboraz goza dezaten, arreta galaraziko dien eta beren egoera eramangarriago egingo dien irakurketa-tarte batekin», adierazi dute.
Boluntariotza bultzatuz
Zerbitzu berri hau eskaini ahal izateko, «udalerri adiskidetsu, integratzaile eta irisgarri baten alde» lan egiten duen Azkoitia Lagunkoiak boluntario talde bat bildu du, besteak beste ekimenaren sustatzaileak eta Azkoitia Lagunkoiako kideak. Liburutegira joan eta interesatuak aurrez telefonoz eskatutako alea jaso eta dagokion helbidean entregatuko du. Itzultzeko epea amaitu baino lehen, boluntarioak lana alderantziz egingo du, hau da, irakurlearen etxera joan, liburua jaso eta liburutegira itzuliko du. Guztiz doakoa da zerbitzua.
Kontaktua
Interesatuak, besterik gabe, 943.850898 telefonora deitu beharko du liburutegira edo liburutegia@azkoitia.eus helbidera mezu elektroniko bat bidali eta etxez etxeko mailegu-zerbitzua eskatu, alea eskatu eta entrega-datuak eman. Eskaera egiten denetik aurrera, liburutegia bera arduratuko da boluntarioen sarearekin harremanetan jartzeaz, entrega eta itzulketa egiteko.
