Argitalpen-data: 2016/09/27
Irailaren 30a izango da azken eguna, Kontsumobidek 2016-17 ikasturtean ikastetxeetan emango dituen prestakuntza-ekintzetan izena emateko
Guztira, 170 ikastetxe, ikastola eta institutuk eman dute izena, 58.000 laguni baino gehiagori kontsumoari buruzko heziketa doan emateko
EAEko ikastetxeek irailaren 30era arteko epea (ostirala) izango dute Kontsumobidek 2016-2017 ikasturtean zehar ikastetxe, ikastola eta institutuetan emango duen prestakuntza-eskaintzan parte hartzeko eskatzeko. Kontsumoko Euskal Institutuak hainbat tailer diseinatu ditu, ikasleentzat: Lehen Hezkuntzarako 18, eta Bigarren Hezkuntzarako, berriz, 19. Halaber, hainbat prestakuntza-ekintza eskaintzen dizkie gurasoei, eta orientabide pedagogikoko zerbitzu bat ere bai, irakasleei.
Helburua hau da: prestakuntza-ekintzetan parte hartzen dutenek kontsumoari buruzko oinarrizko ezagutza bat izatea, doan, arlo oso desberdinetan: besteak beste, elikadura, publizitatea, garraio publikoa edo Informazioaren eta Komunikazioaren Teknologiak. Horrela, jarrera kritiko eta arduratsu bat lortzeko beharrezkoak diren baliabideak izango dituzte. Interesa duten ikastetxeek aukera dute oraindik online izena emateko, Kontsumoko Euskal Institutuaren web-orriaren bitartez.
EAEko 170 ikastetxek bidali dituzte, gaur arte, eskabideak Kontsumobidera: Lehen Hezkuntzako 127k eta Bigarren Hezkuntzako 43k. Lehen Hezkuntzaren kasuan, 2.300 tailerretik gora ematea eskatu dute ikastetxeek. Hauek dira eskaera handiena izan duten tailerrak: Litxarreriak, Supermerkatua eta erosketa eta Telefono mugikorra eta Internet. Bestalde, DBHko irakasleriak 400 tailerretan baino gehiagotan inskribatu ditu ikasleak. Hauek dira gehienek egin nahi dituztenak: Elikadura osasuntsua, Publizitatea eta gorputzaren gurtza eta Telefono mugikorra. Institutuak, halaber, ehundik gora tailer eta hitzaldi egingo ditu, gurasoentzat. Guztira, 58.000 lagunek baino gehiagok jasoko dute prestakuntza.
Kontsumobidek, ikastetxeetako tailer horietaz gain, beste prestakuntza-ekintza batzuk ere eskaintzen ditu urtean zehar, edonorentzat. Ekintza horietan sartzen dira hauek guztiak: Kontsumoko prestakuntza Kontsumobideko zentroetan programa, adinekoei zuzendutako eskaintza, urteko kanpainak edo ikasgela birtuala (online).
Informazio gehiago: Kontsumorako prestakuntza ikastetxeetan (pdf, 2 MB).
Lehen Hezkuntzarako tailerrak:
- Kontsumitzen ikasiko dut
- Elikagaien ekoizpena
- Supermerkatua eta erosketa
- Fruta eta barazkiak
- Litxarreriak
- Ontziak eta euren berrerabilera
- Produktu baten bizi-zikloa
- Ura: kontsumoa eta aurreztea
- Energia
- Garraiobideak
- Jolasa eta jostailuak
- Bideo-jokoak
- Publizitatearen analisia
- Arriskuak sahiestu
- Elikagaiak: etiketak eta osarea
- Badakizu zer janzten duzun? Etiketak esaten dizu
- Etxeko-ekonomiaren jokoa
- Telefono mugikorra eta Internet
Bigarren Hezkuntzarako tailerrak:
- Kontsumitzen ikasiko dut
- Bidaian ere eskubide eta betebehar
- Elikadura osasuntsua
- Elikagaien manipulazio segurua
- Kontsumoa eta ingurumena
- Produktu baten bizi-zikloa
- Ura: nola kontsumitu eta aurreztu
- Aurrezpen energetikoa
- Aisia eta kontsumoa
- Bideo-jokoak
- Publizitatea eta markak
- Publizitatea eta gorputzaren gurtza
- Arriskuak saihestu
- Elikagaiak: etiketak eta osaera
- Bidezko merkataritza
- Badakizu zer janzten duzun? Etiketak esaten dizu
- Etxeko ekonomia jokoan
- Telefono mugikorra
- Internet