700 enpresak hartuko dute parte bihartik aurrera Intergune+2019 ekitaldian, nazioartekotzeari buruzko Euskadiko urteroko hitzorduan

2019.eko maiatzak 05

• Intergune+ 2019 da Nazioartekotzeko Euskal Agentziaren apustua enpresariei beren negozio-proiektuak atzerrira ateratzen laguntzeko
• Berriro ere topagune bat izango da Eusko Jaurlaritzaren Kanpo Sarearekin --16 bulego eta aholkulari--, aholkularitza pertsonalizatua emateko Kanpo Sareak barne hartzen dituen 80tik gora herrialderi buruz
• Intergune+ ekitaldiaren berritasun garrantzitsuenak, Talentuaren Foroak, indartu egin nahi ditu nazioartekotze arloko profesional berrien gaitasun eta trebetasunak, gero eta gehiago eskatzen direnak enpresen aldetik.
• Programa

700 enpresak eman dute izena maiatzaren 6tik 7ra (astelehenetik asteartera) bitartean BECen egingo den Intergune+2019 ekitaldian, nazioartekotzeari buruzko urteroko hitzorduan. Intergune+ 2019 da Nazioartekotzeko Euskal Agentziaren apustua enpresariei beren negozio-proiektuak atzerrira ateratzen laguntzeko. Aurtengo edizioa ere topagune bat izango da Eusko Jaurlaritzaren Kanpo Sarearekin --16 bulego eta aholkulari--, aholkularitza pertsonalizatua emateko Kanpo Sareak barne hartzen dituen 80tik gora herrialderi buruz. Era berean, ezagutzera emango dira nazioartekotzearen arloko zerbitzu berriak, finantzaketa eta laguntzak.

 Industria eta Energia sailburuorde Javier Zarraonandia Intergune+ 2019 ekitaldian izango da eta Miguel Ceballosek –Europako Merkataritza Komisarioaren Laguntza Kabineteko buruak- irekiko du ekitaldiaren egitaraua, gaur egungo egoera geopolitikoari buruzko hitzaldi batekin; ondoren, mahai-inguru bat egingo da atzerriko merkatu nitxoetan lider diren euskal enpresekin, zeintzuek hizpide hartuko baitituzte euren esperientzia eta etorkizuneko erronkak.  

SPRI Taldean integratutako Nazioartekotzeko Euskal Agentziak antolatzen duen Intergune+ 2019 beraizik diseinatuta dago erantzuna emateko euskal enpresek atzerrira irtetean dituzten erronkei. Hauek dira enpresen erronka garrantzitsuenak: atzerriko merkatuak lideratzea eta dibertsifikatzea; urruneko merkatuetan eta merkatu arriskutsuetan sartzea; nazioartekotze-eredu bat aukeratzea; enpresen tamaina, lehiakortasuneko aldagai garrantzitsu bezala; eta nazioarteko espezializazio handiko profesionalak integratzea.

Zentzu horretan, Intergune+ ekitaldiak berritasun garrantzitsu bat dakar aurten. Atal bat sortu du, hitzaldien egitarauarekin paraleloki garatuko dena, zeinaren helburua baita areago indartzea nazioartekotze arloko profesional berrien gaitasun eta trebetasunak, gero eta gehiago eskatzen direnak enpresen aldetik.

Enpresariak dira Intergune+ ekitaldiko urteroko jomuga-publikoa. Zehazki, atzerrian ezarrita dauden enpresak, herrialde bat baino gehiagotan kokatuta daudenak, enpresa esportatzaileak, esportatzeko premia dutenak, beren negozioa nazioartekotzeko unea oraindik aurkitu ez dutenak baina halere badakitenak nazioartekotu behar dutela, eta baita ere nazioartekotzearekin lotutako eragile publiko eta pribatuak. Esan bezala, edizio honetako nobedadeetako bat da ikasleei eskainitako kapitulu berezia, hobeto ezagutu ditzaten zeintzuk diren euskal enpresek behar dituzten nazioarteko espezializazioak.

B2B topaketak Kanpo Sarearekin

80 herrialdetan presentzia duen Nazioartekotzeko Euskal Agentziaren Kanpo Sareko zuzendari eta aholkulariak Euskadira etorriko dira Intergune+ 2019 ekitaldian parte hartzera. Eusko Jaurlaritzako agenteek ordezkatutako herrialdeetan interesatutako enpresek aukera izango dute aurrez aurreko bilerak egiteko eta beren nazioartekotze proiektuak aztertzeko.

