Eusko Jaurlaritzak "2019ko Lagunkoitasuneko Jardunbide Egokien Saria" deitu du. Horren bidez, erakunde publiko eta pribatuak aintzatetsiko dira, zahartzen diren pertsonentzako berrikuntzagatik (Gobernu Bilera 2019-09-17)

fotoconsejo.jpg

2019.eko irailak 17

Beatriz Artolazabal Enpleguko eta Gizarte Politiketako sailburuak gaur goizean Gobernu Kontseiluri “2019ko Lagunkoitasuneko Jardunbide Egokien Saria” deitzeko aginduaren berri eman dio; horren bidez, jendaurrean aintzatetsiko dira lagunkoitasunaren arloan berrikuntzagatik eta eraginkortasunagatik zahartzen diren pertsonentzako ingurune bideratzaileak sortzen nabarmentzen diren jardunbideak garatzen dituzten erakunde publiko eta pribatuak.

Beatriz Artolazabalek zehaztu duenez, “deialdi honetarako hautagaitza Euskal Autonomia Erkidegoko administrazìo publikoek eta beren sektore publikoetako erakundeek aurkeztu ahalko dute, bai eta helbide soziala autonomia-erkidego horretan duten eta beren jarduera nagusia bertan garatzen duten pertsona juridiko pribatuek ere”.

2015-2020rako Zahartze Aktiborako Estrategiak legegintzako erreferentzia gisa Gizarte Zerbitzuen Legea du; hark Gizarte Zerbitzuen Euskal Sistema arretarako sare antolatu gisa ulertzen du, zeinak helburu baitu gizarte-integrazioari bide ematea eta pertsona, familia eta talde guztien autonomia. Horretarako, eginkizun sustatzailea, prebentziokoa, babeslea eta laguntzailea du.

“Bere hiru arlo nagusietako bat lagunkoitasunari eta ongizatearen gizartea eraikitzen parte hartzeari buruzkoa da, eta haren helburua da Euskadin lagunkoitasunaren paradigma orokortu dadin sustatzea eta, horretarako, prozesu horretan zahartzen diren pertsonen protagonismoa eta parte-hartzea bermatzea”, esan du sailburuak.

Boluntariotza

Horretarako, zahartzen diren pertsonen artean ekintza boluntarioa eta erkidegoaren elkarlaneko partaidetzako mugimenduak areagotzea sustatu nahi da; adinekoek familia-eremuan ematen dituzten zaintza eta laguntzen transferentzia baloratu nahi da; eta Euskadin lagunkoitasun-prozesuak sustatu nahi dira.

Nagusiekiko inguruneen lagunkoitasunaren mugimendua Osasunaren Mundu Erakundeak (OME) sustatuta sortu zen, 2005ean, Rio de Janeiroko Gerontologiako XVIII. Mundu Kongresuan, Age-Friendly Cities izenarekin. Munduko biztanleen bi joera bereizgarri izan zituen oinarri: zahartze demografikoa eta urbanizazio-prozesua.

Horrela, OMEren iritziz, ingurune lagunkoi batek bizitza independenterako, zahartze aktiborako eta autonomia pertsonalerako adore ematen du; horretarako, osasuneko, parte hartzeko eta segurtasuneko aukerak optimizatzen dira, pertsonen bizi-kalitatea hobetzeko.

Esparru horren barruan, “Euskadi Lagunkoia” proiektua sortu zen, Enpleguko eta Gizarte Politiketako Sailaren ekimen gisa. Ekimen horrek herritarren eta sektore publikoaren, pribatuaren eta sozialaren parte-hartzea sustatzen du, Euskadin zahartzen diren pertsonentzako bizitza-ingurune bideratzaileen sustapenean lagunkoitasun-mugimendua garatzeko.

Kontuan hartuta Euskadin lagunkoitasunaren arloko lanagatik nabarmenak diren eta zentzu horretan lan egiten duten erakunde, organismo eta pertsona asko daudela, Aginduaren helburua da “Lagunkoitasuneko Jardunbide Egokien Saria” sortu eta, horrela, berrikuntzagatik eta eraginkortasunagatik nabarmenak diren jardunbide egokien balioa azpimarratzea.

Saria

Jardunbide bat egokia dela esateko, erreferentzia gisa UNESCOk Management of Social Transformation programaren esparruan 2003an eginiko proposamena hartzen da. Hartan, oinarrizko lau ezaugarri zehazten dira, gizarte-eremuan jardunbide egokiak zer diren identifikatzeko: berritzailea (soluzio berriak edo sortzaileak garatzen ditu), eraginkorra (hobekuntzaren gainean inpaktu positiboa eta benetakoa erakusten du), jasangarria haren eskakizun sozial, ekonomiko eta ingurumenekoengatik (denboran mantendu daiteke eta ondorio iraunkorrak izan) eta eredu gisa har daiteke (eredu gisa balio du, beste leku batzuetan politikak, ekimenak eta jarduketak garatzeko)”, esan du Beatriz Artolazabalek.

Gizarte Zerbitzuen Zuzendaritza deialdi honen organo kudeatzailea da. Hautagaitzak aurkezteko epea 30 egun naturalekoa izango da, Agindua EHAAn argitaratu eta biharamunetik hasita. Epaimahaia honako hauek eratuko dute: Lide Amilibia Eusko Jaurlaritzako Gizarte Politiketako sailburuordea; Pilar Sorando Zahartzaroa - Geriatria eta Gerontologiako Euskal Sozietateko presidentea; Koldo Aulestia AFAGI- Alzheimer Gipuzkoako presidentea; Beatriz Vazquez 3D Social Movement-eko kudeatzailea; Jose Manuel Odriozola  EUSKOFEDERPEN pentsiodun eta erretiratuen elkarteen lurralde-federazioko presidentea; Mª Jesus Goikoetxea Giza Eskubideetako doktorea eta Psikologiako eta Teologiako lizentziaduna Deustuko Unibertsitatean, eta Saioa Landa Gizarte Zerbitzuen Zuzendaritzako teknikaria (ez du botorik izango).

Saria balioespen onena duen proiektuari emango zaio, eta bidaia-poltsa bat izango da, 3.000 eurokoa, saritutako erakundeko hiru pertsonak lagunkoitasun-jardunbideren bat egiten duen erakunde edo entitateren bat bisitatzeko. Helmuga erakunde saridunak aukeratuko dut, eta saria ematen duen organoari jakinaraziko zaio, hura onar dezan; helmuga hori hautatzeko motiboa behar bezala justifikatu beharko da. Hori guztia ekitaldi publikoan egingo da.