Arautegia
InprimatuAGINDUA, 2017ko urriaren 20koa, Ekonomiaren Garapeneko eta Azpiegituretako sailburuarena, zeinaren bidez ezartzen baita Euskal Autonomia Erkidegoko kostaldean kusku biko moluskuak ekoizten diren eremuen sailkapena.
Identifikazioa
- Lurralde-eremua: Autonomiko
- Arau-maila: Agindua
- Organo arau-emailea: Ekonomiaren Garapen eta Azpiegitura Saila
- Jadanekotasuna-egoera: Indarrean
Aldizkari ofiziala
- Aldizkari ofiziala: EHAA (Euskal Herria)
- Aldizkari-zk.: 223
- Hurrenkera-zk.: 5643
- Xedapen-zk.: ---
- Xedapen-data: 2017/10/20
- Argitaratze-data: 2017/11/22
Gaikako eremua
- Gaia: Ekonomi Jarduerak; Ingurune naturala eta etxebizitza
- Azpigaia: Industria; Ingurumena; Nekazaritza eta arrantza
Testu legala
Europako Parlamentuaren eta Kontseiluaren 2004ko apirilaren 29ko 854/2004 (EE) Erregelamenduaren bidez, animalia-jatorriko produktuen kontrol ofizialak antolatzeko arau espezifikoak finkatu ziren. Bada, erregelamendu horretan ezarritakoarekin bat etorriz, agintari eskudunak bere aplikazio-eremuan dauden espezieen ekoizpen- eta berrezarpen-eremuak izendatu eta sailkatu beharko ditu, betiere erregelamendu horretan aurreikusitako hiru kategorien arabera. Erregelamenduak ondoko eremu-sailkapena egiten du: A mailakoak, zeinetan bildu baitaitezke kusku biko moluskuak giza kontsumo zuzenerako; B mailakoak, zeinetan bildutako kusku biko moluskuak, giza kontsumorako merkaturatu ahal izateko, arazketa zentroan tratatu edo berrezarri beharko baitira; eta C mailakoak, zeinetan bildutako kusku biko moluskuak, giza kontsumorako merkaturatu ahal izateko, aldi luzean berrezarri beharko baitira.
Agindu honen helburua da, beraz, Euskal Autonomia Erkidegoko kostaldean moluskuak ekoizten diren eremuak izendatzea eta sailkatzea. Horretarako, kusku bikoak ekoizten diren eremuetan aldiro egindako analisiak eta laginketak hartu dira aintzat.
B eta C multzoan sailkatutako eremuei dagokienez, ohartarazi beharra dago halakoetan debekatuta dagoela moluskuak ateratzea, arazketa zentrorik eta berrezarpen-eremurik ez dagoelako.
Itsasoko Kirol-arrantzaren Arautegia onartzeko den urriaren 3ko 198/2000 Dekretuaren azken xedapenaren bidez baimena ematen zaio arrantza gaietan eskudun den sailburuari dekretuan ezarritakoa garatu eta betearazteko, eta Dekretuaren II. eranskinaren bigarren puntuan zehazten diren espezieak harrapatzeko aldia eta baldintzak urtero-urtero aldatu ahal izateko, itsas baliabideen egoerari buruz egiten diren azterlan eta analisi zientifikoetatik ateratzen diren ondorioen arabera. Ikerketek erakusten duten Escherichia coli-ren kontzentrazio datuak ikusita, beharrezkotzat jotzen da ez luzatzea 198/2000 Dekretuaren II. eranskinak aurreikusten zuen kusku bikoak biltzeko baimen esperimentala.
Horregatik guztiagatik, honako hau
Lehenengoa. Euskal Autonomia Erkidegoko kostaldeko itsas-eremuen sailkapena egitea, uraren kalitatea eta horrek akuikulturaren eta itsaski-bilketaren gainean duen eragina aintzat hartuta, eta Euskal Autonomia Erkidegoan moluskuak ekoizten diren eremuak izendatzea.
Bigarrena. Hondarribia (Bidasoa ibaiaren estuarioa). Ikusi I. eta II. eranskinak:
Sailkapeneko C eremua: ibai-ahotik aireportuaren muturrera bitarteko eremu osoa; bertan, debekatuta dago kusku biko moluskuak ateratzea (PAV 1/01)
Eremu itxiak: honako eremu hauetan ezin da moluskurik ekoitzi, eta halakoak ateratzea debekatuta dago:
Aireportuaren muturretik barrualdera doan eremua.
Hondarribiko arrantza-portua.
Hondarribiko kirol-portua.
Beteranoen dartsena.
