Euskadiren kanpo ordezkaritzak

Euskadiren kanpo ordezkaritzak Eusko Jaurlaritzaren Kanpo Harremanetarako Estrategia martxan jarri eta garatzeko tresna ezinbestekoa dira. Gainera, euskal eragileek nazioartean garatzen dituzten jardueretarako laguntza mekanismo gisa ondoen baloratutako bitartekoa ere badira. Kanpo ordezkaritzak sortu eta garatzea ezinbesteko mugarria izan da euskal kanpo ekintza sakondu eta eraginkor bihurtzeko.

Euskadiren kanpo ordezkaritzek honako ezaugarriak dituzte:

• Kokatuta dauden herrialdeak sakonki ezagutzen dituzte.
• Enpresa, kultura, kooperazioa zein beste hainbat arlo jorratzen dituzten ekimenak abian jartzea errazten duten harreman sareak eskaintzen dituzte.
• Eragile ekonomiko eta sozialei aholkularitza eskaintzen diete, akatsak gutxituz eta denbora eta dirua aurreztea ahalbidetuz.
• Kanpoko euskal komunitatearekin mintzakidetza etengabea izateko funtsezko papera jokatzen dute.
• Kokatuta dauden herrialdeetako gakoak hobeto ezagutzea ahalbidetzen duten “antena” zerbitzuak eskaintzen dituzte, aukerak antzemateko eta Euskadirentzat interesgarriak izan daitezkeen ekimenen gaineko informazioa puntualki jasotzeko aukera eskainiz.
• Funtsezko papera jokatzen dute gure errealitatea eta hirugarren interesdunentzat erreferente izan daitezkeen gure esperientzia propioak hedatzeko.

Hori horrela, euskal kanpo ekintzak oinarri dituen eraginkortasun, arrazionaltasun eta koherentzia irizpideak jarraituz, ordezkaritza bat dagoen herrialdeetan honek betetzen ditu Eusko Jaurlaritzak eskainitako zerbitzu guztiak (arlo instituzionalean, enpresarialean, kulturalean, hezkuntza arloan zein beste edozein eremutan).