Ekonomiaren Garapen, Jasangarritasun eta Ingurumen Saila

NEIKER-Tecnaliak Argentinako CIEFAP zentruarentzat aholkularitza lanak egingo ditu basoko espezien in vitro zabalkunderako teknikak garatzeko

Convenio_NEIKER_y_CIEFAP.jpg

2018.eko azaroak 30

Aholkularitza hau NEIKERek eta Andeetako eta Patagoniako Baso Ikerketa eta Hedapen Zentroak (CIEFAP) sinatutako lankidetza hitzarmenaren parte da, basogintza-egur sektoreari buruzko ezagutza elkartrukatzeko

Basoaren eta egurraren sektoreari balioa gehitzeko eta ikerketa gaietan nazioarteko aliantzak ezartzeko estrategiaren barruan, NEIKER-Tecnaliak lankidetza hitzarmen bat izenpetu du Andeetako eta Patagoniako Baso Ikerketa eta Hedapen Zentroarekin (CIEFAP, Argentina), bi erakundeei aukera emango diena baso-egurraren eremuan bakoitzaren ikerketa, garapen, berrikuntza eta prestakuntzaren lan ildoak indartzeko.

Halaber, hitzarmenari esker bi erakundeek proiektuak garatuko dituzte klima aldaketaren berehalako eszenariora egokitutako espezieak hautatzeko, baita ere lehengaia industrializatzeari eta balio erantsia handitzeari buruzko azterketak egiteko, eta basoko bioekonomiaren inguruko gai berritzaileak ere landuko dituzte.

CIEFAPek NEIKERen aholkularitza jaso ahal izango du ehun begetalak kultibatzeko laborategi bat diseinatu, instalatu eta martxan jartzeko, Esquelen dituen instalazioetan (Argentina). NEIKERek, halaber, bere esperientzia eta ezagutzak eskainiko dizkio CIEFAPi basoko espezie natibo interesgarrien in vitro zabalkunderako teknikak hautatu, garatu eta optimizatzeari buruz (organogenesia eta enbriogenesi somatikoa).

Hitzarmenean sartu diren jarduera ildo nagusien artean nabarmentzen dira NEIKERek baliabide genetiko interesgarri batzuekin egingo dituen saiakuntzak, horien artean egonik Argentinako basoetako espezieak, ikusteko baliagarriak diren Euskadiko baso landaketetan, eta baloratzeko bertako ustiategien produktibitatea kualitatiboki eta kuantitatiboki hobetzeko balio duten. Bertan ezartzen errazagoak diren silbikulturako praktikak ere aztertuko dira.

Gainera, azterketak egingo dira, egurraren kalitateari buruz, horien barruan sartuta analisirako metodoak, parametro kuantifikagarririk egokienak, egurraren gaur egungo eta etorkizuneko erabilerak, etab., eta bi erakundeek espezie interesgarriei buruzko aurretiazko azterketak ere partekatu ahal izango dituzte.

Epe ertain eta luzera, hitzarmenaren baitan egurretarako ez diren basoko produktuen arloan dauden aukerak aztertu, analizatu eta bilatuko dira, eta lankidetzak eta aliantzak ezarriko dira Txileko Baso Institutuarekin (Infor), elkarrekin proiektuak garatzeko, alde guztien mesedetan.


NEIKER-Tecnalia

NEIKER-Tecnalia Nekazaritza Ikerketa eta Garapenerako Euskal Erakundea irabazi asmorik gabeko erakunde publikoa da, eta Eusko Jaurlaritzako Ekonomiaren Garapen eta Azpiegitura Sailari atxikita dago. NEIKER-Tecnaliaren xede nagusia da nekazaritzako produkzio sistemen produktibitatea eta lehiakortasuna hobetzea, ustiategietan kudeaketako teknologia berriak garatzea eta aplikatzea, eta nekazaritzako elikagaiak eraldatzeko industriaren, bere produktuen eta kontsumitzailearen kalitate eta segurtasun eskakizunak asebetetzea. Gainera, NEIKER-Tecnaliak ezagutza eta prestakuntzaren transferentzi jarduerak egiten ditu, eta baliabide eta azpiegitura propioak ditu, baita goi mailako kualifikazioa duten langileak ere.

CIEFAP

Andeetako eta Patagoniako Baso Ikerketa eta Hedapen Zentroa (CIEFAP) jurisdikzioarteko erakunde autarkiko bat, ikerketa, berrikuntza eta garapen teknologikoa lantzen ditu, eta bere xedea da Patagonia eskualdearen garapen iraunkorrean laguntzea, bere giza kapitalaren eta, oro har, baliabide natural berriztagarrien balioa agerian jarriz, zehazki, baso sistemei eta basotarako gaitasuna duten lurrei lotutakoei dagokienez. Bere misioa da zientzian, teknologian eta berrikuntzan oinarrituta informazioa, ezagutza eta trebetasunak sortu, sustatu eta transferitzea, baliabide natural berriztagarriei buruz, Patagonia Eskualdeko sektore publikoan zein pribatuan erabakiak hartu behar dituztenei laguntzeko.