Hirugarrena. Mundaka (Oka ibaiaren estuarioa). Ikusi I. eta II. eranskinak:
Sailkapeneko B eremua: Arketako azpieremua PAV 1/02-1 (ibai-ahotik Sandinderi uhartera bitarteko eremuaren eskuinaldea) eta Kanalako azpieremua PAV 1/02-3 (Sandinderi uhartetik Muruetako Ontziolara bitarteko eremua). Moluskuak atera ondoren, arazketa-prozesu baten menpe jarriko dira, bizirik merkaturatu aurretik.
Sailkapeneko C eremua: ibai-ahotik Sandinderi uhartera bitarteko eremuaren ezkerraldea (Portuondo PAV 1/02-3); bertan, debekatuta dago kusku biko moluskuak ateratzea.
Eremu itxiak: honako eremu hauetan ezin da moluskurik ekoitzi, eta halakoak ateratzea debekatuta dago:
Itsasadarrean gora, Muruetako Ontziolatik Gernikara bitarteko eremua.
Txatxarramendi uharteko zubipeko aldea.
Mundakako portua.
Laugarrena. Plentzia (Butroe ibaiaren estuarioa). Ikusi I. eta II. eranskinak:
Sailkapeneko C eremua: ibai-ahotik Arrainolara bitarteko eremua PAV 1/03, Plentziako portua salbu; bertan, debekatuta dago kusku biko moluskuak ateratzea.
Eremu itxiak: honako eremu hauetan ezin da moluskurik ekoitzi, eta halakoak ateratzea debekatuta dago:
Plentziako portua.
Estuarioaren barnealdea, hau da, Arrainolatik gorako urak.
Bosgarrena. Mendexa-Ondarroa.
Sailkapeneko A eremua: Koordenada hauen barrukoa:
(Ikus .PDF)
Seigarrena. Agindu honetan ezarritako ekoizpen-eremuen sailkapena aintzat hartu beharko da, honako espezie hauek atera nahi izanez gero:
Ostra (Ostrea edulis, Crassostrea angulata eta Crassostrea gigas).
Datila (Pharus legumen, Solen marginatus, Ensis ensis eta Ensis siliqua).
Berberetxoa (Cerastoderma edule edo Cardium edulis).
Muxila (Venerupis pollastra, Ruditapes edo Tapes pullastra, Venerupis decussata, Ruditapes edo Tapes decussata, Venerupis semidecussata, Tapes semidecussata edo Ruditapes philippinarum, Venerupis aurea eta Venerupis rhomboides).
Txirla (Venus striatula eta Chamelea gallina).
Muskuilua (Mytilus edulis eta Mytilus galloprovincialis).
Zazpigarrena. Debekatu da, bai eremu itxietan, bai B eta C motako eremuetan, baita sailkatu gabeko eremuetan, agindu honetako ebazpen-zatiko seigarren paragrafoan zehaztutako espezieak ateratzea.
Zortzigarrena. Ebatzi da ez luzatzea 198/2000 Dekretuaren II. eranskinak aurreikusten zuen kusku bikoak biltzeko baimen esperimentala, zeinak, saiakera moduan, hurrengo espezieotako 50 ale eguneko harrapatzea baimentzen baitzuen: txirla lingirdatsua (Venerupis pullastra), txirla handia (Tapes decussatus) eta txirla (Chamelea gallina), urriaren 1 eta abenduaren 31 bitartean.
AZKEN XEDAPENETATIK LEHENENGOA
Ahalmena ematen zaio Arrantza eta Akuikulturako zuzendariari, agindu honetan xedatutakoa gauzatzeko behar diren neurriak har ditzan.
AZKEN XEDAPENETATIK BIGARRENA
Agindu honek amaiera ematen dio administrazio-bideari, eta, beraren aurka, aukerako berraztertze-errekurtsoa aurkez dakioke Ekonomiaren Garapeneko eta Azpiegituretako sailburuari, hilabeteko epean, agindua Euskal Herriko Agintaritzaren Aldizkarian argitaratu eta biharamunetik aurrera; bestela, administrazioarekiko auzi-errekurtsoa aurkez daiteke Euskal Autonomia Erkidegoko Auzitegi Nagusiaren Administrazioarekiko Auzietako Salan, bi hilabeteko epean, agindua EHAAn argitaratu eta biharamunetik aurrera.
AZKEN XEDAPENETATIK HIRUGARRENA
Agindu honek Euskal Herriko Agintaritzaren Aldizkarian argitaratu eta biharamunetik aurrera izango ditu ondorioak.
Vitoria-Gasteiz, 2017ko urriaren 20a.
Ekonomiaren Garapeneko eta Azpiegituretako sailburua,
MARÍA ARANZAZU TAPIA OTAEGUI.
(Ikus .PDF)
(Ikus .PDF)
