Informazioaren gizartea sustatu, Euskadi ezagutzaren gizarte izan dadin, kohesiodun gizartea izan dadin, hazkunde iraunkorraren aldekoa, eta banakako zein taldeko bizi-kalitatea hobetzeko erabakiak hartzen parte hartzen duena.

Informazioaren gizartea industriaren gizartearen garapena da, eta, informazioaren gizartean, ekonomiaren gakoak poliki-poliki aldatzen dira industria-prozesuen kontrol eta optimizaziotik informazioa prozesatzera eta erabiltzera. Faktore bereizgarri bat sartzen da: pertsona bakoitzak, bere jakintza pilatzeaz gain, ia gaitasun mugagabea dauka besteek sortutako informazioa eskuratzeko; gainera, besteentzako informazio-iturri bihurtzeko aukera asko ditu. Prozesu hori abian da mundu guztian, baita Euskadin ere; informazioaren eta komunikazioaren teknologien (IKT) bateratzea du euskarri, eta pertsonek eta erakundeek (enpresek, administrazioek eta abarrek), teknologia horien erabilera intentsiboa eginez, gizarte aberatsagoa eta kohesionatuagoa osatzen dute.

Euskadik iragan eta orainaldi arrakastatsuak ditu industria gaietan, eta, ondorioz, Euskadiko errenten maila munduko ekonomia aberatsen parekoa da. Posizio horri eusteko, ezinbestekoa da ekonomia globalaren bilakaerari egokitzea; eta, horretarako, honako zeregin hau gauzatu behar du: IKTen trenean igo eta informazioaren benetako gizartea eraiki. Izan ere, gizarte mota hori motor ekonomikoa da, eta ematen dituen aukerak baliatu behar dira; gainera, gizarte-justizia gehiago lortzeko tresna da.

Informazioaren gizartea errealitate bat da Euskadin, haren bi dimentsio nagusiei erreparatzen badiegu: ekipazio maila eta IKTen erabilera-maila pertsonen zein erakundeen aldetik. Bistakoa da ordenagailuak ohiko gailu bihurtu direla, baita Interneteko banda zabala, telefonia mugikorra, gizarte-sareak eta gainerakoak ere. Maila guztietan orokortzea lortzeaz gain (ebaki digitala apurtzea), oraingo helburu nagusia da agertzen diren aukerei ahal den etekin ekonomikorik handiena ateratzea.

Egun industria-gizartetik informazioaren gizartera migratzen ari gara, eta Euskadik atzean ez geratzeaz gain, onenen artean egoteko ahalegina egin behar du.

• Euskadi Informazio Gizartean Plana, 2010: Euskadiko Agenda Digitala.
• Euskadi Informazio Gizartean Plana, 2002-2005.

Lehenengo planari esker, informazioaren gizarteko elementuak sartu dira (funtsezko funtzioak), eta hurrengo planak IKTen gizarteratze osoa du helburu: hazkunde iraunkorra, eta, informazioaren gizartea erabiliz, bizi-kalitatea eraikitzen duen gizarte baterantz abiatzea.

IKTak palanka bat dira, berrikuntza euskal gizarte osora hel dadin: herritarrengana, erakundeetara eta administraziora.

Eusko Jaurlaritzako sail guztiak, eta Industria, Berrikuntza, Merkataritza eta Turismo Saila horren guztiaren buru, Informazioaren eta Ezagutzaren Gizartea euskal gizartean sustatzeko eta garatzeko. Hori guztia jasota dago maiatzaren 8ko 4/2009 Dekretuan. Lehendakariak emandako Dekretu horrek Euskal Autonomia Erkidegoaren Administrazioko sailak sortu, ezabatu eta aldatzen ditu, eta  egitekoak eta jardun-arloak finkatzen ditu.

Plana eratzean parte-hartzea eta lankidetzan aritzea, planarekin lotura duten interes-taldeekin: Eusko Jaurlaritzako sailak eta erakundeak; foru-aldundietako eta udaletako informazioaren gizartearen esparruko sailak; enpresa- eta gizarte-erakundeak; lotura duten klusterrak; Zientzia, Teknologia eta Berrikuntzako Euskal Sarea; eta, oro har, informazioaren gizartean interesa duten erakunde publiko eta pribatuak eta gizarte-taldeak.

Idazkaritza tekniko bat sortuko da, planak benetan aurrera egiten duela eta modu homogeneoan aurreratzen dela ziurtatzeko funtzioak bete ditzan. Halaber, jarraipenerako eta ebaluaziorako beharrezko txostenak egingo ditu.

Zehazki, idazkaritza teknikoak honako eginkizun hauek izango ditu:

• Plana kudeatzeko ereduaren aginte-koadroaren jarraipena eta ebaluazioa egitea.
• Informazioaren gizartearen estatistika-adierazleen jarraipena egitea, Euskadin zein erreferentziazko beste esparru batzuetan (estatuan, Europan, herrialde aitzindarietan).
• Jarraipen txostenak egitea, bai barruan erabiltzekoak, bai argitaratzekoak.
• Proiektuak garatuko dituzten arduradunei eta lan-taldeei aholkularitza teknikoa ematea, proiektuek hasierako baldintzak eta helburuak bete ditzaten, eta proiektu guztiak PESI 2010eko zuzentarau orokorrekin bat etor daitezen.
• Zaintza teknologikoko lanak egitea, ezarritako helburuetan eta abian diren proiektuetan eragina izan dezaketen joerak aztertzeko; era berean, helburuak eta proiektuak egokitzeko jarraibideak ematea, joeren ondorioz etorkizunean ezarriko diren egoerak kontuan hartuta.
• Beste erakundeetako agentzia eta erakundeekin gertuko lankidetza eraginkorrari eustea, datuak trukatzeko, eta erabakitzeko zentro nagusiei buruzko lehen eskuko informazioa eskura izateko. Ahal den neurrian, helburua izango da zentro horiek neurriak hartzea.
• Komunikazio-plan bat prestatu, haren jarraipena egin, eta  horretarako behar diren jarduera guztiak gauzatu. Jardun horren bidez, inplikatutako eragileen parte-hartze aktiboa sustatuko da, eta edukiak hedatzeko euskarri-tresnei eutsiko zaie (web-ataria, aldizkariak eta abar).
• Batzorde zuzendariaren eta batzorde teknikoaren saioak proposatzea, antolatzea eta koordinatzea, baita garapen egokia behar duten idazkaritza-funtzioak betetzea ere.