Azken eguneratzea: 2012/09/13
Eusko Jaurlaritzako 67.000 funtzionariok beraien nomina METAPOSTA bidez jaso ahalko dute
Lakuak aurrera egin du postontzi elektroniko eta dokumentu gordailu zerbitzu honen integrazio osoan
- Hezkuntza, Unibertsitate eta Ikerketa, eta Kultura Sailek, Lanbide eta Osakidetzarekin batera, haien dokumentuak komunikazio elektroniko seguru eta legaleko zerbitzu honen bidez bidaliko dituzte.
- Industria Sailak METAPOSTAren bidez kudeatuko laster bere laguntzak, eta IT Txarteleko ziurtagiriak zerbitzu honen bitartez bidaltzen ari dira jada.
- METAPOSTA, Euskal Agenda Digitalaren barneko proiektua da, eta Danimarka moduko beste herrialdeetan arrakastaz dabilen antzeko ekimenetan oinarritzen da.
- Enpresa, Eusko Jaurlaritzak sustatzen du, Merkataritza Ganberak, Tecnalia, Gupost eta Mondragon Inbertsioekin batera.
Eusko Jaurlaritzak, Herrizaingo, Justizia eta Herri Administrazio Sailaren bitartez, eta METAPOSTAk hitzarmen bat sinatu dute langile publikoei haien soldatak eta beste komunikazioak postontzi elektroniko eta dokumentu-gordailu hau erabiliz bidaltzeko asmoz. Akordioa Eusko Jaurlaritzaren Bilboko egoitzan sinatu dute, gaur goizean, Bernabé Unda Indrustria, Berrikuntza, Merkataritza eta Turismo Sailaren sailburuak, METAPOSTAren izenean, eta Idoia Mendia Herrizaingo, Justizia eta Herri Administrazio Sailburuak, Xabier Sabalza METAPOSTAko presidenteordea eta Eusko Jaurlaritzako Informazio Gizartearen zuzendariaren aurrean.
Euskal Administrazio Publikoaren 67.000 langileek haien lan-komunikazioak (bereziki, soldatak) METAPOSTAko postontzi elektronikoan jaso ahal izango dituzte. Gaur egun, zerbitzuak Kutxabank, Euskadiko Kutxa, Iberdrola, Euskaltel edo euskal ur-partzuergoak ditu haien igorleen artean, eta urte honetan zehar, Movistar, Naturgas eta Osakidetza edo Lanbide bezalako erakunde publikoak batuko dira.
Bestalde, Hezkuntza, Unibertsitate eta Ikerketa Saila sistemaren integrazioa prestatzen ari da batxilergoko eta lanbide-heziketako ikasleei kurtso amaieretan espediente akademikoak bidaltzeko. Halaber, Kultura Sailak Kultura Klub ekimenarekin parte hartuko du METAPOSTAren bidezko komunikazioen bidalketetan, eta Lanbide Euskal Enplegu Zerbitzuak bide elektroniko, seguru, konfidentzial eta legal hau erabiliko du langabeekin komunikatzeko.
IT Txartela
Indrustria, Berrikuntza, Merkataritza eta Turismo Sailak SPRIren bitartez integratu da bere barne-komunikazioak eta gizarte edo enpresekin izango dituztenak METAPOSTAren bitartez kudeatzeko eta, era berean, IT Txarteleko ziurtagiriak bidaltzeko. Azken honi dagokionez, aipatu behar da herritarrek haien informatika-ezagutzen ziurtagiri ofizial hauen historikoa haien METAPOSTAko postontzian jaso ahal dutela jada.
METAPOSTA Interneteko postontzi eta dokumentu-gordailuko zerbitzu gisa jaio zen pasa den urteko otsailaren 16an. Geroztik, 30.000 pertsona inguru dira zerbitzu honen erabiltzaile.
Zer da Metaposta?
METAPOSTAk Interneteko dokumentu-gordailu elektronikoa eta postontzia eskaintzen du, hiritarrentzat nahiz enpresentzat balio handikoak diren agiriak espazio elektroniko pertsonal batean era seguruan betiko biltzeko aukera izan dezaten.
Horretaz gain, METAPOSTAk ohiko postontziari dagokion zerbitzua eskainiko du mundu elektronikoan. Hiritarrek postontzi fisikoan jasotzen dituzten dokumentu asko, sistema honen bidez jasoko dituzte orain: fakturak, kontu-laburpenak, egiaztagiriak, polizak, kontratuak, zitazioak, jakinarazpenak, nominak...
