Onartu da Gaztemundu 2019 programan parte hartzeko deialdia, kultura erakundeak nola kudeatu ikasteko (Gobernu Bilera 2018-12-18)

2018.eko abenduak 18

Gobernu Kontseiluak Gaztemundu programaren hurrengo urteko deialdia onartu du, Euskal Etxeetako gazteek egonaldi bat egin dezaten Euskadin.

Programa horretarako 51.600 euro bideratu dira, atzerriko Euskal Etxeetako 18 eta 35 urte bitarteko 15 gaztek, gehienez,  egonaldi bat egin dezaten Euskadin.

Hurrengo urtean, Gaztemundu programako partaideen prestakuntza kultura erakundeak nola kudeatu ikasteko izango da. Hala, adituek gidatutako prestakuntza-programan parte hartuko dute aurten hautatutakoek.

Egonaldian, bestalde, beste jarduera batzuk izango dituzte, euskal jatorria duten gazteek aukera izan dezaten harremana izateko erakundeekin, elkarteekin eta Euskadin bizi eta lan egiten duten pertsonekin, baita Euskadiko eta kanpoko gazteen arteko harremanak sortzeko ere.

Programan parte hartzeko interesa dutenek eskabidea aurkeztu beharko dute Lehendakaritzako Kanpo Harremanetarako Idazkaritza Nagusian, deialdia EHAAn argitaratu ondoren.

Gaztemundu programa Basque Country Estrategiaren baitakoa da –estrategia horren helburuetako bat da Euskadi kanpoan proiektatzea– eta 1996an sortu zuen Eusko Jaurlaritzak Euskadiren egungo errealitatearen alde guztiak ezagutarazteko eta belaunaldi berriei Euskal Etxeetako bizitza aktiboan integratzeko aukera emateko.

Ordutik hona, 800 bat lagunek hartu dute parte programa horretan (gehienak Argentinakoak) eta horietako asko orain Euskal Etxeetako zuzendaritzetako kideak dira edota ardura postuak betetzen dituzte.