Egitaraua

 Lehen eguneko (maiatzak 6ko) agenda osatuz, Nazioartekotzeko Euskal Agentziaren balio erantsiko Programa eta Zerbitzuak aurkeztuko dira, eta mahai-inguruak antolatuko dira, bai hobeto ezagutzeko programa eta zerbitzu horiek erabili dituzten euskal ETEen nazioartekotze-prozesuak, bai bertatik bertara azaltzeko nolako esperientziak bizi izan dituzten ezarpen fasean dagoen Afrikakoa bezalako merkatu batean.  Arratsaldean euskal enpresetako profesionalen nazioarteko mugikortasunaren arazoak eta erronkak ezagutu eta eztabaidatuko dira. Atal honetan, enpresek eurek azalduko dute nolako profilak behar dituzten atzerrian, nolako arazoak dituzten atzerriratzeko, zeintzuk diren beren karrera planak, zein arazo dituzten jomugako herrialdean langileak hautatzeko, atzerriko langileak leialtzeko eta langile horien errotazioa bultzatzeko, ETE batek izan ditzakeen arazoak bere proiektua atzerriko herrialde batean saltzeko, e.a. Horrez gain, ezagutzera emango dira Agentziak eta Eusko Jaurlaritzak eskaintzen dituzten konponbideak (BEINT beka, Kanpo Ekintzako Giza Baliabideen zerbitzuak, e.a.).  Maiatzaren 7an euskal enpresek beren nazioartekotze-esperientzia azalduko dute, baina ikuspegi sektorialetik eta, zehazkiago, espezializazio adimenduneko estrategian lehentasunezkoak diren sektoreen ikuspegitik: energia berriztagarriak, bio-osasuna, automozioa, makina-erreminta eta ziber-segurtasuna. 

Laburtuz, hitzaldi eta mahai-inguruetan bost helburu hauek bilatuko dira:

• adituek beren ikuspegia azaltzea munduko egoera geopolitikoari buruz eta, zehazkiago, populismoek nazioarteko politikan duten eraginaz,
• nazioartekotzea bultzatzeko tresnen bitartez nazioartekotze-prozesua ongien diseinatzen eta gauzatzen ari diren enpresen erakusleiho izatea,
• merkatu-nitxoetako liderren esperientzia ezagutzea,
• aukera-merkatu berrietarako plan estrategikoak prestatzen laguntzea, eta

-       sektore estrategikoetara bideratutako tailerrak egitea: Energia berriztagarriak, Osasuna-biozientziak eta Manufaktura aurreratua, beste sektore garrantzitsu batzuekin batera: Automozioa, M-E, Aeronautika eta IKTak. 

Talentuaren foroa

Nazioartekotzeak Euskadin urtero daukan Hitzordu honen berritasun garrantzitsuena da egitarau paralelo bat eta espazio propio bat sortuko dela unibertsitatea eta enpresa elkarrekin konektatzeko, espazio horretan gaurko ikasleek eta biharko nazioartekotzearen arloko profesionalek bertatik bertara ezagutu ditzaten globalki lehiatu nahi duten enpresek eskatzen dituzten  gaitasun, trebezia, talentu eta prestakuntzak.

Hala, Intergune+ barruan egingo den Talentuaren Lehen Foroa gehienbat unibertsitateko ikasketak amaitzen ari diren gazteei zuzendutako topaketa bat da, helburutzat daukana gazte horien interesa piztea nazioartekotze arloko karrera profesional bat egin dezaten, eta baita ere bermatzea nazioarteko profila duten adituak izango ditugula etorkizunean.

Atal hori bereziki zuzendua dago Nazioartekotzearekin lotutako graduetako azken ikasturteak egiten ari diren ikasleei eta BEINT eta Global Trainning programetako bekadun ohiei.

Asmoa da beren testuinguruan jartzea nazioarteko talentuak munduan bizi duen egoera eta euskal enpresetako gazteek datozen urteetan izango dituzten erronkak. Horretarako, mahai-inguruetan lehen pertsonan kontatuko da nolako esperientziak bizi izan dituzten BEINT beken onuradunak izan eta gero une honetan euskal enpresetan lanean ari diren lagunek, eta Global Trainning beken onuradunak izan ondoren orain Euskadiko multinazional batean lanean ari direnek.

Orobat emango da ezagutzera euskal enpresaren ikuspegia (gehien behar diren profilak, eskatzen diren gaitasunak, epe luzerako irtenbide profesionalak enpresan) eta baita ere erakundeena (BEINT eta Global Trainning programen 2019ko edizioen aurkezpena eta talentua Euskadira itzultzeko prozesuaren erronkak, zailtasunak, abantailak eta laguntzak).

Erakusleen gunea

 Azkenik, urtero bezala, Intergune+2019 ekitaldian erakusketa-gune bat egongo da, non presente egongo diren enpresen nazioartekotze arloko eragile publiko eta pribatuak. Alde publikoan aipagarria da hor izango direla SPRI Taldearen Invest in the Basque Country estrategia eta Bizkaia Talent.

Hala, aurten gune horretan izango dira: hiru Foru Aldundiak, hiru Merkataritza Ganberak, Basque Clusters, Energia Klusterra, ICEX, Bilboko Portuko Agintaritza, Cofides, Cesce, Elkargi, Itac, Interacción, Negobide, Iberemprende Fundazioa, Sparber, Oteic taldea, Agex taldea, Abas, AIR France, KLM, Banco Sabadell, Santander, Bankoa Credit Agricole eta Barrilero y Asociados abokatu-bulegoa.