Interneten erabiltzeko moduko postontzi eta dokumentu-gordailu elektronikoa izateaz gain, METAPOSTA tresna egokia izan daiteke jaso beharreko agirien sakabanaketa ekiditeko. Ildo honetan, sarbide bakarreko sistematzat antola daiteke, 300 enpresa eta erakunde publiko baino gehiagok igorritako agiri eta ohartarazpenak kudeatzeko. Sistema honen bidez, aldez aurretik hitzartutako entitateen mezuak baino ez dira jasoko; horixe da posta elektronikoaren aldean eskaintzen duen abantaila, eta ondorioz, ez dago spam (zabor-posta) edo igorle ezezagunek bidalitako kate-mezuak jasotzeko aukerarik.
Sistemak partikularrei eta enpresei eskaintzen dizkien abantailez gain, ekimen hau aurrera ateratzea erraztu duen politikak Euskadin Administrazio elektronikoa garatzea du helburu, zerbitzu digital aurreratuen erabilera masiboa bultzatuz eta Informazio Teknologia Berrien mekanismoak ezagutzen ez dituzten pertsonen bazterkeriaren aurka borrokatuz.
METAPOSTAren eredua Danimarkako eBoks zerbitzu arrakastatsua da, gaur egun, 3,5 milioi erabiltzaile dituena 5,5 milioiko biztanleria duen herrialde batean. Gainera, 600 igorle handi dira Danimarkako zerbitzu honen bidez haien komunikazioak bidaltzen dituztenak. METAPOSTAren ezarpenaz, Euskadi, Internet bidezko zerbitzuen garapenean aurreratuago dauden herrialdeen ekimenen parean kokatu da. Hauexek dira ekimen horietako batzuk: eBoks (Danimarka), De-Mail (Alemania), MyPage.no (Norvegia), Agosp (Australia) edo My eCitizen (Singapur).
2010ean eratu zen METAPOSTA elkartea zortzi bazkide hauek osatzen dute: Ezten (SPRIren eta Eusko Jaurlaritzako Industria, Berrikuntza, Merkataritza eta Turismo Sailaren menpeko arrisku-kapitaleko funtsa), EJIE (Jaurlaritzaren informatika-elkartea, Justizia eta Herria Administrazio Sailaren menpekoa), Bilboko, Gipuzkoako eta Arabako Merkataritza Ganberak, Tecnalia Korporazioa, Gupost marketing zuzeneko enpresa eta Mondragón Inversiones delakoa. Elkarteko presidentea, Juan Goicolea, Eusko Jaurlaritzako Berrikuntza eta Teknologia sailburuordea da.
METAPOSTAren ezaugarri nagusiak
• Borondatez eskuratu eta erabiltzeko moduko hautazko zerbitzua: jasotzaileak agiriak zein igorletatik jasoko dituen aukera dezake.
• Ez da e-mail kontu bat, eta honek ohiko posta elektronikoari atxikitako arazo asko eta asko ekidingo ditu, phishing delakoa (nortasuna lapurtzea) eta spam deritzona (eskatu gabeko posta-bidalketa masiboa) tarteko direla.
• Edozein lekutan, edozein unetan eta Interneterako konexioa duen edozein dispositibotan erabiltzeko moduko webgune baten bitartez egingo da zerbitzurako sarrera.
• Dokumentu-gordailu elektronikoan materialak kargatzeko funtzioetan igorri edo erantsitako mezuak ere gorde daitezke sistema honetan.
• Biltegiratzea mugagabekoa da erabiltzailearentzat, bai tamainaz bai iraupenaz ere. Bizitza osorako zerbitzua da.
• Erabilerraztasunari lehentasuna emanez diseinatu da.
• Euskadiko hiritar eta enpresa guztiei zuzenduta dago, beste esparru batzuetara ere hedatzeko aukeraz.
• Doakoa da azken erabiltzailearentzat eta kostu murritzekoa igorleentzat.
Metapostan alta hartzea
Hiru era daude METAPOSTAn alta hartzeko:
Ziurtagiri digitala
METAPOSTAn onartutako sinadura elektronikoko ziurtagiriak hurrengoak dira:
- DNI elektronikoa
- IZENPE herritar-txartela
- CAMERFIRMA txartela
- ONA txartela
Enpresek, IZENPEren txartel urdinarekin edo CAMERFIRMA txartelarekin egin dezakete alta.
KZgunea
Edozein KZgunean egin dezakezu alta METAPOSTAn zure NANa edo AIZa erakutsiz (ziurtagiri digitalaren beharrik gabe). Hurbilen duzun zentroa eta ordutegia kontsulta ezazu KZgunearen web-gunean.
Online banka
Parte hartzen duten entitateen online bankaren erabiltzaile izanda.
Enpresek Bankoa, Ipar Kutxa eta Caja Laboral entitateen online bankaren bitartez egin dezakete alta.
Alta, finantza-entitatearen web-gunetik egin beharko da.
Informazio gehiago Metapostari buruz
www.youtube.com/user/metaposta
Bilbao, 2012ko irailaren 13a
